breaking news
All India Services
-
శత వసంతాల యూపీఎస్సీ
సాక్షి, న్యూఢిల్లీ: అఖిలభారత సర్వీసుల్లో అత్యుత్తమంగా సేవలందించగల సమర్థుల ఎంపికలో అపార అనుభవం గడించిన యూపీఎస్సీ నేటితో వందేళ్ల ప్రస్థానాన్ని పూర్తిచేసుకుంటోంది. దేశ అత్యున్నత ప్రభుత్వ ఉద్యోగ నియామక సంస్థ అయిన యూనియన్ పబ్లిక్ సర్వీస్ కమిషన్(యూపీఎస్సీ) ఈ వందేళ్ల ప్రయాణంలో ఎన్నో మైలురాళ్లను దాటుకొని వచ్చి ఎప్పటికప్పుడు అత్యంత పకడ్బందీగా ఎంపిక పరీక్షలు నిర్వహిస్తూ పబ్లిక్సర్వీస్ ఎగ్జామ్ వ్యవస్థలో తనదైన ముద్రవేసుకుంది. 2026 అక్టోబర్ ఒకటో తేదీతో యూపీఎస్సీ సంస్థ ఏర్పడి వందేళ్లు పూర్తయింది. 1926 అక్టోబర్ 1న భారత తొలి పబ్లిక్ సర్వీస్ కమిషన్గా ప్రారంభమైన ఈ సంస్థ కాలక్రమంలో ఎన్నో మార్పులు పొంది నేడు స్వతంత్ర రాజ్యాంగబద్ధ సంస్థగా ఎదిగింది. లండన్ పరీక్ష నుంచి భారతీయుల పోరాటం దాకా.. ప్రభుత్వ ఉద్యోగాల్లో నియామకాలు ప్రతిభ ఆధారంగా జరగాలనే విధానం 1855లో ఐసీఎస్ పరీక్షతో ప్రారంభమైంది. ఆ పరీక్ష లండన్లో అందులోనూ ఇంగ్లిష్ మాధ్యమంలోనే బ్రిటన్ పాలకులు చేపట్టేవారు. 1862లో సత్యేంద్రనాథ్ ఠాగూర్ ఇంగ్లండ్ వెళ్లి పరీక్ష రాసి 1863లో ఉత్తీర్ణులై తొలి భారతీయ ఐసీఎస్ అధికారిగా నిలిచారు. 1919 నాటికి 1,255 మంది ఐసీఎస్ అధికారుల్లో భారతీయులు కేవలం 78 మందే ఉన్నారు. జాతీయవాద ఉద్యమాల ఒత్తిడితో 1922లో ఐసీఎస్ పరీక్షను తొలిసారిగా భారత్లో చేపట్టారు. ఈ పరీక్షకు అలహాబాద్ వేదికైంది. 1924లో లీ కమిషన్ సిఫార్సుల అనంతరం 1926లో పబ్లిక్ సర్వీస్ కమిషన్ ఏర్పడింది. సర్ రాస్ బార్కర్ తొలి చైర్మన్గా వ్యవహరించారు. రాజ్యాంగంలో ప్రత్యేక స్థానం 1949 ఆగస్టు 22న డాక్టర్ బీఆర్ అంబేడ్కర్ రాజ్యాంగ సభలో యూనియన్, రాష్ట్ర పబ్లిక్ సర్వీస్ కమిషన్లకు సంబంధించిన నిబంధనలను ప్రవేశపెట్టారు. ఇవి రాజ్యాంగంలోని 315తోపాటు 323వ అధికరణంలో భాగమయ్యాయి. నియామకాల్లో నిష్పాక్షికత, బంధుప్రీతి, పక్షపాతానికి తావులేకుండా ఉండేందుకు కమిషన్ స్వతంత్రత కీలకమని భారత తొలి రాష్ట్రపతి బాబూ రాజేంద్రప్రసాద్ పేర్కొన్నారు. ప్రస్తుతం సివిల్ సర్వీసెస్ ఎగ్జామ్తోపాటు ఇండియన్ ఫారెస్ట్ సర్వీస్ ఎగ్జామ్, ఇంజినీరింగ్ సర్వీస్ ఎగ్జామ్, కంబైన్డ్ డిఫెన్స్ సర్వీస్ ఎగ్జామ్, నేషనల్ డిఫెన్స్ అకాడమీ,నేవల్ అకాడమీ, కంబైన్డ్ మెడికల్ సర్వీసెస్ ఎగ్జామ్, ఇండియన్ ఎకనమిక్ సర్వీస్/ఇండియన్ స్టాటిస్టికల్ సర్వీస్, కంబైన్డ్ జియోసైంటిస్ట్ ఎగ్జామ్, కేంద్రసాయుధబలగాల నియామక పరీక్ష, సీఐఎస్ఎఫ్ అసిస్టెంట్ కమాండెంట్, స్టెనోగ్రాఫర్ ఇలా డజనుకుపైగా అత్యంత కీలకమైన పరీక్షలను యూపీఎస్సీ నిర్వహిస్తోంది. వందేళ్లలో భారీగా విస్తరించిన ప్రస్థానం1926లో భారత పబ్లిక్ సర్వీస్ కమిషన్గా ప్రారంభమైన ఈ సంస్థ 1937 ఏప్రిల్ 1న ఫెడరల్ పబ్లిక్ సర్వీస్ కమిషన్గా రూపాంతరం చెందింది. 1938లో పలు ప్రభుత్వ సేవలకు కలిపి పోటీ పరీక్షల నిర్వహణ ప్రారంభమైంది. 1940లో తొలిసారిగా ఐసీఎస్లో భారతీయ అధికారుల సంఖ్య యూరోపియన్లను మించిపోయింది. 1947లో స్వాతంత్య్రం అనంతరం హెచ్.కె. కృపలానీ తొలి భారతీయ చైర్మన్గా బాధ్యతలు చేపట్టారు. అదే ఏడాది డిసెంబరులో స్వాతం్రత్యానంతర తొలి పరీక్ష నిర్వహించారు. ఐసీఎస్ స్థానంలో ఐఏఎస్ వ్యవస్థకు బీజం వేశారు. 1948లో తొలి బ్యాచ్ ఇండియన్ ఫారిన్ సర్వీస్ అధికారులను సంయుక్త పరీక్ష ద్వారా నియమించారు. 1950 జనవరి 26న రాజ్యాంగం అమల్లోకి వచ్చిన రోజున ఫెడరల్ పబ్లిక్ సర్వీస్ కమిషన్ పేరును ప్రస్తుతమున్న యూపీఎస్సీగా మార్చారు. అదే సమయంలో ఆర్.ఎన్. బెనర్జీ చైర్మన్గా బాధ్యతలు చేపట్టారు. 1950–51లో అఖిలభారత సర్వీసుల కోసం తొలిసారిగా నియామక పరీక్షలు నిర్వహించారు. అప్పుడే 29 మంది ఐఏఎస్కు, 31 మంది ఐపీఎస్కు ఎంపికయ్యారు. 1951లో ఆల్ ఇండియా సర్వీసెస్ చట్టం అమల్లోకి వచ్చింది. 1966లో ఇండియన్ ఫారెస్ట్ సర్వీస్ మూడో ఆల్ ఇండియా సర్వీస్గా ఏర్పడి, 1967లో తొలి ఎంపికలు జరిగాయి. 2000లో ఆన్లైన్ రిక్రూట్మెంట్ అప్లికేషన్ వ్యవస్థ ప్రారంభమైంది. 2013లో మెయిన్స్లో నాలుగు జనరల్ స్టడీస్ పేపర్లు, ఎథిక్స్, ఇంటిగ్రిటీ, ఆప్టిట్యూడ్ వంటి మార్పులు వచ్చాయి. 2021లో తొలిసారి మహిళలకు నేషనల్ డిఫెన్స్ అకాడమీ,నేవల్ అకాడమీ పరీక్ష రాసేందుకు అవకాశం కల్పించారు. మహిళలు, ఎస్సీ, ఎస్టీ, దివ్యాంగులు.. 