TV
పోలీస్స్టేషన్ వద్ద బాలిక తల్లిదండ్రులు
సాక్షి, మహబూబ్నగర్: ఆ పేద దంపతులకు కన్నకూతురే భారమైంది. పెళ్లి చేయలేమనే నిస్సహాయత ఆ అమ్మాయిని అమ్మకానికి పెట్టింది. ఈ ఘటన మహబూబ్నగర్ జిల్లాలో శుక్రవారం వెలుగు చూసింది. నవాబ్పేట మండలం హాజిలాపూర్ గ్రామ పరిధిలోని గాలోనికుంటకు చెందిన వాలమ్మ, రవినాయక్ దంపతులు. వీరికి నలుగురు సంతానం. హైదరాబాద్లో కూలి చేసుకుంటూ కుటుంబాన్ని పోషించుకుంటున్నారు. అక్కడే వీరికి షాద్నగర్కు చెందిన ఓ వ్యక్తితో పరిచయమైంది. రెండో కూతురు(17)కు పెళ్లి చేయాలనే ఆందోళన ఆ దంపతుల్లో మొదలైంది. వీరి నిస్సహాయతను గుర్తించిన షాద్నగర్కు చెందిన సదరు వ్యక్తి ఆమెను అమ్మేందుకు స్కెచ్ వేశాడు.
రాజస్తాన్కు చెందిన ఓ వ్యక్తితో పెళ్లి చేద్దామంటూ ఆ దంపతులను ఒప్పించాడు. ఇందుకు సదరు పెళ్లికొడుకు ద్వారా రూ.3 లక్షలు ఇప్పిస్తానని ఒప్పందం కుదుర్చుకున్నాడు. అతడికి అప్పగిం చేందుకు ఆ దంపతులు శుక్రవారం ఉదయం నవాబ్పేట నుంచి అమ్మాయిని తీసుకుని హైదరా బాద్కు బయల్దేరారు. అంతలోనే దుబాయ్లో ఉంటున్న ఆమె బాబాయ్కి విషయం తెలియడంతో నవాబ్పేట పోలీసులకు సమాచారం ఇచ్చాడు. వెంటనే రంగంలోకి దిగిన పోలీసులు ఆ దంపతులను అడ్డుకున్నారు. అమ్మాయి మైనర్ కావడంతో తల్లిదండ్రులకు కౌన్సెలింగ్ ఇచ్చి ఆమెను మహబూబ్నగర్లోని స్టేట్హోంకు తరలించారు.
దుబాయ్ నుంచి సమాచారం: ఎస్ఐ శ్రీకాంత్
రాజస్తాన్కు బాలికను పంపుతున్నారని దుబాయి నుంచి బాలిక బంధువు ఫోన్ చేసి చెప్పాడు. దీంతో వెంటనే రంగంలోకి దిగి ఆ తల్లిదండ్రులను అడ్డుకున్నాం. బాలికల తరలింపు ఘటనలో ఎవరైనా మధ్యవర్తులు మండలంలో ఉన్నారా.. డబ్బుల కోసం ఎర వేస్తున్నారా అనే విషయాలపై విచారణ చేస్తు న్నాం. బాలికల విక్రయాలకు తావు లేకుండా చర్యలు తీసుకుంటాం. అమ్మాయిల తరలింపునకు బాధ్యులైనవారిని వదిలిపెట్టం.
