యథేచ్ఛగా మట్టి తోలకాలు

కొయ్యలగూడెం: మండల పరిధిలోని యర్రంపేట, రాజవరం గ్రామాల మధ్య ఉన్న సాగునీటి చెరువుల్లో మట్టి అక్రమ తరలింపు యథేచ్ఛగా సాగుతోంది. అక్రమార్కులు జేసీబీలు, టిప్పర్లను వినియోగిస్తూ రేయింబవళ్లు మట్టిని తరలిస్తున్నారు. అక్రమ తవ్వకాలను నిరోధించాల్సిన అధికారులు పట్టించుకోవడం లేదని ఆయకట్టు రైతులు ఆగ్రహం వ్యక్తం చేస్తున్నారు. భారీ టిప్పర్ల రాకపోకలతో గ్రామాల్లోని అంతర్గత రహదారులు పూర్తిగా దెబ్బతింటున్నాయని ప్రజలు వాపోతున్నారు. అలాగే పంట పొలాలకు నీరందించే కాలువ బోదెలపై నుంచి వాహనాలు రాకపోకలు సాగించడంతో అవి దెబ్బతిని సాగునీరు అందడం లేదని రైతులు ఆవేదన వ్యక్తం చేస్తున్నారు. ఇప్పటికై నా సంబంధిత అధికారులు స్పందించి చెరువుల్లో సాగుతున్న అక్రమ మట్టి తరలింపును అరికట్టి, బాధ్యులపై చర్యలు తీసుకోవాలని ఆయకట్టు రైతులు, గ్రామస్తులు కోరుతున్నారు.