శాటిలైట్‌ టీవీతో విద్యాబోధన

శాటిలైట్‌ టీవీతో విద్యాబోధన

●పెద్దతండా పాఠశాల హెచ్‌ఎం రాజాలిపాషా ప్రత్యేకత ●ఇన్నోవేషన్‌లో..రాష్ట్ర స్థాయి గుర్తింపు

కారేపల్లి: మండలంలోని పెద్దతండా (భాగ్యనగర్‌తండా) ప్రాథమికోన్నత పాఠశాలలో శాటిలైట్‌ టీవీతో విద్యాబోధన పలువురిని ఆకట్టుకుంటుంది. ఆ పాఠశాల హెచ్‌ఎం ఎస్‌కే రాజాలిపాషా విద్యార్థులకు అర్థమయ్యే విధంగా వినూత్న బోధన విధానాన్ని అవలంభిస్తూ విద్యార్థులలో దాగి ఉన్న ప్రతిభకు పదును పెడుతున్నారు.

విద్యార్థులను ఆకట్టుకునేలా..

పాఠశాలలో విద్యార్థులను ఆకట్టుకునేలా శాటిలైట్‌ టీవీని వినియోగించి బోధన చేస్తున్నారు. హెచ్‌ఎం సారధ్యంలో విద్యార్థులు మల్టీశాటిలైట్‌ సిగ్నల్‌ రిసీవింగ్‌ యాంటినాను తయారు చేశారు. అదే రిసీవర్‌ యాంటినా ద్వారా 300లకు పైగా టీవీ చానల్స్‌ను విద్యార్థులకు అందుబాటులో ఉంచి విద్యనందించటం ద్వారా పాఠశాలకు గుర్తింపు వచ్చింది. ప్రైవేట్‌ ధీటుగా విద్యాబోధన సాగుతుండడంతో పాఠశాలలో ప్రవేశాల సంఖ్య పెరుగుతుందని హెచ్‌ఎం తెలిపారు.

ఇన్నోవేషన్‌లో రాష్ట్రస్థాయి అవార్డు..

రాష్ట్రస్థాయి ఇన్నోవేషన్‌ సెల్‌ సైన్స్‌ ప్రొగ్రాంలో యూపీఎస్‌ పెద్దతండా (భాగ్యనగర్‌తండా) విద్యార్థి ఎం.ఉపాసన రాష్ట్రస్థాయి అవార్డు సాధించింది. మల్టీశాటిలైట్‌ సిగ్నల్‌ రిసీవింగ్‌ యాంటినా తయారు చేసినందుకు గాను ఈ అవార్డును అందుకుంది. రాష్ట్ర వ్యాప్తంగా పోటీ పడిన 500ల మంది విద్యార్థుల్లో 20మంది ఎంపిక కాగా, వారిలో ఎం.ఉపాసన ఒకరు. దీంతో విద్యార్థినికి, ప్రోత్సహించిన హెచ్‌ఎం.. కలెక్ట ర్‌ చేతులమీదుగా అవార్డును సైతం అందుకున్నారు.

ఆదర్శవంతంగా పాఠశాల నిర్వహణ..

పిల్లల తల్లిదండ్రుల ప్రోత్సాహం, పాఠశాల ఉపాధ్యాయుల కృషితో పెద్దతండా ప్రాథమికోన్నత పాఠశాలకు రాష్ట్రస్థాయిలో గుర్తింపు వచ్చింది. విద్యార్థులను ఆకట్టుకునే విధంగా బోధన చేస్తుండటంతో వారిలో నేర్చుకోవాలనే తపన పెరిగి బడికి ఉత్సాహంగా వస్తున్నారు. విద్యార్థుల మనోవికాసాభివృద్ధికి ప్రత్యేక కార్యక్రమాలు నిర్వహిస్తున్నాం.

– ఎస్‌కే.రాజాలిపాషా, హెచ్‌ఎం, పెద్దతండా