1950లో ఎనిమిది పరీక్షా కేంద్రాల్లో ఎగ్జామ్లు జరిగేవి. కాలక్రమేణా లక్షలాది మంది అభ్యర్థులు పోటీపడుతుండటంతో ప్రస్తుతం ఈ పరీక్షా కేంద్రాల సంఖ్య 86కు పెరిగింది. 1952లో సివిల్ సర్వీసెస్లో 83 మంది ఎంపికయితే వారిలో మహిళలు ముగ్గురే. అదే గత ఏడాది 958 మంది ఎంపికైతే అందులో 299 మంది మహిళలు ఉండటం విశేషం. 1955 నుంచిచూస్తే పరీక్షలను విజయవంతంగా పూర్తిచేసిన ఎస్సీ అభ్యర్థుల సంఖ్య గణనీయంగా పెరిగింది. అప్పట్లో ఇద్దరే ఎస్టీ అభ్యర్థులు పోస్ట్లు సాధించగా తాజాగా ఆ సంఖ్య 73కు పెరిగింది. 2025 సివిల్ సర్వీసెస్లో మహిళలు 31.2 శాతంగా ఉన్నారు. టాప్ 25 ర్యాంకుల్లో 11 స్థానాలను సాధించడం విశేషం. దివ్యాంగ అభ్యర్థులకు స్క్రైబ్ సదుపాయంతోపాటు అదనపు సమయం కేటాయింపు, నచ్చిన పరీక్షా కేంద్రంలో పరీక్ష రాసే వెసులుబాటు కల్పిస్తున్నారు. కొత్త సంస్కరణల బాటలో.. 2026 సివిల్ సర్వీసెస్ ప్రిలిమ్స్లో యూపీఎస్సీ కృత్రిమమేధను సైతం ఉపయోగించింది. సుమారు 5.50 లక్షల మంది అభ్యర్థులకు ఏఐ ఆధారిత ముఖ గుర్తింపు చేపట్టారు. 15 ఏళ్ల అభ్యర్థుల డేటాను పరిశీలించి తప్పుడు సమాచారంతో అదనపు ప్రయత్నాలు పొందాలని చూసిన 569 దరఖాస్తులను తిరస్కరించారు. 2025లో యూనివర్సల్ రిజి్రస్టేషన్ నంబర్, ర్యాండమైజ్డ్ ఇంటర్వ్యూ బోర్డులు ప్రవేశపెట్టారు. 2026లో కొత్త పరీక్షా కేంద్రాలు, ప్రొవిజనల్ ఆన్సర్ కీ, ఆన్లైన్ డీపీసీ వ్యవస్థ, సైబర్ భద్రత చర్యలు చేపట్టారు. ప్రస్తుతం డాక్టర్ అజయ్కుమార్ చైర్మన్గా ఉన్నారు. యూపీఎస్సీలో ముగ్గురు మహిళలు సహా ఎనిమిది మంది సభ్యులు ఉన్నారు. శతాబ్ద కాలంలో పరీక్షల నిర్వహణ విధానంలో వస్తున్న మార్పులకు అనుగుణంగా ఎగ్జామ్లను నిర్వహిస్తూ ప్రతిభ, నిష్పాక్షికత, సమాన అవకాశాలే తమ ప్రాథమిక సూత్రాలుగా సంస్థ ముందుకు సాగుతోందని యూపీఎస్సీ ఒక ప్రకటనలో పేర్కొంది. -
సివిల్ సర్వీస్ క్యాడర్కు... ఇకపై నాలుగు జోన్లు
న్యూఢిల్లీ: ఆలిండియా సర్వీసులైన ఐఏఎస్, ఐపీఎస్, ఫారెస్ట్ సర్వీస్ ఉద్యోగుల కేడర్ కేటాయింపులు తదితర నియమ నిబంధనల్లో కేంద్రం కీలక మార్పులు చేసింది. ఇందుకోసం రాష్ట్రాలు, కేంద్రపాలిత ప్రాంతాలను ఇప్పటిదాకా ఐదు జోన్లుగా విభజించగా ఇప్పుడు ఆ సంఖ్యను నాలుగుకు తగ్గించింది. కేంద్ర సిబ్బంది వ్యవహారాల శాఖ ఒక ప్రకటనలో ఈ మేరకు