చిన్న బ్రేక్‌ తర్వాత పెద్ద సినిమా!

వేరు వేరు డైరెక్షన్‌లో వెళుతున్న ఇద్దరు కలసి సినిమా చేస్తే అంచనాలు భారీగా ఉంటాయి. బాలకృష్ణ, పూరి జగన్నాథ్‌ కాంబినేషన్‌ సినిమాపై అలాంటి అంచనాలే నెలకొన్నాయి. పూరి తనదైన శైలిలో ఈ చిత్రాన్ని స్పీడ్‌గా తీస్తున్నారు. ఈ క్రేజీ ప్రాజెక్ట్‌లో ఇద్దరు కథానాయికలు ఉంటారట. ఇప్పటికే ఓ నాయికగా ముస్కాన్‌ని ఎంపిక చేశారు. మరో నాయిక పాత్రకు పేరున్న తారను తీసుకోవాలనుకుంటున్నారని సమాచారం. ఆ ఛాన్స్‌ అమలాపాల్‌కి దక్కిందని భోగట్టా. పూరి దర్శకత్వం వహించిన ‘ఇద్దరమ్మాయిలు’లో అమలా పాల్‌ నాయికగా నటించిన విషయం గుర్తుండే ఉంటుంది.

ఈ మలయాళ కుట్టి నటనకు ఇంప్రెస్‌ అయిన పూరి తాజా చిత్రంలో బాలకృష్ణ సరసన ఓ కథానాయికగా ఎంపిక చేశారని ఫిల్మ్‌నగర్‌ టాక్‌. కొంత గ్యాప్‌ తర్వాత తెలుగులో అమలా పాల్‌ ‘ఆయుష్మాన్‌ భవ’ అనే చిత్రం అంగీకరించారు. దర్శకుడు విజయ్‌తో వివాహ బంధానికి ముగింపు పలికిన తర్వాత ఈ బ్యూటీ కెరీర్‌పై పూర్తిగా దృష్టి పెట్టారు. అందుకే, ఇకనుంచి వరుసగా సినిమాలు అంగీకరించాలనుకుంటున్నారట!