TV
మహనీయుల జయంతులను అర్థవంతంగా ఆచరించాలి
హొసపేటె: జాతిపిత మహాత్మా గాంధీ, లాల్‌ బహదూర్‌ శాస్త్రి వంటి మహనీయుల జయంతులను ఈసారి తాలూకా యంత్రాంగం చాలా అర్థవంతంగా జరుపుకుంటుందని తహసీల్దార్‌ నేత్రావతి తెలిపారు. గురువారం కూడ్లిగి పట్టణంలోని తాలూకా కార్యాలయంలో తహసీల్దార్‌ అధ్యక్షతన జరిగిన ప్రాథమిక సమావేశంలో ఆమె మాట్లాడారు. జయంతిలో భాగంగా, మహాత్మా గాంధీ అస్థికలను ఉంచిన అమరవీరుల స్మారక చిహ్నాన్ని త్రివర్ణ పతాకం రంగులతో అలంకరించనున్నారు. ఉదయం 9 గంటలకు, ఎమ్మెల్యే డాక్టర్‌ ఎన్‌టీ శ్రీనివాస్‌, అధికారులు గాంధీ చిత్రపటానికి పుష్పగుచ్ఛాలు అర్పిస్తారు. తరువాత ఆయన గాంధీజీ గురించి ఉపన్యసిస్తారు. అక్టోబర్‌ 2న తాలూకాలోని అన్ని పాఠశాలలు, కళాశాలలు, గ్రామ పంచాయతీ కార్యాలయాల్లో ఈ ఇద్దరు గొప్ప వ్యక్తుల చిత్రపటాలను పూజించి వారి విజయాల గురించి తెలియజేయాలని ఆమె ఆదేశించారు. కార్యక్రమంలో తాలూకా స్థాయి అధికారులందరూ పాల్గొని విజయవంతం చేయాలని కోరారు. టీపీ అధ్యక్షుడు కావలి శివప్పనాయక, ప్రభుత్వ ఉద్యోగుల సంఘం తాలూకా అధ్యక్షుడు ఎస్‌.వెంకటేష్‌, ఒనకె ఓబవ్వ సంఘం రాష్ట్ర అధ్యక్షుడు హిరేకుంబలగుంటె ఉమేష్‌, బీఈఓ ఎస్‌.ఎస్‌.జగదీష్‌, టీపీ చీఫ్‌ ఆఫీసర్‌ దాదాపీర్‌, డీ.నాగరాజ్‌, హామీ పథకం తాలూకా అధ్యక్షుడు జిలాన్‌, ఇతర అధికారులు పాల్గొన్నారు.
