జెనీవా: ప్రపంచంలోనే అతి పొడవైన ప్రయాణికుల రైలు తమదేనంటూ స్విట్జర్లాండ్‌కు చెందిన రేషియన్‌ రైల్వే కంపెనీ ప్రకటించింది. 100 బోగీలతో 1.9 కిలోమీటర్ల పొడవైన ఈ రైలును ఆల్ఫ్స్‌ పర్వతాల గుండా అల్బులా/బెర్నినా మార్గంలో నుంచి ప్రీడా నుంచి బెర్గ్యున్‌ వరకు శనివారం విజయవంతంగా నడిపినట్లు తెలిపింది. సుమారు 25 కిలోమీటర్ల ప్రయాణానికి గంట సమయం పట్టిందని వివరించింది. పర్వతాల దిగువన మెలికలు తిరుగుతూ ఉండే 22 టన్నెళ్లు, 48 వంతెనల మీదుగా సాగే సుందరమైన ఈ మార్గాన్ని 2008లో యునెస్కో వారసత్వ జాబితాలో చేర్చిందని తెలిపింది. 175వ వార్షిక ఆవిర్భావ ఉత్సవాలు జరుపుకుంటున్న స్విస్‌ రైల్వేల ఇంజినీరింగ్‌ ప్రతిభను చాటేందుకే ఈ ప్రయత్నాన్ని చేపట్టినట్లు రేషియన్‌ రైల్వే డైరెక్టర్‌ రెనాటో ఫసియాటి చెప్పారు. ప్రయాణికుల నుంచి మంచి స్పందన లభించిందన్నారు.

ఫ్రాన్స్‌లోని ఆల్ఫ్స్‌ పర్వత శిఖరాల నుంచి ప్రవహించే హిమనీనదాల్లో ఇటీవల చిక్కని రక్తవర్ణపు చారలు జాలువారడం అక్కడి ప్రజలను, పరిశోధకులను షాక్‌కి గురిచేసింది. దీనిపై అధ్యయనం చేసిన శాస్త్రవేత్తల బృందం దాన్ని హిమనీనదం రక్తంగా పేరుపెట్టారు. వాతావరణ మార్పులను అర్థం చేసుకోవడంతో ఇది కీలక పాత్ర పోషిస్తుందని చెప్పారు. ప్రస్తుతం భూమి, వాతావరణం ప్రతిరోజూ సరికొత్త సవాళ్లను ఎదుర్కొంటున్న నేపథ్యంలో హిమనీనదం ప్రవాహంలో రక్తవర్ణపు చారలు ఎలా వచ్చాయా అనేదానిపై శాస్త్రవేత్తలు పరిశోధన ప్రారంభించారు. మంచుతో కప్పబడి ఉండే ఆల్ఫ్స్‌ పర్వతాల శిఖర భాగంలో పెరుగుతున్న ఒక రకమైన మైక్రో ఆల్గే వల్లే ఈ రక్తవర్ణపు చారలు ఏర్పడుతున్నాయని నిర్ధారించారు. ఈ మైక్రో ఆల్గే సాధారణంగా సముద్ర గర్భంలో పెరుగుతుంది. అలాంటిది సముద్ర మట్టానికి వేల అడుగుల ఎత్తులో ఉండే ఆల్ఫ్స్‌ పర్వత శిఖరాల్లో ఇది ఎలా నిక్షిప్తమయింది? అది ఎరుపు రంగులోకి ఎలా మారింది? అనేది శాస్త్రవేత్తలకు అంతుచిక్కడంలేదు. రానున్న రోజుల్లో వాతావరణంలో పెనుమార్పులకు ఇది సంకేతమని శాస్త్రవేత్తలు ఆందోళన చెందుతున్నారు.     – సాక్షి, సెంట్రల్‌ డెస్క్‌  చదవండి: బాబోయ్‌ కుళ్లిన శవం వాసన.. సెల్ఫీలకు క్యూ కట్టిన జనం

