నల్లగొండ రూరల్, న్యూస్‌లైన్: సంపూర్ణ తెలంగాణ సాధన కోసం ఈ ప్రాంత ప్రజలంతా కేంద్రంపైన ఒత్తిడి తీసుకురావాల్సిన అవసరముందని తెలంగాణ పొలిటికల్ జేఏసీ చైర్మన్ ప్రొఫెసర్ కోదండరాం అన్నారు. ఈ నెల 7వ తేదీన హైదరాబాద్‌లో ఇందిరాపార్కు వద్ద చేపట్టనున్న దీక్షకు సన్నాహకంగా శనివారం జిల్లా కేంద్రంలోని క్లాక్‌టవర్ సెంటర్‌లో జిల్లా జేఏసీ ఆధ్వర్యంలో నిర్వహించిన సంపూర్ణ తెలంగాణ సాధన సభలో ఆయన మాట్లాడారు. తెలంగాణ ప్రక్రియను వేగవంతం చేయాలని, పార్లమెంట్‌లో బిల్లు పెట్టాలని, సంపూర్ణ తెలంగాణకు బిల్లులో సవరణలు చేయాలని, ఉమ్మడి రాజధానిగా హైదరాబాద్‌ను ఐదేళ్లలోపు ఉంచాలని, శాంతి భద్రతల అంశాన్ని తెలంగాణ పరిధిలోనే ఉంచాలనేది జేఏసీ ప్రధాన డిమాండ్లని వివరించారు.
 
  ఓట్ల కోసమే సభలో ఆం ధ్రా నాయకులంతా గందరగోళం చేస్తున్నారన్నారు. తెలంగాణ విభజనతోనే హైకోర్టును విభజించాలన్నారు. స్థానికత ఆధారంగానే ఉద్యోగుల బదిలీలు చేపట్టాలన్నారు. నీటి పంపిణీకి జలబోర్డు, ఎథెక్స్‌లు వేయాలన్నారు. కొత్త ప్రాజెక్టులకు అనుమతిచ్చే అధికారం జలబోర్డుకు ఉండకూడదన్నారు. ఉమ్మడి ప్రవేశ పరీక్షలను విడివిడిగా నిర్వహించాలన్నారు. హైదరాబాద్‌లోని ఇందిరాపార్కు వద్ద నిర్వహించే సంపూర్ణ తెలంగాణ సాధన సభకు హాజరై విజయవంతం చేయాలన్నారు. టీఆర్‌ఎస్ శాసనసభా పక్ష ఉప నేత హరీష్‌రావు మాట్లాడుతూ టీవీల ముందు.. సభలలో తొడలుకొట్టిన సీమాంధ్రులు అసెంబ్లీలో తెలంగాణ బిల్లుపై చర్చించేందుకు భయపడి అడ్డుకుంటున్నారన్నారు. అసెంబ్లీ పూర్తిగా రియాలీటీ షోని తలపిస్తోందన్నారు. ఫిబ్రవరి మొదటి వారంలో తెలంగాణ వస్తుందని స్పష్టం చేశారు.
 