పేర్కొంది. గ్రూప్ 1లో అరుణాచల్ప్రదేశ్, గోవా, మిజోరం, కేంద్రపాలిత ప్రాంతాలు, ఏపీ, అస్సాం–మేఘాలయ, బిహార్, ఛత్తీస్గఢ్; గ్రూప్ 2లో గుజరాత్, హరియాణా, హిమాచల్ప్రదేశ్, జార్ఖండ్, కర్నాటక, కేరళ, మధ్యప్రదేశ్; గ్రూప్ 3లో మహారాష్ట్ర, మణిపూర్, నాగాలాండ్, ఒరిస్సా, పంజాబ్, రాజస్తాన్, సిక్కిం, తమిళనాడు; గ్రూప్ 4లో తెలంగాణ, త్రిపుర, ఉత్తరాఖండ్, ఉత్తరప్రదేశ్, పశ్చిమబెంగాల్ను అక్షరక్రమంలో చేర్చారు. ప్రతి రాష్ట్రం తన పరిధిలో ఈ సర్వీసుల తాలూకు ఖాళీలను ఏటా జనవరి 31 నాటికి కేంద్రానికి విధిగా నివేదించాల్సి ఉంటుంది. వాటి ఆధారంగా ఆ ఏడాది భర్తీ చేయబోయే మొత్తం ఖాళీల సంఖ్యను కేంద్రం నిర్ధారిస్తుంది. అలాగే అధికారులకు హోం కేడర్ కేటాయింపు తదితర నిబంధనల్లో కూడా స్వల్ప మార్పుచేర్పులు చేశారు. -
హైకోర్టు తీర్పుతో తేలనున్న తెలంగాణ డీజీపీ భవితవ్యం.. ఏపీకి వెళ్లాల్సిందేనా?
సాక్షి, హైదరాబాద్: రాష్ట్ర డీజీపీగా అంజనీకుమార్ కొనసాగుతారా? లేక ఏపీకి వెళ్లాల్సి వస్తుందా అనేది నేడు తేలిపోనుంది. 2014లో ఉమ్మడి ఏపీ విభజన నేపథ్యంలో కేంద్రం నియమించిన ప్రత్యూ ష్ సిన్హా కమిటీ నివేదిక ప్రకారం ఆలిండియా సర్వీస్ ఉద్యోగుల విభజనలో భాగంగా అంజనీకుమార్ను ఏపీకి కేటాయించారు. అయితే కేంద్ర పరిపాలన ట్రిబ్యునల్(క్యాట్)ను ఆశ్రయించిన అంజనీకుమార్ తెలంగాణలో విధులు నిర్వహించేలా ఉత్తర్వులు పొందారు. గత నెలలో డీజీపీ మహేందర్రెడ్డి పదవీ విరమణ చేయడంతో ప్రభుత్వం ఆ బాధ్యతలను అంజనీకుమార్కు అప్పగించింది. బాధ్యతలు చేపట్టి ఇంకా నెలైనా పూర్తికాకముందే కేడర్ కేటాయింపులకు సంబంధించి తీర్పు రానుంది. రాష్ట్ర ప్రభుత్వ ప్రధాన కార్యదర్శిగా సేవలందించిన సోమేశ్ కుమార్కు ఈనెల 10న హైకోర్టు షాక్ ఇచ్చింది. రాష్ట్ర విభజన సమయంలో ఆయనను ఆంధ్రప్రదేశ్ కేడర్కు కేటాయించినందున అక్కడే వెళ్లి విధులు నిర్వహించాలని తేల్చిచెప్పింది. దీంతో ఆయన సీఎస్ విధులకు రాజీనామా చేసి, ఏపీకి వెళ్లి రిపోర్టు చేశారు. ఆయన ఏపీలో బాధ్యతలు చేపడ తారా? లేదా? అన్నది ప్రశ్నార్థకంగానే ఉంది. ఈ నేపథ్యంలో నేడు వెలువడనున్న తీర్పు డీజీపీకి అనుకూలమా.. ప్రతికూలమా? అన్నది సందిగ్ధంగా మారింది. సోమేశ్లానే