పెద్దపప్పూరును కరువు జాబితాలో చేర్చండి

● కలెక్టర్‌కు రైతుల వినతి

పెద్దపప్పూరు: తీవ్ర దుర్భిక్ష పరిస్థితులు ఉన్న పెద్దపప్పూరును కరువు మండలంగా ప్రకటించాలని రైతులు కోరారు. చాగల్లు ప్రాజెక్టు కట్టపై జరుగుతున్న కంపచెట్ల తొలగింపు పనులను శనివారం కలెక్టర్‌ పరిశీలించారు. ఈ సందర్భంగా రైతులు కలెక్టర్‌ను కలిసి వినతిపత్రం అందజేశారు.

ప్రతి ఒక్కరికీ ‘ఉపాధి’ కల్పించాలి

బుక్కరాయసముద్రం: గ్రామీణ ప్రాంతాల్లో పని అడిగిన ప్రతి ఒక్కరికీ ఉపాధి కల్పించాలని కలెక్టర్‌ పేర్కొన్నారు. శనివారం చెదుల్ల గ్రామంలో ఉపాధి హామీ పనులను ఆయన పరిశీలించారు.

శింగనమల: రైతులు పశువుల షెడ్లను నిర్మించుకుంటే ఆదాయంతో పాటు, పశువులకు రక్షణ ఉంటుందని కలెక్టర్‌ ఆనంద్‌ అన్నారు. శనివారం సి.బండమీదపల్లిలో పశువుల షెడ్‌ నిర్మాణానికి ఎమ్మెల్యే శ్రావణిశ్రీతో కలిసి ఆయన భూమి పూజ చేశారు.

అధికారులపై ఆగ్రహం

తాడిపత్రి రూరల్‌ : పీజీఆర్‌ఎస్‌లో వచ్చే అర్జీలను పరిష్కరించకుండా నిర్లక్ష్యం చేసిన అధికారులపై కలెక్టర్‌ ఆనంద్‌ ఆగ్రహం వ్యక్తం చేశారు. శనివారం తహసీల్దార్‌ కార్యాలయంలో అధికారులతో నిర్వహించిన సమావేశంలో ఆయన అసంతృప్తి వ్యక్తం చేశారు.

‘స్థానిక’ ఎన్నికలకు సిద్ధంగా ఉండాలి

అనంతపురం అర్బన్‌: ‘స్థానిక’ ఎన్నికలు పకడ్బందీగా నిర్వహించేందుకు సంసిద్ధంగా ఉండాలని కలెక్టర్‌ ఆనంద్‌ అధికారులను ఆదేశించారు. స్థానిక ఎన్నికల సన్నద్ధతపై కలెక్టర్‌ శనివారం కలెక్టరేట్‌లోని తన చాంబర్‌ మునిసిపల్‌, జిల్లా పరిషత్‌, పంచాయతీ అధికారులతో సమీక్షించడంతో పాటు దిశా నిర్దేశం చేశారు.