 పోరాటాల ద్వారానే భద్రాచలాన్ని సాధించుకున్నామన్నారు. సభలల్లో తెలంగాణ ఏర్పాటుతో నష్టమన్న ముఖ్యమంత్రి కిరణ్‌కుమార్‌రెడ్డి అసెంబ్లీలో ఎందుకు చర్చించడం లేదని ప్రశ్నించారు. సాక్ష్యాలతో అసెంబ్లీలో చర్చించేందుకు తాము సిద్ధమన్నారు. జేఏసీ అధికార ప్రతినిధి విఠల్ మాట్లాడుతూ విభజన వల్ల ఆంధ్రాకు ట్రైబల్ యూనివర్సిటీ, ఐఐటీ, ఎయిమ్స్, రైల్వే జోన్, వరంగల్ నిట్ తరహాలోనే మరో నిట్ కాలేజీని కేంద్రం మంజూరు చేసిందని తెలిపారు. బిల్లులో ప్రమాదకరమైన అంశాలు ఉన్నప్పటికీ అంశాల గురించి మాట్లాడితే ఏదోరకమైన అడ్డు చెప్పి తెలంగాణను ఆపుతుందన్న ఉద్దేశంతోనే ఎలాంటి అభ్యంతరాలూ చెప్పడం లేదన్నారు. రాష్ట్రం ఏర్పడిన తర్వాత బిల్లులోని లోపాలను సవరించుకుంటామన్నారు. 371డి ఆర్టికల్‌ను ఉంచాలని నిర్ణయించినట్లు తెలిపారు. బీజేపీ ఎమ్మెల్యే యెండల లక్ష్మీనారాయణ మాట్లాడుతూ ప్రత్యేక రాష్ట్ర ఏర్పాటులో కాంగ్రెస్ గందరగోళం చేస్తుందన్నారు. కాంగ్రెస్ తెలంగాణ ఇవ్వకపోతే బీజేపీ ఇస్తుందన్నారు.
 
 టీఆర్‌ఎస్ జిల్లా అధ్యక్షుడు బండా నరేందర్‌రెడ్డి మాట్లాడుతూ ఆంక్షలు లేని తెలంగాణ సాధించేందుకు టీఆర్‌ఎస్ పోరాటం నిర్వహిస్తుందన్నారు. మళ్లీ కిరికిరి పెట్టి తెలంగాణను అడ్డుకునేందుకు సీమాంధ్రులు కుట్ర చేస్తున్నారన్నారు. బీజేపీ జిల్లా అధ్యక్షుడు వీరెల్లి చంద్రశేఖర్‌రెడ్డి మాట్లాడుతూ కాంగ్రెస్ తెలంగాణను అడ్డుకుంటే పుట్టగతులుండవని, నరేంద్రమోడీ ప్రధాని అయిన తర్వాత తెలంగాణ ఏర్పాటు చేస్తారన్నారు. సీపీఐ(ఎంఎల్) న్యూడెమోక్రసీ నాయకుడు కోటేశ్వర్‌రావు మాట్లాడుతూ యురేనియం, థర్మల్‌ప్లాంట్, ఫీల్డ్‌ఫైరింగ్ రేంజ్ ఏర్పాటును వ్యతిరేకించాలన్నారు. టీఎన్‌జీఓస్ జిల్లా అధ్యక్షుడు పందిరి వెంకటేశ్వరమూర్తి మాట్లాడుతూ ఆంక్షలు లేని తెలంగాణ కోసం అందరూ ఐక్యంగా ఉద్యమించాల్సిన అవసరముందన్నారు.
 
 రాష్ట్ర పునర్నిర్మాణంలో తెలంగాణవాదులంతా భాగస్వామ్యం కావాలని కోరారు. జిల్లా జేఏసీ చైర్మన్ జి.వెంకటేశ్వర్లు అధ్యక్షతన జరిగిన ఈ సమావేశంలో జేఏసీ కన్వీనర్ గోలి అమరేందర్‌రెడ్డి, టీఆర్‌ఎస్ పొలిట్‌బ్యురో సభ్యులు చెరుకు సుధాకర్, టీఆర్‌ఎస్ రాష్ట్ర కార్యదర్శి చాడ కిషన్‌రెడ్డి, టీఆర్‌ఎస్ నియోజకవర్గ ఇన్‌చార్జ్ చకిలం అనిల్‌కుమార్, గెజి టెడ్ అధికారుల సంఘం నాయకులు గంప మోహన్‌రావు పాల్గొన్నారు. అనంతరం టీఆర్‌టీయూ క్యాలెండర్‌ను కోదండరాం, హరీష్‌రావులు ఆవిష్కరించారు. అంతకుముందు సభలో కళాకారులు ఆటా - పాటలు అలరించాయి. మర్రిగూడం బైపాస్ వరకు టీఆర్‌ఎస్ శ్రేణులు బైక్ ర్యాలీ నిర్వహించారు. అమరవీరుల స్థూపానికి నివాళులర్పించారు.


