అచిరకాలంలోనే అంతర్జాతీయస్థాయిలో రాకెట్ వేగంతో దూసుకొచ్చిన భారత బ్యాడ్మింటన్ స్టార్ పీవీ సింధు కెరీర్‌లో మరో గొప్ప విజయం చేరింది. ఇన్నాళ్లూ లోటుగా ఉన్న ‘సూపర్ సిరీస్’ టైటిల్‌ను ఈ హైదరాబాద్ అమ్మాయి తన ఖాతాలో జమచేసుకుంది. ప్రపంచ బ్యాడ్మింటన్‌లో తిరుగులేని శక్తిగా పేరొందిన చైనా గడ్డపై చైనా ప్లేయర్‌నే ఓడించిన సింధు మరో చిరస్మరణీయ విజయం నమోదు చేసి ఔరా అనిపించింది. సైనా నెహ్వాల్, కిడాంబి శ్రీకాంత్ తర్వాత చైనా ఓపెన్ సూపర్ సిరీస్ ప్రీమియర్ టైటిల్ నెగ్గిన మూడో భారతీయ ప్లేయర్‌గా సింధు గుర్తింపు పొందింది.