సాగునీటి వృథా!

అమరచింత: ప్రియదర్శిని జూరాల జలాశయం ప్రధాన ఎడమ కాల్వ షట్టర్లకు మూడేళ్ల కిందట మరమ్మతు చేపట్టారు. షట్టర్లు మూసినా లీకేజీల కారణంగా నీటి ప్రవాహం నిలువరించలేని పరిస్థితి నెలకొంది. కాల్వ వెంట వారంలో మూడు రోజుల పాటు సుమారు 60 క్యూసెక్కుల నీరు వృథాగా పారుతోంది. దీంతో ప్రాజెక్టులోని నిల్వ నీటిమట్టం రోజురోజుకు తగ్గుముఖం పడుతోంది. ప్రస్తుతం జలాశయంలో 4.264 టీఎంసీల నీరు మాత్రమే ఉండటంతో 20 వేల ఎకరాల ఆయకట్టుతో పాటు ఉమ్మడి జిల్లాలోని తాగునీటి పథకాలకు నీటిని అందించేందుకు అధికారులు ప్రయత్నాలు చేస్తున్నారు. జలాశయం ప్రధాన గేట్లతో పాటు కుడి, ఎడమ కాల్వల షట్టర్ల లీకేజీలతో నీరు మరింత వృథా అవుతోందని ఆయకట్టు రైతులతో పాటు ప్రాజెక్టు సమీప గ్రామాల ప్రజలు ఆరోపిస్తున్నారు.

వారబందీ విధానంలో..

జూరాల ఎడమ కాల్వ ఆయకట్టుకు వారబందీ విధానంలో రోజుకు 500 క్యూసెక్కుల చొప్పున వారంలో 4 రోజుల పాటు సాగునీటిని వదులుతున్నారు. మిగిలిన మూడు రోజులు పూర్తిస్థాయిలో మూసి నీటి సరఫరాను నిలిపివేస్తారు. కాని ఆ సమయంలోనూ లీకేజీలతో రోజుకు 60 క్యూసెక్కుల నుంచి 70 క్యూసెక్కుల వరకు నీరు వృథాగా కాల్వలో పారుతుండటంతో జలాశయంలో నీటిమట్టం తగ్గి వేసవిలో ఆయకట్టుకు సాగునీటి కష్టాలతో పాటు ఉమ్మడి జిల్లా ప్రజలకు తాగునీటి కష్టాలు తలెత్తే అవకాశాలు ఉన్నాయి.

రూ.5 లక్షల వ్యయంతో..

సుమారు రూ.5 లక్షలతో జూరాల ప్రాజెక్టు ఎడమ కాల్వ షట్టర్ల మరమ్మతుతో పాటు రబ్బర్ల బిగింపు పనులు మూడేళ్ల కిందట చేపట్టారు. సదరు కాంట్రాక్టర్‌ రెండేళ్ల పాటు పనులు చేపట్టగా షట్టర్ల మరమ్మతు పూర్తయిందని చేతులు దులుపుకొన్న అధికారులు లీకేజీలు ఎందుకు ఏర్పడ్డాయన్న ప్రశ్నలకు మాత్రం సమాధానం చెప్పడం లేదని పలువురు రైతులు ఆరోపిస్తున్నారు. షట్టర్లకు చిన్నపాటి కప్లింగ్‌ జాయింట్‌ బోల్ట్‌ను బిగిస్తే నీటి వృథాను నిలువరించవచ్చని అధికారులకు తెలిసినా నేటి వరకు ఆ పనులు చేపట్టడం లేదు. చిన్న బోల్ట్‌ బిగించాలని.. అదికూడా కార్యాలయంలో ఉందని త్వరలోనే బిగిస్తామని చెప్పడమే తప్ప ఆచరణకు నోచుకోవడం లేదు. ఉన్నతాధికారులు స్పందించి నీటిలీకేజీ నివారణకు వెంటనే చర్యలు తీసుకోవాలని కోరుతున్నారు.

జూరాల ఎడమకాల్వషట్టర్లకు లీకేజీలు

మూసినా ఆగని ప్రవాహం

మూడేళ్ల కిందట మరమ్మతులుచేసినా ఫలితం శూన్యం

జలాశయంలో రోజురోజుకు తగ్గుతున్న నీటిమట్టం

సిబ్బంది నిర్లక్ష్యం..

జూరాల ఎడమ కాల్వకు సాగునీటి సరఫరాను నిలిపిన రోజుల్లో నీటి వృథాను అధికారులు అరికట్టలేక పోతున్నారు. కళ్ల ముందే రోజు 60 క్యూసెక్కులకు పైగా వృథాగా పారుతున్నా సిబ్బంది చూసీచూడనట్లు మౌనం వహిస్తున్నారు. షట్టర్లకు బోల్టా బిగించడంలో అలసత్వం చూపుతున్నారు. – వెంకటేష్‌, నందిమళ్ల

చర్యలు తీసుకుంటాం..

జూరాల ఎడమ కాల్వ షట్టర్ల లీకేజీలతో నీరు వృథాగా కాల్వలో పారుతోంది. వారబందీ విధానంలో వారంలో 4 రోజుల పాటు 2 వేల క్యూసెక్కుల సాగునీరు ఆయకట్టుకు వదులుతున్నాం. లీకేజీల నియంత్రణకు చర్యలు చేపడతాం. – జగన్మోహన్‌,

ఈఈ, జూరాల జలాశయం ఎడమకాల్వ విభాగం

సాగునీటి వృథా!

సాగునీటి వృథా!

సాగునీటి వృథా!