 నల్లగొండ అర్బన్, న్యూస్‌లైన్: ఏ ప్రజలు కోరుతున్నారని కేంద్రం రాయల తెలంగాణ విషయాన్ని అనధికారికంగా బయటకు తెస్తుందని టీఆర్‌ఎస్ పొలిట్‌బ్యూరో సభ్యుడు డాక్టర్ చెరుకు సుధాకర్ ప్రశ్నించారు. స్థానిక క్లాక్‌టవర్ సెంటర్ వద్ద సోమవారం రాత్రి జరిగిన శ్రీకాంతాచారి 4వ వర్ధంతి సభలో ఆయన ముఖ్య అతిథిగా పాల్గొని మాట్లాడారు. ప్రజ ల ఆకాంక్ష మేరకు 10జిల్లాల తెలంగాణను ప్రకటించాలని డిమాండ్ చేశారు. అందుకు విరుద్ధంగా చేసే ఏ ప్రయత్నాన్నయినా ప్రజ లు అంగీకరించరని, మరో ఉద్యమానికి సిద్ధం కాగలరని హెచ్చరించారు.
 
 రాష్ట్రాలను విడదీయడం అవయవ సౌష్టంలా ఉండదని ఏ రాష్ట్రంలోనూ ఆ మాదిరిగా జరగలేదన్నారు. రాయలసీమ, తెలంగాణ అస్తిత్వాలకు భంగం కలిగేలా ఉభయులకు అంగీ కారం కాని వ్యర్థ ప్రయత్నాలను విరమించుకోవాలన్నారు. తెలంగాణకు ఫ్యాక్షనిస్టుల జాడ్యం అవసరం లేదన్నారు. శ్రీకాంతాచారి తల్లి శంకరమ్మ మాట్లాడుతూ ప్రత్యేక రాష్ట్రం ఏర్పడ్డాక తెలంగాణలో ఏదైనా ఒక జిల్లాకు శ్రీకాంతాచారి పేరు పెట్టాలని విజ్ఞప్తి చేశారు. అతడి జయంతి ఆగస్టు 15న, వర్ధంతి డిసెంబరు 3ను ప్రభుత్వపరంగా నిర్వహించాలని కోరారు. క్లాక్‌టవర్ సెంటర్ వద్దకు వచ్చి నివాళులర్పించే నాయకులెవ్వరికీ పక్కనే ఉన్న శ్రీకాంతాచారి విగ్రహానికి దండవేయాలని గుర్తుకు రాకపోవడం విచారకరమన్నారు.
 
 తెలంగాణ జాగృతి సంస్థ జిల్లా కన్వీనర్ బోనగిరి దేవేందర్, బీడీఎస్‌ఎఫ్ జిల్లా అధ్యక్షుడు పందుల సైదులు అధ్యక్షతన జరిగిన ఈ సమావేశంలో తెలంగాణ జేఏసీ జిల్లా చైర్మన్ జి.వెంకటేశ్వర్లు, కన్వీనర్ గోలి అమరేందర్‌రెడ్డి, సీపీఐ జిల్లా కార్యదర్శి ఆదిరెడ్డి, టీఆర్‌ఎస్ జిల్లా అధ్యక్షుడు నరేందర్‌రెడ్డి, బీజేపీ జిల్లా అధ్యక్షుడు చంద్రశేఖర్, శ్రీకాంతాచారి తల్లి శంకరమ్మ, కె.పర్వతాలు, పి.వెంకటేశ్వరమూర్తి, డీటీఎఫ్ నేత సోమ య్య, జమాల్‌ఖాద్రి, పన్నాల గోపాల్‌రెడ్డి, పున్న కైలాష్ పాల్గొన్నారు. అంతకుముందు వేదిక నుండి కొవ్వొత్తులతో శ్రీకాంతాచారి విగ్రహంవరకు ప్రదర్శన నిర్వహించారు. పూలమాలలు వేసి నివాళులర్పించారు.