రోమ్‌: 2020 అంటేనే ప్రజల్లో భయం పుడుతోంది. ఎన్నో భయంకరమైన సంఘటనలు ఈ ఏడాదిలోనే చోటు చేసుకుంటున్నాయి. గతేడాది డిసెంబర్‌లో చైనాలో పుట్టిన కరోనా మహమ్మారి ప్రపంచమంతా కోరలు చాస్తున్న తరుణంలో 2020లో యుగాంతం అంటూ ఇటీవల పుకార్లు పుట్టుకొచ్చాయి. ఊహించని ఎన్నో భయంకర సంఘటనలతో ప్రజలు బిక్కుబిక్కుమంటున్నారు. ఈ తరుణంలో ఇటలీలోని ఆల్ప్స్‌ పర్వతాల్లో గులాబీ రంగులోకి మారిన మంచును చూసి అక్కడి ప్రజలు భయాందోళనకు గురవుతున్నారు. ఇది సహజంగా జరిగే ప్రక్రియ అని, ఎటువంటి ప్రమాదం లేదని శాస్త్రవేత్తలు అంటున్నారు. ‘వేగంగా మంచు కరగడం వల్ల ఇలాంటి మార్పులు చోటుచేసుకుంటాయి. మంచు ఆల్గేలు వేడిని గ్రహించి హిమనదిని త్వరగా కరిగిస్తాయి. వాతావరణంలో వేగంగా మార్పులు చోటుచేసుకుంటున్నాయని చెప్పడానికి గులాబి మంచు ఉదాహరణ’ అని ఇటలీ నేషనల్‌ రీసెర్చ్‌ కౌన్సిల్‌ శాస్త్రవేత్త బియాజియో డి మౌరో పేర్కొన్నారు. ‘సాధారణంగా మంచు సూర్యుని రేడియేషన్‌ 80 శాతానికి పైగా ఉన్నపుడు వాతావరంలో తిరిగి సాధారణ స్థితికి వస్తుంది. కానీ ఆల్గే మాత్రం మంచును డార్క్‌ చేయడంతో మంచు వేడెక్కి తొందరగా కరుగుతుంది. మంచు మరింత వేగంగా కరుగుతున్నప్పుడే ఇటువంటి ఆల్గేలు కనిపిస్తాయి. తద్వారా పొసోగావియా వద్ద 8,590 అడుగుల ఎత్తులో ఉన్న తెల్లటి మంచు ఇలా వివిధ రంగుల్లోకి మారుతుంది. ఇలాంటి సంఘటన ఇప్పటికే స్విట్జర్లాండ్‌లో చోటుచేసుకుంది. దీనిపై గతంలో అధ్యయనం చేశాం. ఆల్గే ప్రమాదకరమైనది కాదు. ఇది వసంత రుతువుకు, వేసవి కాలం మధ్య ధ్రువాల వద్ద సంభవించే సహజమైన మార్పు’ అని బియాజియో చెప్పుకొచ్చారు. మనుషులు చేసే తప్పిదాల వల్ల వాతావరణంలో మార్పులు చోటుచేసుకుంటున్నాయని, మంచు కరగడానికి సూర్యుడి వేడితో పాటు మంచుపై హైకర్‌తో పాటు స్కై లిఫ్టులు చేయడం కూడా ప్రధాన కారణమని డీ మౌరో అభిప్రాయపడ్డారు. మంచు గులాబీ రంగులోకి మారడంతో అక్కడి పర్యాటకులు ఆందోళన చెందుతున్నారు. ‘భూమి వేడెక్కడమనేది పెద్ద సమస్య.. అందులో చివరిది ఆల్గే’ అని ‘మనం కోలుకోలేని స్థితిలో ఉన్నాము. ఇక ఎప్పటికీ దీనిని నుంచి బయటపడలేము’, ‘మనం చేసినదే భూమి తిరిగి ఇస్తుంది’, ‘2020 ప్రత్యేకమైనది. ఎన్నో భయంకరమైన సంఘటనలు ఈ ఏడాదిలోనే చోటుచేసుకుంటున్నాయి’ అంటూ పర్యాటకులు ఆందోళన వ్యక్తం చేస్తున్నారు. 


