సైకత రూపున శివపార్వతుల దర్శనం

అమ్మలగన్నయమ్మ తలుపులమ్మ తల్లి, ఆది దంపతులైన శివపార్వతులు సైకత రూపున దర్శనమిచ్చారు. తూర్పు గోదావరి జిల్లా రంగంపేటకు చెందిన సైకత శిల్పులు రాష్ట్ర ప్రభుత్వ ఉగాది పురస్కార గ్రహీతలు దేవిన సిస్టర్స్‌, దేవిన శ్రీనివాస్‌లు తలుపులమ్మ తల్లి, శివపార్వతుల ఆకృతులతో ఈ సైకత (ఇసుక) శిల్పాన్ని రూపొందించారు. తలుపులమ్మ అమ్మవారి జాతర సందర్భంగా.. అమరావతి మ్యాక్స్‌ క్వాజీ బ్యాంకు సీఈఓ ఆది స్వరూప్‌ పట్నాయక్‌ ఆధ్వర్యాన 6 టన్నుల ఇసుకతో 18 అడుగులు వెడల్పు, 8 అడుగుల ఎత్తున రూపొందించిన ఈ సైకత శిల్పం చూపరులను ఎంతో ఆకట్టుకుంటోంది. దీనిని శుక్రవారం సాయంత్రం వరకూ భక్తులు దర్శించుకునే ఏర్పాటు చేశారు. ఈ ప్రాంతంలో మునుపెన్నడూ ఇటువంటి సైకత శిల్పాలు రూపొందించలేదని, ఆధ్యాత్మికత వెల్లివిరిసేలా దీనిని వినూత్నంగా తీర్చిదిద్దామని శ్రీనివాస్‌ చెప్పారు. కార్యక్రమంలో బ్యాంక్‌ చైర్‌పర్సన్‌ రామలక్ష్మి, ఎగ్జిక్యూటివ్‌ డైరెక్టర్‌ భార్గవ్‌, గ్రామ పెద్దలు పాల్గొన్నారు.

– తుని రూరల్‌