‘సహకార’ పదవులపై పీటముడి

● నియోజకవర్గంలో మొత్తం 16 సహకార సంఘాలు ఉన్నాయి. ఇందులో కోరుట్ల మినహా మిగతా మల్లాపూర్‌, ఇబ్రహీపట్నం, మెట్‌పల్లిలో మండలాల్లోని ఏడు సంఘాలను తన వర్గానికి కేటాయించాలని సుజీత్‌రావు పట్టుబట్టుతున్నట్లు తెలిసింది. ● మెట్‌పల్లి, మల్లాపూర్‌, చిట్టాపూర్‌, ముత్యంపేట, తిమ్మాపూర్‌, ఇబ్రహీంపట్నం, సిర్‌పూర్‌లకు ఆయన ఇప్పటికే ప్రభుత్వానికి ప్రతిపాదనలు పంపినట్లు సమాచారం. ● జిల్లా సహకార కేంద్ర బ్యాంకు(డీసీసీబీ) చైర్మన్‌ పదవిని ఆశిస్తున్న సుజీత్‌రావు.. సిర్‌పూర్‌ సంఘం చైర్మన్‌ పదవికి తన పేరును ప్రతిపాదించినట్లు ఆయన అనుచరులు చెబుతున్నారు. ● దీనిపై ప్రభుత్వ పెద్దల నుంచి స్పష్టమైన హామీ లభించడంతోనే ఆయన రంగంలోకి దిగినట్లు వారు పేర్కొంటున్నారు. ● మరోవైపు నియోజకవర్గంలో ఉన్న అన్ని సంఘాలకు జువ్వాడి నర్సింగరావు ప్రతిపాదనలు అందించినట్లు ప్రచారం జరుగుతోంది. ● ఏడు సంఘాలకు రెండు వర్గాలు పోటీ పడుతుండడంతో వాటికి ఎంపిక వ్యవహారం కాంగ్రెస్‌ పెద్దలకు తలనొప్పిగా మారింది. ● నియోజకవర్గ ఇన్‌చార్జినైన తనకే అన్ని సంఘాలకు చైర్మన్‌, డైరెక్టర్లను ఎంపిక చేసుకునే అవకాశం ఇవ్వాలని నర్సింగరావు పట్టుబడుతుండగా.. పార్టీకి తాను అందించిన సేవలను పరిగణనలోకి తీసుకొని తన వర్గానికి ప్రాధాన్యం ఇవ్వాలని సుజీత్‌రావు కోరుతున్నారు. ● నియోజకవర్గంలో కీలకమైన మెట్‌పల్లి సహకార సంఘం చైర్మన్‌ పదవి వ్యవహారం కాంగ్రెస్‌లో చర్చనీయాంశమైంది. ఈ పదవికి నర్సింగరావు ప్రస్తుత వ్యవసాయ మార్కెట్‌ కమిటీ వైస్‌చైర్మన్‌ అంజిరెడ్డి పేరును ప్రతిపాదిస్తే.. సుజీత్‌రావు కాంగ్రెస్‌ పట్టణ మాజీ అధ్యక్షుడు జెట్టి లింగం పేరును సిఫారసు చేసినట్లు తెలిసింది. ● మొదటి నుంచి జువ్వాడికి ప్రధాన అనుచరుడిగా ఉన్న జెట్టి లింగం.. మున్సిపల్‌ ఎన్నికల్లో కౌన్సిలర్‌గా పోటీ చేసి ఓటమి చెందిన తర్వాత ఆయనతో విభేధించి పార్టీ కార్యక్రమాలకు దూరంగా ఉంటున్నారు. ● జువ్వాడిపై తీవ్ర అసంతృప్తితో ఉన్న లింగం పేరును సుజీత్‌రావు ప్రతిపాదించడంపై ఆ పార్టీలో జోరుగా చర్చ సాగుతోంది.