ధోనికి పురస్కారం

లండన్: టి20 ప్రపంచకప్ టోర్నీలో భారత జట్టు ఫైనల్స్‌కు చేరిన ఆనందంలో ఉన్న ధోని... ప్రతిష్టాత్మక అవార్డును సైతం సొంతం చేసుకున్నాడు. ‘క్రీడారంగంలో అద్వితీయ ప్రదర్శన’కు గాను ధోనిని 2014 ఆసియా అవార్డు వరించింది.
 
 వివిధ రంగాల్లో విశిష్ట సేవలందించిన పలువురికి ఈ అవార్డులను ప్రకటించారు. ప్రస్తుతం బంగ్లాదేశ్‌లో ఉన్న ధోని.. శుక్రవారం ఇక్కడ జరిగిన అవార్డు కార్యక్రమానికి రాలేకపోయినా తన సందేశాన్ని పంపించాడు. ఆసియాతోపాటు ప్రపంచమంతా ఉన్న తన అభిమానులకు ఈ అవార్డును అంకితం చేస్తున్నట్టు తెలిపాడు. ‘పరిమిత ఓవర్ల క్రికెట్‌లో ధోని అత్యంత గొప్ప ఫినిషర్‌గా పేరు తెచ్చుకున్నాడు. అతని నాయకత్వంలో భారత జట్టు రెండు ఫార్మాట్లలో ప్రపంచకప్‌లతో పాటు ప్రతిష్టాత్మక టైటిల్స్‌ను దక్కించుకుంది’ అని అవార్డు ఫలకంపై పేర్కొన్నారు.