 స్పెయిన్ నుంచి జర్మనీ వెళుతున్న ఎయిర్‌బస్ ఎ320
 మంచు పర్వతాల్లో ప్రమాదం.. అక్కడికి చేరుకోవటం చాలా కష్టం
 ఘటనాస్థలానికి హెలికాప్టర్ల ద్వారానే సహాయ బృందాల రవాణా
 {పమాదానికి కారణం తెలీదు.. ఎవరూ బతికే అవకాశం లేదు: ఫ్రాన్స్
  
 ఫ్రాన్స్‌లోని ఆల్ప్స్ పర్వతాల్లో ప్రమాదం 150 మంది మృతి
  
 పారిస్: ఫ్రాన్స్‌లో ఘోర విమాన ప్రమాదం సంభవించింది. జర్మనీకి చెందిన విమానం ఆల్ప్స్ పర్వత శ్రేణిలో కూలిపోయింది. విమానంలోని 144 మంది ప్రయాణికులు, ఆరుగురు సిబ్బందిసహా మొత్తం 150 మంది మృతి చెందారు. స్థానిక కాలమానం ప్రకారం మంగళవారం ఉదయం 10:30 - 11:00 గంటల మధ్య ఈ దుర్ఘటన జరిగింది. దట్టమైన మంచుతో నిండిన ఆల్ప్స్ పర్వతాల్లో కూలడంతో ప్రమాదం జరిగి కొన్ని గంటలు గడిచినా ఆ స్థలానికి సహాయక బృందాలేవీ చేరుకోలేక పోయాయి. ప్రమాద స్థలానికి ఫ్రాన్స్ హెలికాప్టర్‌ను పంపించగా.. లె ట్రోయిస్ ఎవెచెస్ అనే పర్వత శ్రేణిలో విమాన శకలాలను గుర్తించింది. ఆ పర్వతాలు సముద్రమట్టానికి 1,400 మీటర్ల ఎత్తులో ఉన్న ఆ ప్రదేశానికి చేరుకోవటం చాలా కష్టమని, ఫ్రాన్స్ అధ్యక్షుడు పేర్కొన్నారు. మృతుల కుటుంబాలన్నిటికీ తమ సానుభూతి తెలియజేశారు. జర్మనీ చాన్సలర్ మెర్కెల్‌తో ఆయన ఫోన్‌లో మాట్లాడి.. ఆ దేశానికి సంఘీభావం తెలిపారు. ఫ్రాన్స్‌లో జర్మనీ విమానం కుప్పకూలటం అత్యంత దురదృష్టకర సంఘటన అని పేర్కొంటూ ప్రధాని మోదీ ట్వీటర్‌లో విచారం వ్యక్తంచేశారు.
  
 ఆపద సంకేతాలేవీ పంపలేదు...
 
 ప్రమాదానికి గురైన విమానం ఎయిర్‌బస్ ఎ320 విమానం. 1990 నుంచి వినియోగంలో ఉంది. జర్మన్ విమానయాన సంస్థ లుఫ్తాన్సాకు అనుబంధ సంస్థ అయిన జర్మన్‌వింగ్స్ నిర్వహిస్తున్న విమానమిది. స్పెయిన్ దేశంలోని తీర నగరం బార్సెలోనా నుంచి బయల్దేరిన ఈ విమానం జర్మన్ దేశంలోని డ్యుసెల్‌డార్ఫ్ నగరానికి వెళ్లాల్సి ఉంది. మధ్యలో ఫ్రాన్స్‌లోని ఆల్ప్స్ పర్వతాల మధ్య గల బార్సెలోనెటె స్కీ రిసార్ట్ సమీపంలో కూలింది. ఆ విమానంతో సంబంధాలు తెగిపోయాయని.. ఉదయం 10:30 గంటలకు విమానం ప్రమాదంలో చిక్కుకుందని పౌర విమానయాన అధికారులు ప్రకటించారు. విమానం కూలిపోవటానికి ముందు అది ప్రయాణిస్తున్న ఎత్తు 8 నిమిషాల్లోనే 25 వేల అడుగులు పడిపో యిందని రాడార్  చెప్తోంది.
 
 హెలికాప్టర్లలో వెళ్లడమే ఏకైక మార్గం...
 
