యూరియా కోసం బారులు

యూరియా కోసం బారులు ముప్పాళ్ల: యూరియా కోసం రైతులకు కష్టాలు తప్పటం లేదు. ప్రభుత్వం యూరియా కొరత లేదంటూ చెబుతున్న మాటలు ప్రకటనలే పరిమితమవుతున్నాయి. గ్రామంలోకి యూరియా లారీ వచ్చిందని తెలియగానే తెల్లవారుజామునుంచే రైతులు సంబంధిత ప్రాంతం వద్ద పడిగాపులు కాస్తున్నారు. ముప్పాళ్ల గ్రామ సచివాలయానికి 440 యూరియా బస్తాల లారీ సోమవారం సాయంత్రం వచ్చింది. మంగళవారం పంపిణీ చేస్తారని సమాచారం తెలుసుకున్న రైతులు తెల్లవారుజామునే గ్రామ సచివాలయం వద్దకు చేరుకున్నారు. ముందు వచ్చిన వారికి టోకెన్‌లు పంపిణీ చేశారు. కొద్దిసేపటికే పంపిణీ పూర్తయిందని చెప్పడంతో రైతులు ఖంగుతిన్నారు. చేసేది లేక వెనుదిరిగిపోయారు. మండలంలోని రుద్రవరం గ్రామానికి కూడా లారీ యూరియా లోడు వచ్చింది. లారీని గ్రామసచివాలయం లో కాకుండా కూటమి నాయకులు చెప్పిన ప్రాంతంలో దింపి గుట్టుచప్పుడు కాకుండా పంపిణీ పూర్తి చేశారు. కూటమి నాయకులు చెప్పిన వారికే వ్యవసాయశాఖ అధికారులు దగ్గరుండి యూరియా బస్తాలు పంపిణీ చేశారు. ప్రభుత్వ కార్యాలయాల వద్ద చేపట్టాల్సిన పంపిణీని ప్రైవేటు వ్యక్తుల ఇళ్ల వద్ద చేపట్టడం పై రైతులు ఆగ్రహం వ్యక్తం చేస్తున్నారు.