* అబద్ధాల సీఎంపై కలసికట్టుగా ఉద్యమిద్దాం
 * ప్రజలకు వైఎస్ జగన్ పిలుపు
 సాక్షి ప్రతినిధి, గుంటూరు: అబద్ధాల కోరు ముఖ్యమంత్రి చంద్రబాబును బంగాళాఖాతంలో కలిపేందుకు రాబోయే రోజుల్లో కలసికట్టుగా ఉద్యమించాలని వైఎస్సార్ కాంగ్రెస్ పార్టీ అధ్యక్షుడు, ప్రతిపక్ష నేత వైఎస్ జగన్‌మోహన్‌రెడ్డి పిలుపునిచ్చారు. గుంటూరు జిల్లా నాదెండ్ల మండలం చిరుమామిళ్ళ గ్రామంలో మాజీ ఎమ్మెల్యే దొడ్డా బాలకోటిరెడ్డి కాంస్య విగ్రహాన్ని గురువారం రాత్రి ప్రజలు, వైఎస్సార్ కాంగ్రెస్ అభిమానుల హర్షధ్వానాల మధ్య వైఎస్ జగన్ అవిష్కరించారు.
 
 ఈ కార్యక్రమానికి గ్రామం మొత్తం తరలివచ్చింది. వారిని ఉద్దేశించి జగన్ ప్రసంగించారు. ఈ చైతన్యం...ఈ ఉత్సాహం చంద్రబాబు ప్రభుత్వం గద్దె దిగేవరకు కొనసాగాలని అన్నారు. ముఖ్యమంత్రిగా చంద్రబాబు పాలన  మొత్తం అబద్ధాల మయంతో కొనసాగుతోందని, ఆయనంటే.. ప్రజల నుంచి మూడే మూడు మాటలు వస్తాయని, అవి మోసం.. మోసం.. మోసం అని చెప్పారు. ‘చంద్రబాబు పాలన ఎలా ఉందని రైతన్నలను అడిగితే.. బంగారం, పొలాల వేలం నోటీసులు వస్తున్నాయని, ఇంతకుమించి ఏమి చెప్పమంటారంటూ ఆవేదన వ్యక్తం చేస్తున్నారు.
 
 డ్వాక్రా అక్కచెల్లెళ్లను అడిగితే.. అన్నా.. జీవితంలో ఇంతకన్నా మోసగాడు మరొకర్ని చూడలేదంటున్నారు. పావలా వడ్డీకి రుణాలు రాక వారు రెండు రూపాయల వడ్డీకి రుణాలు తీసుకోవాల్సిన పరిస్థితి ఏర్పడింది. ఇక చదువుకుంటున్న కుర్రోడు.. నిరుద్యోగిని అడిగితే.. అన్నా, ఎన్నికల ముందు జాబు రావాలంటే బాబు రావాలన్నాడు. సీఎం అయిన తర్వాత అడిగితే నేనెప్పుడు చెప్పానంటున్నాడు.
 
 ఇంతకన్నా క్రిమినల్ నంబర్‌వన్ దేశంలోనే లేడని అంటున్నారు. అధికారంలోకి రాకముందు అందరికీ ఇళ్లు కట్టిస్తానని చెప్పి ఇప్పుడు నేనెప్పుడు కట్టిస్తానన్నానని అంటున్నాడు..’ అని జగన్ తెలిపారు. బాబు ప్రతి మాట అబద్ధమని, ఆయన ప్రతి అడుగులో మోసం దాగి ఉందని చెప్పారు. చంద్రబాబు ఎన్నికల ముందు చేసిన హామీలు అమలయ్యే విధంగా కలసికట్టుగా పోరాటం చేయాలని ఆయన పిలుపునిచ్చారు.
 
 దివంగత ఎమ్మెల్యే దొడ్డా బాలకోటిరెడ్డిని నాన్న టైగర్ అంటూ పిలిచేవాడని జగన్ ఈ సందర్భంగా గుర్తు చేశారు. ఆయన విగ్రహావిష్కరణకు రెండు సంవత్సరాల క్రితమే రావాల్సి ఉన్నా రాలేక పోయానన్నారు. ఈ గ్రామానికి వచ్చిన తర్వాత ఇక్కడి ప్రజల ప్రేమ, ఆప్యాయతలు తనను కదిలిస్తున్నాయని, ప్రతి గుండె చప్పుడు తనకు వినిపిస్తోందని చెప్పారు. ప్రతి ఒక్కరికీ తన హృదయ పూర్వక అభినందనలు తెలిపారు. పార్టీ జిల్లా అధ్యక్షుడు మర్రి రాజశేఖర్ అధ్యక్షత వహించిన ఈ కార్యక్రమంలో ఎమ్మెల్సీ, పార్టీ సీనియర్ నేత ఉమ్మారెడ్డి వెంక టేశ్వర్లు, ఎమ్మెల్యేలు గోపిరెడ్డి శ్రీనివాసరెడ్డి, కోన రఘుపతి, పిన్నెల్లి రామకృష్టారెడ్డి తదితరులు ప్రసంగించారు.
  
