సిడ్నీ : తెలంగాణ సంస్కృతి, సంప్రదాయాలకు అద్దం పట్టే బతుకమ్మ ఉత్సవాలు కేవలం తెలంగాణ రాష్ట్రానికే పరిమితం కాకుండా.. ఖండాంతరాలకు వ్యాపించాయి. వాడవాడలా బతుకమ్మ వేడుకలు అంబరాన్ని అంటుతున్నాయి. 'ఆస్ట్రేలియా తెలంగాణ స్టేట్‌ అసోసియేషన్‌' అధ్వర్యంలో సిడ్నీలో బతుకమ్మ వేడుకలను ఘనంగా నిర్వహించారు. ఆస్ట్రేలియాలోని తెలుగువారందరూ వేడుకలలో పాల్గొని ఆటపాటలతో సందడి చేశారు. మహిళలు పెద్ద ఎత్తున తెలంగాణ సంప్రదాయ పద్ధతిలో హాజరై ఆటపాటలతో అలరించారు. ఈ సందర్భంగా సిడ్నీలో తెలంగాణ వాతావరణం అలుముకుంది. ఈ వేడుకల్లో విజయనగరం జిల్లా గజపతినగరం ఎమ్మెల్యే బొత్స అప్పలనర్సయ్య పాల్గొని శుభాకాంక్షలు తెలియజేశారు. ఆట్సా ప్రెసిడెంట్‌ రాజ్‌ బద్దం బతుకమ్మ వేడుకల్లో పాల్గొన్న వారందరికీ కృతజ్ఞతలు తెలియజేశారు.

సిడ్నీలో బతుకమ్మ వేడుకలు ఘనంగా జరిగాయి. ఆస్ట్రేలియన్‌ తెలంగాణ స్టేట్‌ అసోసియేషన్‌(ఏటీఎస్‌ఏ) ఆధ్వర్యంలో తెలంగాణ జాగృతి సహకారంతో ఈ కార్యక్రమాన్ని నిర్వహించారు. ఆస్ట్రేలియాలోనే అత్యంత వైభవంగా జరిగిన ఈ వేడుకల్లో 1500 మందికి పైగా ప్రవాసులు పాల్గొన్నారు. నార్త్‌ మీడ్‌ హైస్కూల్‌లో జరిగిన ఈ కార్యక్రమంలో మహిళలు, యువతులు కోలాటం, బతుకమ్మ ఆటా, పాటలతో ప్రాంగణాన్ని హోరెత్తించారు. అనంతరం అక్కడికి కిలో మీటరు దూరంలో ఉన్న పరమట్టా నది దగ్గర పూజా కార్యక్రమాలు నిర్వహించి, మరోసారి బతుకమ్మ ఆడి నిమజ్జం చేశారు.   


 
 సిడ్నీ: ఆస్ట్రేలియాలో తెలంగాణ రాష్ట్ర ఆవిర్భావ సంబురాలు ఘనంగా జరిగాయి. ఆస్ట్రేలియన్ తెలంగాణ స్టేట్ అసోసియేషన్-ఏటీఎస్ఏ(ఒకప్పుడు ఆస్ట్రేలియా తెలంగాణ ఫోరం) ఆధ్వర్యంలో ఈ వేడుక నిర్వహించారు. ఏటీఎఎస్ ప్రారంభమై పదేళ్లు కూడా పూర్తి చేసుకున్న నేపథ్యంలో కొత్త రాష్ట్ర సంబురాలు గొప్పగా జరిగాయి. మొత్తం పదకొండు వందలమందికి పైగా ఈ కార్యక్రమంలో పాల్గొన్నారు. ఈ సందర్భంగా ఏటీఎఎస్ తన ప్రస్థానం గురించి వివరించింది. 2006లో 120మందితో తొలిబతుకమ్మ ఆడటం ద్వారా ఈ సంస్థ ప్రారంభమై ప్రత్యేక రాష్ట్ర సాధన దిశగా పనిచేసిందని పేర్కొంది.
 
 ప్రస్తుతం తెలంగాణ సంస్కృతి, సాంప్రదాయాలు, అభివృద్ధిని విస్తరించడమే ధ్యేయంగా పనిచేయనున్నట్లు తెలిపింది. ఈ కార్యక్రమానికి టీ జాక్ చైర్మన్ ప్రొఫెసర్ కోదండరామ్, ఎంపీ డాక్టర్ వినోద్, ఆస్ట్రేలియా ఎంపీ జూలీ ఓవెన్స్, ఎన్ఎస్ డబ్ల్యూ మల్టీ కల్చరల్ సెక్రటరీ జనరల్ జియాఫ్ లీ తదితరులు హాజరయ్యారు. బంగారు తెలంగాణ దిశగా తాము చేస్తున్న కృషిని, భవిష్యత్ కార్యచరణను ప్రొఫెసర్ కోదండరామ్ వివరించారు. ఈ సందర్భంగా మిమిక్రీ ఆర్టిస్ట్ రమేశ్ తోపాటు పలు సాంస్కృతిక కార్యక్రమాలు అలరించాయి. కత్తి కార్తికా ఈ కార్యక్రమానికి ఆతిథ్యం వహించారు.