 ప్రమాద వార్త తెలిసిన వెంటనే సంక్షోభంపై మంత్రివర్గ బృందాన్ని ఫ్రాన్స్ ప్రధాని వాల్స్ సమావేశపరిచారు. భారీ సహాయ ప్రయత్నాలను ప్రారంభించామని.. కానీ విమానం కూలిన మారుమూల ప్రాంతాన్ని చేరుకోవటంలో పలు సవాళ్లు ఉంటాయని ఆయన తెలిపారు. మంచుతో నిండి ఉన్న ఆ ప్రాంతానికి భూమార్గంలో వాహనాలు చేరుకోవటం సాధ్యం కాదని.. అయితే హెలికాప్టర్లతో ఆకాశమార్గం ద్వారా చేరుకోవచ్చని అలాన్ పేర్కొన్నారు. అంతర్గత శాఖ మంత్రి బెర్నార్డ్ కాజెనూ తక్షణమే ప్రమాదస్థలానికి బయల్దేరారు. స్పెయిన్ పౌరులు పలువురు విమాన ప్రమాదంలో మరణించినట్లు తెలియడంతో.. స్పెయిన్ రాజు ఆరవ ఫెలిపె తన ఫ్రాన్స్ పర్యటనను అర్థంతరంగా ముగించుకున్నారు. ఫ్రాన్స్‌లో ప్రధానమైన ఎయిర్ ట్రాఫిక్ కంట్రోలర్ యూనియన్ బుధవారం నుంచి శుక్రవారం వరకు తలపెట్టిన సమ్మెను.. జర్మన్ విమాన ప్రమాదం నేపథ్యంలో విరమించుకుంది.
 
 నాలుగు దశాబ్దాల్లో ఘోర ప్రమాదం...
 
 నాలుగు దశాబ్దాల కాలంలో ఫ్రాన్స్ ప్రధాన భూభాగంలో ఇదే అతి ఘోరమైన విమాన ప్రమాదం. ఫ్రాన్స్ ప్రధాన భూభాగంలో 1974లో టర్కీ విమానం కూలిపోయిన దుర్ఘటనలో 346 మంది చనిపోయారు. ఆ తర్వాత 1981లో ప్రధాన భూభాగంపై కాకుండా.. కోర్సికా దీవిలో మరో విమానం కూలిపోయింది. ఆ ప్రమాదంలో విమానంలోని మొత్తం 180 మంది చనిపోయారు. కాగా, జర్మన్‌వింగ్స్ విమానయాన సంస్థ చరిత్రలో ఇప్పటివరకూ ఘోరమైన ప్రమాదమేదీ నమోదు కాలేదు. ప్రమాదానికి సంబంధించి తక్షణ వివరాలేవీ తెలియలేదని లుఫ్తాన్సా ప్రధాన అధికారి కార్‌స్టెన్ సోర్ ట్విటర్‌లో పేర్కొన్నారు. కాగా, ప్రమాదం జరిగిన విమానానికి సంబంధించిన బ్లాక్‌బాక్స్ దొరికిందని అధికారులు తెలిపారు.  
  
 కారణాలు తెలియదు
 
 విమానం కూలినపుడు భారీ శబ్దం వినిపించిందని.. ఆ సమయంలో ఆ ప్రాంతంలో స్కీయింగ్ చేస్తున్న ప్రత్యక్ష సాక్షి ఒకరు ఫ్రెంచ్ టెలివిజన్ చానల్‌తో చెప్పారు. ‘‘విమానం కూలిపోవడానికి కారణాలేమిటనేది మాకు తెలియదు. కూలిన పరిస్థితులను బట్టి విమానంలోని 150 మందీ చనిపోయినట్లు అక్కడికి వెళ్లిన సిబ్బంది నిర్ధారించారు’’ అని ఫ్రాన్స్ ప్రధానమంత్రి మాన్యుయెల్ వాల్స్ మీడియాతో పేర్కొన్నారు. ఏం జరిగిందో తెలుసుకోవడానికి, బాధిత కుటుంబాలకు సా యం చేయడానికి కృషి చేస్తున్నామని చెప్పారు. మరణించిన వారిలో 67 మంది జర్మన్‌లు, 45మంది స్పెయిన్ పౌరులు ఉన్నారు.