తీర్పు వెలువడితే అంజనీకుమార్ కూడా ఏపీకి వెళ్లాల్సి వస్తుంది. ఇదే జరిగితే ఒక రాష్ట్రంలో కోర్టు తీర్పుల కారణంగా ఒకే నెలలో సీఎస్, డీజీపీలు ఇతర రాష్ట్రాలకు వెళ్లాల్సి రావడం దేశంలో ఇదే తొలిసారి అవుతుంది. వీరిద్దరూ బిహార్ రాష్ట్రానికి చెందినవారే కావడం గమనార్హం. అంజనీకుమార్తోపాటు మరికొందరు ఆలిండియా కేడర్ సర్వీస్ అధికారులు కూడా క్యాట్ అనుమతి పొంది తెలంగాణలో పనిచేస్తున్నారు. వీరందరికీ సంబంధించి కేంద్రం దాఖలు చేసిన పిటిషన్లపై హైకోర్టులో వాదనలు పూర్తయ్యాయి. నేటి తీర్పుతో డీజీపీ అంజనికుమార్ సహా 12 మంది అధికారుల భవితవ్యం కూడా తేలిపోనుంది. -
భారీగా ఐఏఎస్, ఐపీఎస్ ప్రమోషన్లు..!
సాక్షి, హైదరాబాద్ : భారీ ఎత్తున ఐఏఎస్, ఐపీఎస్లకు పదోన్నతులు కల్పిస్తూ తెలంగాణ సర్కార్ నిర్ణయం తీసుకుంది. సార్వత్రిక ఎన్నికలు కొనసాగుతుండటంతో ఈ మేరకు కేంద్ర ఎన్నికల సంఘం అనుమతి తీసుకుంది. 49 మంది ఆలిండియా సర్వీసెస్ అధికారులకు ప్రమోషన్లు ఇస్తూ రాష్ట్ర ప్రభుత్వం 15 జీవోలు జారీ చేసింది. 26 ఐఏఎస్లకు పదోన్నతి కల్పించిన ప్రభుత్వం వారిలో ముగ్గురికి ప్రత్యేక ప్రధాన కార్యదర్శులుగా ప్రమోషన్ ఇచ్చింది. ఒకరికి ముఖ్య కార్యదర్శి, నలుగురికి కార్యదర్శి, ఆరుగురికి అదనపు కార్యదర్శులుగా పదోన్నతులు ఇచ్చారు. ఐదుగురు ఐఏఎస్లకు సంయుక్త కార్యదర్శిగా, మరో నలుగురికి డిప్యూటీ సెక్రెటరీలుగా పదోన్నతులు కల్పిస్తూ ప్రభుత్వం ఉత్తర్వులు ఇచ్చింది. ఇక కేంద్ర సర్వీసుల్లో ఉన్న మరో ముగ్గురు ఐఏఎస్లకు ప్రత్యేక ప్రధాన కార్యదర్శులుగా పదోన్నతి కల్పించింది. 23 మంది ఐపీఎస్లకు ప్రమోషన్ ఇచ్చిన సర్కార్.. వారిలో ఐదుగురికి అదనపు డీజీలుగా, నలుగురికి ఐజి, ఏడుగురికి డీఐజీ, ఆరుగురికి సీనియర్ స్కేల్ అధికారులుగా పదోన్నతులు కల్పిస్తూ ఉత్తర్వులు జారీ చేసింది. కేంద్ర సర్వీసుల్లో ఉన్న మరొక ఐపీఎస్ అధికారికి కూడా ఐజీగా పదోన్నతి కల్పిస్తూ ఉత్తర్వులిచ్చింది. -
కలెక్టర్గా ప్రియదర్శిని