 రాజధాని రైతుల సమస్యల్ని తెలుసుకున్న జగన్..
 హైదరాబాద్ నుంచి ఉదయం 9 గంటలకు వచ్చిన జగన్ ఉద్ధండరాయునిపాలెం, వ డ్లమాను గ్రామాల్లో పార్టీ నేతల ఇళ్లల్లో జరిగిన వివాహాలకు హాజరై నూతన వధూవరులను ఆశీర్వదించారు. దారిలో తనను కలసిన  రైతులతో మాట్లాడి సమస్యలు తెలుసుకున్నారు.


 * రేపు నాలుగో వర్ధంతి సందర్భంగా విగ్రహావిష్కరణ
 * హాజరుకానున్న వైఎస్సార్‌సీపీ అధినేత వైఎస్ జగన్‌మోహనరెడ్డి
 చిరుమామిళ్ళ (నాదెండ్ల): మండలంలోని చిరుమామిళ్ళ గ్రామం జిల్లాలోనే రాజకీయ చైతన్యానికి ఆలవాలమైన గ్రామం. గ్రామానికి చెందిన దొడ్డా బాలకోటిరెడ్డి సర్పంచ్ స్థాయి నుంచి అంచెలంచెలుగా ఎమ్మెల్యే స్థాయికి ఎదిగారు. 1989 నుంచి 1994 వరకూ సత్తెనపల్లి ఎమ్మెల్యేగా పనిచేశారు.  వ్యవసాయ కుటుంబానికి చెందిన దొడ్డా కోటిరెడ్డి, అప్పమ్మ దంపతుల కుమారుడు బాలకోటిరెడ్డి.
 
 ఈయన స్వగ్రామం రాజుపాలెం మండలం కోటనెమలిపురి. చిన్నతనంలోనే చిరుమామిళ్ళకు దత్తతకు వచ్చారు. ఈయన చిరుమామిళ్ళ గ్రామంలోనే ప్రాథమిక విద్యను పూర్తి చేశారు. 1972 మే నెలలో చిరుమామిళ్ళ సర్పంచ్‌గా కాంగ్రెస్ పార్టీ తరఫున గెలుపొందారు. 1987లో యడ్లపాడు మండలానికి తొలి ఎంపీపీగా పనిచేశారు. గుం టూరు జిల్లా పరిషత్ వైస్‌చైర్మన్‌గా పనిచేస్తూ అప్పటి చైర్‌పర్సన్ దొడ్డపనేని ఇందిర ఆకస్మిక మరణంతో ఇన్‌చార్జి చైర్మన్‌గా వ్యవహరించారు.
 
 అనంతరం గుంటూరు మార్కెట్‌యా ర్డు చైర్మన్‌గా కొనసాగుతూ 1989లో జరిగిన సాధారణ ఎన్నికల్లో సత్తెనపల్లి నియోజకవర్గం నుంచి కాంగ్రెస్ అభ్యర్థిగా పోటీచేసి గెలుపొందారు. ఆయన హయాంలో జిల్లా పరిషత్‌లోనూ, సత్తెనపల్లి నియోజకవర్గంలోనూ ఎన్నో అభివృద్ధి పనులకు శ్రీకారం చుట్టి  ప్రజల మన్ననలుపొందారు. 2012 జనవరి 30వ తేదీన స్వగ్రామమైన చిరుమామిళ్ళలో తుదిశ్వాస విడిచారు.
  
 విగ్రహావిష్కరణకు జగన్ రాక
 దొడ్డా బాలకోటిరెడ్డి నాలుగవ వర్ధంతిని పురస్కరించుకొని గ్రామంలో ఆయన కాంస్య విగ్రహాన్ని ఏర్పాటు చేశారు. వైఎస్సార్ కాంగ్రెస్ పార్టీ అధినేత వైఎస్ జగన్‌మోహనరెడ్డి  ఈ విగ్రహాన్ని ఆవిష్కరించనున్నారు. 2013 మార్చి 12న మహాప్రస్థానం కార్యక్రమంలో భాగంగా వైఎస్ జగన్ సోదరి షర్మిల ఈ ప్రాంతంలో పర్యటించారు. మాజీ ముఖ్యమంత్రి కాసు బ్రహ్మానందరెడ్డి, దివంగత ముఖ్యమంత్రి వైఎస్ రాజశేఖరరెడ్డి విగ్రహాలను ఆవిష్కరించారు.
 
 అప్పట్లో దొడ్డా బాలకోటిరెడ్డి విగ్రహాన్ని వైఎస్ జగన్‌మోహనరెడ్డి చేతుల మీదుగా ఆవిష్కరించాలన్న గ్రామస్తుల కోరిక ఈ నెల 11వ తేదీన నెరవేరనుంది. మధ్యాహ్నం 3 గంటలకు విగ్రహాన్ని ఆవిష్కరించేందుకు ఏర్పాట్లు సిద్ధం చేశారు. జగన్‌మోహన్‌రెడ్డికి ఘనస్వాగతం పలికేందుకు పార్టీ నేతలతో పాటు గ్రామస్తులు భారీ ఏర్పాట్లు చేస్తున్నారు.