జైనథ్‌: రాష్ట్ర అటవీ, పర్యావరణ, బీసీ సంక్షేమ శాఖ మంత్రి జోగురామన్న సహకారంతో ఆదిలాబాద్‌ నియోజకవర్గంలో వేల కోట్లతో అభివృద్ధి పనులు కొనసాగుతున్నాయని ఏఎంసీ మాజీ చైర్మన్‌ తల్లెల చంద్రయ్య అన్నారు. బుధవారం మండల పరిషత్‌ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. ముఖ్యమంత్రి కేసీఆర్‌ ఆదిలాబాద్‌కు వచ్చిన సందర్భంగా నియోజకవర్గ అభివృద్ధికి రూ.250 కోట్లు మంజూరు చేయాలని మంత్రి జోగురామన్న కోరగా, స్పందించిన ముఖ్యమంత్రి నిధుల మంజూరుకు జీఓ జారీ చేశారన్నారు. ఈ నిధులతో గ్రామాల్లో మౌలిక వసతులైన సీసీ రోడ్లు, మురికి కాల్వలు, లింక్‌ రోడ్లు, గ్రావెల్‌ రోడ్లు, ఇతరత్ర అభివృద్ధి పనులు చేపట్టేందుకు అవకాశం ఏర్పడిందన్నారు. నిధులు విడుదల చేసినందుకు సీఎం కేసీఆర్, మంత్రి జోగు రామన్నకు ప్రత్యేక కృతజ్ఞతలు తెలిపారు. నియోజకవర్గంలో 51వేల ఎకరాలకు సాగునీరు అందించే కోరటా–చనాఖా బ్యారేజీ పనులు కూడా వేగంగా కొనసాగుతున్నా యని తెలిపారు. ఎన్నికల్లోగా సాగునీరు అందిం చడం జరుగుతుందన్నారు. ఇవే కాకుండా వందల కోట్లతో గ్రామాల్లో బీటీ రోడ్లు నిర్మించడం జరిగిందని పేర్కొన్నారు. 70 ఏళ్లుగా జరగని అభివృద్ధిని నాలుగేళ్లలో చేసి చూపించిన ఘనత మంత్రి జోగు రామన్నకే దక్కుతుందన్నారు. ప్రజలంతా అభివృద్ధికి పట్టం కట్టి రానున్న అన్నిఎన్నికల్లో టీఆర్‌ఎస్‌ పార్టీనే భారీ మెజార్టీతో గెలిపించాలని ఆయన కోరారు. సమావేశంలో ఐటీడీఏ డైరెక్టర్‌ పెందూర్‌ దేవన్న, జైనథ్‌ ఏఎంసీ వైస్‌ చైర్మన్‌ ఎల్టీ భూమారెడ్డి, ఎంపీటీసీల సంఘం మండల గౌరవ అధ్యక్షుడు మద్దెల ఊశన్న, ఆలయ కమిటీ వైస్‌ చైర్మన్‌ లక్ష్మన్న, టీఆర్‌ఎస్‌ మండల అధ్యక్షుడు తుమ్మల వెంకట్‌రెడ్డి, నాయకులు అల్లకొండ అశోక్, తమ్మడి భగవాండ్లు, కోల భోజన్న, భట్టు ఊశన్న, వెంకట్‌రెడ్డి, కిష్టారెడ్డి తదితరులు పాల్గొన్నారు.


 ► మండల పార్టీ అధ్యక్షుడు కర్రోతు సత్యనారాయణ
 
 భోగాపురం: తనకు ఏఎంసీ చైర్మన్‌ పదవి ఇస్తానని ఎంఎల్‌ఏ పతివాడ నారాయణస్వామి నాయుడు మాటిచ్చి తప్పారని తెలుగుదేశం పార్టీ మండల అధ్యక్షుడు కర్రోతు సత్యనారాయణ ఆరోపించారు. స్థానిక పార్టీ కార్యాలయంలో శుక్రవారం ఆయన విలేకర్ల సమావేశంలో మాట్లాడుతూ 1978లో జనతాపార్టీలో పతివాడ ఉన్నప్పటినుండి ఆయన వెనుక ఉంటూ భోగాపురం మండలంలో పార్టీని బలోపేతం చేసేవిధంగా పనిచేశానని అన్నారు. రెండేళ్ళ క్రితం ఏఎంసీ చైర్మన్‌ పదవి కావాలని ఎంఎల్‌ఏని కోరినప్పుడు ఆయన నేను వేరొకరికి మాటివ్వడం జరిగిందని రెండేళ్ళ తరువాత ఆ పదవిని నాకు ఇస్తానని హామీ ఇవ్వడం జరిగిందని అన్నారు.
 
 అయితే ఆయన అన్నమాట ప్రకారం ఏప్రిల్, 22, 2017న నన్ను ఏఎంసీ చైర్మన్‌గా ప్రతిపాదిస్తూ అప్పటి మంత్రులు ప్రత్తిపాటి పుల్లారావు, కళావెంకటరావు, లోకేష్‌బాబుకి, గుంటూరు పార్టీ కార్యాలయానికి లేఖ ద్వారా తెలియజేయడం జరిగిందని అన్నారు. అయితే గతంలో ఏడున్నర సంవత్సరాలు ఏఎంసి వైస్‌చైర్మన్‌గా, ప్రస్తుతం రెండేళ్ళు చైర్మన్‌ పనిచేసిన వ్యక్తినే మళ్ళీ చైర్మన్‌గా నియమిస్తున్నట్లు నేడు ఒక పత్రిక (సాక్షిలో కాదు)లో ఎంఎల్‌ఏ ప్రకటించారని వెలువడిందని ఇది అన్యాయం అని అణ్నారు. గతంలో ఎంఎల్‌ఏ పతివాడ ఎవరెవరికైతే తనను సిఫార్సు చేస్తూ లేఖరు వ్రాసారో వారందరిని కలిసి తన గోడు చెప్పుకుంటానని, తనకు న్యాయం జరిగేవరకు పోరాడతానని అన్నారు. మండలంలో పార్టీ అభివృద్దికి కష్టపడి పనిచేసిన నాకు ఈ విధంగా మాటిచ్చి మోసం చేయడం అన్యాయం అని, ఇచ్చిన మాట నిలబెట్టుకోవాలని లేదంటే ఈ విషయాన్ని అధిష్టానం దృష్టికి తీసుకువెళ్తానని అన్నారు.