సాక్షి ప్రతినిధి, ఆదిలాబాద్ : కలెక్టర్ ఎం.జగన్మోహన్ బదిలీ అయ్యారు. ఆయన స్థానంలో మహబూబ్నగర్ కలెక్టర్గా పనిచేస్తున్న జీడీ ప్రియదర్శినిని నియమిస్తూ ప్రభుత్వం ఆదివారం రాత్రి ఉత్తర్వులు జారీ చేసింది. ఇటీవలే ఏఐఎస్ (అఖిల భారత సర్వీసుల) అధికారుల విభజన కొలిక్కి రావడంతో ప్రభుత్వం ఐఏఎస్ అధికారుల పోస్టింగ్లపై దృష్టి సారించింది. రాష్ట్ర వ్యాప్తంగా 24 మంది ఐఏఎస్ అధికారులను బదిలీ చేస్తూ ఉత్తర్వులు జారీ చేసిన సర్కారు, ఇందులో భాగంగా జిల్లా కలెక్టర్ను కూడా బదిలీ చేసింది. 2014 జూన్ 29న కలెక్టర్గా బాధ్యతలు తీసుకున్న జగన్మోహన్ ఏడు నెలల లోపే బదిలీ కావడం అధికార, రాజకీయ వర్గాల్లో చర్చనీయాంశంగా మారింది. ఎంతో సౌమ్యునిగా పేరున్న జగన్మోహన్ బాధ్యతలు స్వీకరించిన నాటి నుంచి జిల్లా పాలనపై తనదైన ముద్ర వేశారు. ప్రభుత్వ సంక్షేమ పథకాల అమలులో ప్రత్యేక శ్రద్ధ వహించారు. సర్కారు ప్రతిష్టాత్మకంగా చేపట్టిన సమగ్ర కుటుంబ సర్వే, మన ఊరు.. మన ప్రణాళికల రూపకల్పన విజయవంతంగా చేపట్టారు. దళిత బస్తీ పథకం అమలులో జిల్లా రాష్ట్రంలోనే మొదటి స్థానంలో నిలిచేలా చేశారు. అలాగే వివిధ శాఖల జిల్లా అధికారులతోపాటు, అన్ని స్థాయిలో అధికారులు, సిబ్బందితో కలుపుగోలుగా ఉన్నారు. ప్రజాప్రతినిధులకు కూడా అందుబాటులో ఉంటూ పాలనను కొనసాగించారు. జిల్లాలో ఆరు నెలలుగా జాయింట్ కలెక్టర్ పోస్టు ఖాళీగా ఉంది. జేసీగా పనిచేసిన లక్ష్మీకాంతం బదిలీ తర్వాత ఆ స్థానంలో ప్రభుత్వం ఎవరినీ నియమించలేదు. అలాగే ఐటీడీపీ ప్రాజెక్టు ఆఫీసర్ స్థానం కూడా ఖాళీగా ఉంటోంది. ఇన్నాళ్లు ఏఐఎస్ అధికారుల విభజన పూర్తి కాకపోవడంతో ప్రభుత్వం ఈ పోస్టులను భర్తీ చేయడానికి వీలుపడలేదు. దీంతో కలెక్టర్ జగన్మోహన్ జేసీగా కూడా అదనపు బాధ్యతల్లో కొనసాగారు. రెండు కీలక పోస్టింగ్లను సమర్థవంతంగా నిర్వహించారు. జిల్లా అధికార యంత్రాంగంపై ఇప్పుడిప్పుడే పూర్తి స్థాయిలో పట్టు సాధించిన ఆయన అక్రమార్కులపై చర్యలకు శ్రీకారం చుట్టారు. ఇంతలోనే కలెక్టర్ బదిలీ కావడం గమనార్హం. కాగా జగన్మోహన్ జిల్లాకు వచ్చిన కొన్ని నెలలకే ఆయన సతీమణి అరుణకుమారికి కూడా ప్రభుత్వం జిల్లాలోనే పోస్టింగ్ ఇచ్చింది. ఫారెస్టు సెటిల్మెంట్ అధికారిగా కొన్ని నెలల క్రితమే బాధ్యతలు తీసుకున్నారు. ఇప్పుడు కలెక్టర్ బదిలీ అధికార వర్గాల్లో చర్చకు దారితీసింది. మంత్రులకూ సమాచారం కరువు.. కలెక్టర్ బదిలీ, కొత్త