పోలీసు కస్టడీకి నిందితులు

యానాం టౌన్, న్యూస్‌లైన్ :సంచలనం కలిగించిన యానాం సబ్ జైలుపై దాడి కేసులో ప్రధాన నిందితుడు, సూత్రధారిగా భావిస్తున్న అశ్విన్, శిలంబులను విచారణ కోసం ఒకరోజు పోలీసు కస్టడీకి అప్పగిస్తూ యానాం సబ్ కోర్టు అనుమతి ఇచ్చింది. ఇటీవల పోలీసులు వీరిని అరెస్టు చేసి, కోర్టులో హాజరుపర్చగా, న్యాయమూర్తి రిమాండ్ విధించారు. ప్రస్తుతం పుదుచ్చేరిలోని కాలాపేట కేంద్ర కారాగారంలో రిమాండ్ ఖైదీలుగా ఉన్నారు. అయితే అశ్విన్, శిలంబులను విచారణ కోసం తమ కస్టడీకి ఇవ్వాలని యానాం పోలీసులు కోర్టును అభ్యర్థించారు. ఈ నేపథ్యంలో సోమవారం ఉదయం పుదుచ్చేరిలోని కాలాపేట కేంద్ర కారాగారం నుంచి బాంబు స్క్వాడ్ వాహనంలో నిందితులను యానాంకు తరలించారు.