వైద్య సిబ్బంది పోరుబాట

ఏళ్ల తరబడి వైద్య, ఆరోగ్య శాఖలో సేవలందిస్తున్న కాంట్రాక్ట్‌ సిబ్బంది తమ న్యాయమైన డిమాండ్ల సాధన కోసం పోరుబాట పట్టారు. ఆంధ్రప్రదేశ్‌ మెడికల్‌ – హెల్త్‌ కాంట్రాక్ట్‌ జాయింట్‌ యాక్షన్‌ కమిటీ పిలుపు మేరకు సోమవారం నుంచి జిల్లా వ్యాప్తంగా నిరసనకు దిగారు.

కాణిపాకం: అధికారులకు సమ్మె నోటీసు అందజేశారు. ఏళ్ల తరబడి ప్రభుత్వం చుట్టూ, అధికారుల చుట్టూ తిరిగినా సమస్యలు పరిష్కారం కాకపోవడంతో వేరే దారి లేక వైద్య, ఆరోగ్య శాఖలో సేవలందిస్తున్న కాంట్రాక్ట్‌ సిబ్బంది నిరసనల్లోకి దిగుతున్నట్లు ఉద్యోగ సంఘాల నేతలు స్పష్టం చేశారు. సోమవారం నల్ల బ్యాడ్జీలు ధరించి విధులకు హాజరయ్యారు. మంగళవారం నుంచి విధులు బహిష్కరించనున్నారు. జిల్లాలో ఒక జిల్లా ప్రభుత్వ సర్వజన ఆస్పత్రి, 4 ఏరియా ఆస్పత్రులు, 8 కమ్యూనిటీ హెల్త్‌ సెంటర్లు 50 ప్రాథమిక ఆరోగ్య కేంద్రాలున్నాయి. వీటి పరిధిలో కాంట్రాక్ట్‌ పద్ధతిలో 283 మంది స్టాఫ్‌ నర్సులు, ఫార్మాసిస్ట్‌లు 82 మంది, ల్యాబ్‌ టెక్నీషియన్లు 68 మంది పనిచేస్తున్నారు. వీరంతా పెద్ద ఎత్తున నిరసనలో పాల్గొంటున్నారు. జిల్లాలోనే వందలాది మంది స్టాఫ్‌ నర్సులు, ల్యాబ్‌ టెక్నీషియన్లు, ఫార్మసీ అధికారులు, పారామెడికల్‌ సిబ్బంది రాత్రింబవళ్లు ప్రజారోగ్యానికి సేవలందిస్తున్నారు. ప్రభుత్వం సరిపడా రెగ్యులర్‌ నియామకాలు జరపకపోవడంతో, తగినంత విద్యార్హతలు, అనుభవం ఉన్న సిబ్బంది సుదీర్ఘకాలంగా కాంట్రాక్ట్‌ ఉద్యోగులుగానే ఉండిపోవాల్సి వచ్చిందని ఆవేదన వ్యక్తం చేస్తున్నారు. కరోనా లాంటి క్లిష్ట సమయాల్లోనూ ప్రాణాలకు తెగించి సేవలు అందించిన తమను క్రమబద్ధీకరించడంలో ప్రభుత్వం నిర్లక్ష్యం వహించడంపై తీవ్ర ఆగ్రహం వ్యక్తం చేస్తున్నారు.

నల్ల బ్యాడ్జీలు ధరించి నిరసన

జిల్లా వ్యాప్తంగా అధికారులకు నోటీసులు ఇచ్చారు.తమ న్యాయమైన సమస్యలపై ఇప్పటికే సంబంధిత హెచ్‌ఓడీలు, ఉన్నతాధికారులకు అనేకమార్లు వినతిపత్రాలు సమర్పించినప్పటికీ ఫలితం లేకుండా పోయిందని జేఏసీ నాయకులు గుర్తుచేశారు. సోమవారం నుంచి నల్ల బ్యాడ్జీలు ధరించి నిరసన తెలుపుతున్నారు. ప్రభుత్వం కళ్లు తెరవాలని, తమ సమస్యలను తక్షణమే పరిష్కరించాలని డిమాండ్‌ చేశారు. మంగళవారం నుంచి విధులు బహిష్కరించిన నిరసనలో పాల్గొంటామని జేఏసీ జిల్లా ప్రతినిధులు స్పష్టం చేశారు. దీంతో ప్రభుత్వం వారి స్థానంలో విలేజ్‌ హెల్త్‌ క్లినిక్‌లో పనిచేసే సిబ్బందిని సర్దుబాటు చేయాలని చూస్తోంది. అయితే వారిని ఆస్పత్రులకు సర్దుబాటు చేస్తే ఇప్పుడు అరకొరగా నడుస్తున్న ఆ పల్లె వైద్యం పూర్తిగా నిర్వీర్యమయ్యే అవకాశాలు కనిపిస్తున్నాయి.

ప్రధాన డిమాండ్లు ఇవే..