కలెక్టర్ నియామకాల విషయంలో జిల్లా మంత్రులకు, ఎమ్మెల్యేలకు కూడా సమాచారం లేదు. కనీసం వీరితో మాటవరుసకైనా చర్చించకుండానే ఉత్తర్వులు వెలువడటం వారిని తీవ్ర అసంతృప్తికి గురిచేసినట్లు సమాచారం. దీంతో మంత్రులు జోగు రామన్న, ఇంద్రకరణ్రెడ్డి సోమవారం జిల్లాలోని తమ కార్యక్రమాలను రద్దు చేసుకుని హైదరాబాద్ వెళ్లారు. సిర్పూర్ పేపర్ మిల్లు పునరుద్ధరణ విషయమై సోమవారం సాయంత్రం సీఎంతో సమావేశం కావాలని భావించారు. ఈ సమావేశంలో కలెక్టర్ బదిలీని నిలిపివేయాలని సీఎంకు విజ్ఞప్తి చేయాలని జిల్లా ప్రజాప్రతినిధులు నిర్ణయించారు. కానీ ఈ సమావేశం మంగళవారానికి వాయిదా పడింది. కొత్త కలెక్టర్ ప్రియదర్శిని జిల్లా కలెక్టర్గా నియమితులైన జీడీ ప్రియదర్శిని 2008 బ్యాచ్కు చెందిన ఐఏఎస్ అధికారిణి. ప్రస్తుతం మహబూబ్నగర్ జిల్లా కలెక్టర్గా పనిచేస్తున్నారు. ఆమెకు కూడా కేవలం ఆరు నెలలలోపే బదిలీ అయ్యింది. 2014 జులై 31న మహ బూబ్నగర్ కలెక్టర్గా బాధ్యతలు తీసుకున్న ఆమె.. ఇప్పుడు ఆదిలాబాద్ జిల్లాకు బదిలీపై వస్తున్నారు. ప్రియదర్శిని హైదరాబాద్లోని హిమాయత్నగర్కు చెందిన వారు. ప్రస్తుతం గచ్చిబౌళిలో నివాసం ఉంటున్నారు. ఆమె బాల్యమంతా హైదరాబాద్లోనే గడిచింది. ఆమె తండ్రి బెంజుమన్ దీవెనయ్య ఆదాయపు పన్ను శాఖలో ఉన్నత స్థానంలో పనిచేశారు. ప్రభుత్వ ఉత్తర్వులను, నిబంధనలను తూచా తప్పకుండా పాటిస్తారనే పేరుంది. రాజకీయ, ఏ ఇతర ఒత్తిళ్లను లెక్కచేయరనే పేరుంది. పనిచేసిన స్థానాలు.. 2002 బ్యాచ్ గ్రూప్-1 అధికారిణి అయిన ప్రియదర్శిని ముందుగా విపత్తుల శాఖ సహాయ కమిషనర్గా పనిచేశారు. హౌజింగ్ శాఖ కార్యదర్శిగా పనిచేశారు. 2008లో సీసీఎల్ఏ కమిషనర్గా కొనసాగారు. ఈ సమయంలో ఆమెను ఐఏఎస్గా కేంద్ర ప్రభుత్వం గుర్తించింది. అనంతరం నల్గొండ జిల్లాకు జేసీగా బదిలీ అయ్యారు. అక్కడ సుమారు ఏడాది పనిచేశారు. అనంతరం గ్రేటర్ హైదరాబాద్ కార్పొరేషన్కు నార్త్జోన్ సహాయ కమిషనర్గా మూడున్నర ఏళ్లు పనిచేశారు. తర్వాత 2014 అక్టోబర్ 30న అపార్డ్కు డెరైక్టర్గా వెళ్లారు. అక్కడ ఎనిమిది నెలలు పనిచేసిన తర్వాత మహబూబ్నగర్ జిల్లాకు కలెక్టర్గా నియమితులయ్యారు. 2014 జూలై 31న మహబూబ్నగర్ బాధ్యతలు చేపట్టారు.


