ఆదాయం–2, వ్యయం–11, రాజయోగం–4, అవమానం–7.పునర్వసు 4వ పాదము (హి)పుష్యమి 1,2,3,4 పాదములు (హూ, హే, హొ, డా)ఆశ్లేష 1,2,3,4 పాదములు (డీ, డూ, డే, డొ)ఈ సంవత్సరం గురువు మిథునంలో (వ్యయం) జూన్‌ 1 వరకు ఉంటారు. జూన్‌ 1 నుంచి అక్టోబర్‌ 31 వరకు, తిరిగి జనవరి 25 నుంచి సంవత్సరాంతం వరకు కర్కాటకంలో (జన్మం) అక్టోబర్‌ 31 నుంచి జనవరి 25 వరకు సింహంలో (ద్వితీయం) సంచరిస్తారు. శని సంవత్సరం అంతా మీనంలో (నవమం) సంచరిస్తారు. రాహువు డిసెంబర్‌ 6 వరకు కుంభంలో (అష్టమం) కేతువు సింహంలో (ద్వితీయం) తదుపరి రాహువు మకరం (సప్తమం)లో కేతువు కర్కాటకంలో (జన్మం) సంచరిస్తారు. దైనందిన కార్యక్రమాలు సజావుగా సాగవు. భార్యాపుత్రలతో మనస్పర్థలు. పెద్దల ఆరోగ్య విషయంలో జాగ్రత్తలు పాటించాలి. అవసరానికి తగిన ఆదాయం అందదు. ఖర్చులు నియంత్రించలేరు. శుభ కార్యాల వలన ఖర్చులు. ఋణ ఇబ్బందులు. ఉద్యోగాలలో ప్రమోషణన్‌ లకు అడ్డంకులు. మార్కెటింగ్‌ ఉద్యోగులకు శ్రమ ఎక్కువ, ఫలితం తక్కువ. వ్యాపారులు ఋణాలు ఇచ్చేటప్పుడు జాగ్రత్త వహించాలి. ఫైనాన్స్‌ వ్యాపారులకు మొండి బాకీలు పెరుగుతాయి. నూతన వ్యాపార ప్రయత్నాలలో ధనవ్యయం అధికం. షేర్‌ వ్యాపారులకు చికాకులు . విద్యార్థులకు శ్రద్ధ లోపిస్తుంది. విదేశీ నివాస ప్రయాణ ప్రయత్నాల్లో ధనవ్యయం, కాలహరణం. కోర్టు, స్థిరాస్తి వ్యవహారాలలో చికాకులు. ఈ రాశి స్త్రీలకు తోటివారితోనూ, పనివారితోను ఇబ్బందులు. గర్భిణులు జాగ్రత్త పడండి. పునర్వసు 4: పిల్లల నుంచి సహాయ సహకారాలు పెరుగుతాయి. రోజువారీ పనులు సకాలంలో జరుగుతాయి. ఆర్థిక జాగ్రత్తలు పాటిస్తారు. కొన్ని సందర్భాలలో ఆలోచనలను వేగంగా అమలు చేసి జరగవు అనుకున్న పనులను సాధించగలుగుతారు. అభివృద్ధి వైపు ప్రయాణం సాగుతుంది.పుష్యమి: ఒంటరి ప్రయాణాలు, అనవసర కాలక్షేపాలు మానుకోండి. సంబంధం లేని వ్యవహారాల గురించి సమయం పాడుచేసుకోవడం, అవసరం లేని వస్తువులు కొనుగోలు చేయడం వంటివి చేస్తూ ఉంటారు. బంధు మిత్రుల రాకపోకలు పెరుగుతాయి. శుభకార్య ప్రయత్నాలు జరుగుతాయి.ఆశ్లేష: పుణ్యకార్యాలు చేస్తారు. మానసిక ఒత్తిడిని జయిస్తారు. ఆరోగ్య జాగ్రత్తలు పాటిస్తారు. పాత ఋణ వ్యవహారాలు అక్టోబర్‌ లోపుగా కొలిక్కి వస్తాయి. అక్టోబర్‌ తరువాత ఇతరుల నుంచి సహాయ నిరాకరణ పెరుగుతుంది. కుటుంబంలోని పెద్దల ఆరోగ్య సమస్యలు ఇబ్బంది కలిగిస్తాయి.శాంతి మార్గం: రాహు, కేతువులకు జపదాన హోమాదులు చేయండి. రాహు శాంతికి రోజూ దుర్గా సప్తశ్లోకీ పారాయణ చేయండి. కేతు శాంతికి రోజూ లక్ష్మీనృసింహ కరావలంబ స్తోత్రం పారాయణ చేయండి. మంగళవారాలలో పొయ్యిదానం చేయండి. షణ్ముఖ రుద్రాక్షధారణ శుభప్రదం. ఏప్రిల్‌: ఆదాయం ఆలస్యంగా అందుతుంది. ఖర్చులు నియంత్రించలేరు. శరీరం శుష్కించే అవకాశం ఉంది. కోర్టు వ్యవహారాలలో సానుకూలత తక్కువ. స్థిరాస్తి వ్యవహారాలు సరిగా సాగవు. మనస్పర్థలు, వృథా కాలక్షేపాలు విడనాడిన వారికి సౌఖ్యం ఉంటుంది. షేర్‌ వ్యాపారులకు అనుకూలత తక్కువ. విద్యార్థులు జాగ్రత్త వహించాలి. మే: ఆదాయం తక్కువగా ఉన్నా, ఖర్చులు నియంత్రించగలుగుతారు. పుణ్య, శుభకార్యాలలో పాల్గొంటారు. స్వేచ్ఛగా సంచరిస్తారు. ద్వితీయార్ధంలో వాహన సంబంధ చికాకులు ఉంటాయి. షేర్‌ వ్యాపారులకు కాలం బాగుంది. విద్యార్థులకు, రైతులకు ఈ నెల 15 తరువాత అసంతృప్తి ఉంటుంది. కళత్ర అవయోగాలు ఉంటాయి. జూన్‌: వాహన చికాకులు ఉంటాయి. పనిముట్ల వాడకంలో గాయపడే అవకాశం ఉన్నది. వృథా కాలక్షేపాలు చేస్తారు. మాటతీరు వల్ల కలహాలు, ఆరోగ్య సమస్యలు తరచుగా ఉంటాయి. పెంపుడు జంతువుల వలన ఇబ్బంది ఉంటుంది. చేసిన పనులకు గుర్తింపు దొరకదు. జులై: కొన్నిసార్లు ధైర్యంగా ఉంటారు. కొన్నిసార్లు తెలియని అధైర్యంతో తెలివి తక్కువ పనులు చేస్తూ ఉంటారు. కోర్టు వ్యవహారాలలో మంచి సలహాలు ఇచ్చేవారు ఉంటారు. ప్రశాంతత తగ్గుతుంది. ఉద్యోగ విధి నిర్వహణలో నిబద్ధత లేక అధికారుల ఆగ్రహావేశాలకు లోనవుతారు. ఆగస్ట్‌: సందర్భానుసారంగా ప్రవర్తింప లేకపోవడం, అందరినీ దూషించడం వంటి చేష్టలు అధికం అవుతాయి. సహకరిస్తారు అనుకున్న వారు సహకరించని స్థితి ఎదురవుతుంది. కొన్ని ముఖ్య వ్యవహారాలను మరచిపోయే అవకాశం ఉంటుంది. కుటుంబ కార్యక్రమాలలో పాల్గొంటారు. మాట తీరు అదుపులో ఉంచుకోవడం క్షేమం. సెప్టెంబర్‌: స్థానచలన ప్రయత్నాలు బాగా జరుగుతాయి. ఉద్యోగ వృద్ధిలో ఆటంకాలు ఉంటాయి. తల్లి దండ్రుల ఆరోగ్య విషయంలో చికాకులు రాగలవు. ప్రతి పనిలోనూ ఆర్థిక వెసులుబాటు తక్కువ. వ్యాపారులకు విచిత్ర పరిస్థితులు ఎదురవుతాయి. భార్యాభర్తలకు; యజమానికి, పనివారికి సయోధ్య సరిగా ఉండని కాలం. కొన్ని పాత సమస్యలు సానుకూలం చేసుకుంటారు. అక్టోబర్‌: కుటుంబంలో పెద్దల ఆరోగ్యం అనుకూలం. పిల్లల అభివృద్ధి వార్తలు వింటారు. అన్ని వ్యవహారాలు స్వయంగా చూసుకోవడం వలన విజయాలు సాధిస్తారు. మానసిక ఒత్తిడి, శారీరక శ్రమ ఉంటాయి. సమస్యలను ముందే గ్రహంచి. జాగ్రత్తలు పాటిస్తారు. భోజన వసతి విషయంలో జాగ్రత్తలు తీసుకుంటారు. కుటుంబ విషయాలకు ప్రాధాన్యం యిస్తారు. నవంబర్‌: అన్ని వ్యవహారాల్లోనూ సానుకూలత. ఆర్థిక ఇబ్బందులు దాటగలరు. స్నేహితుల సలహాలతో విజయాలు సాధిస్తారు. శ్రమ ఎక్కువ అవుతుంది. విద్యా వ్యాసంగం బాగా ఉంటుంది. ఋణ వ్యవహారాలలో మాట నిలబెట్టుకోలేరు. ఆదాయ వ్యయాలు సమతూకంగా ఉండవు. డిసెంబర్‌: కాలం అనుకూలం. క్రమంగా చాలా విజయాలు సాధిస్తారు. నూతన ప్రయోగాలు చేస్తారు. కుటుంబంలో మంచి మార్పులు ప్రారంభం అవుతాయి. ఒక్కో సమస్య పరిష్కరించే క్రమంలో మంచి సలహాలు అందుతాయి. అధికారుల సహకారం బాగుంటుంది. ఆరోగ్యం బాగుంటుంది. జనవరి: రోజువారీ పనులలోనూ బుద్ధి స్థిరత్వం ప్రదర్శించలేరు. కుటుంబ సభ్యుల సహకారం మాత్రం బాగుంటుంది. «ఖర్చుల నియంత్రణలో విఫలమవుతారు. పనులు స్వతంత్రంగా చేయడం శ్రేయస్కరం. నూతన ప్రయత్నాలు తగ్గించడం శ్రేయస్కరం. పాత సమస్యల విషయంలో మాత్రమే దృష్టి ఉంచండి. ఇతరులకు చేసే సహకారం ఇబ్బందికరం కాగలదు.ఫిబ్రవరి: వృత్తి్త విషయాలను స్వయంగా చూసుకోకపోతే భవిష్యత్తు ఇబ్బందికరం కాగలదు. ఉద్యోగ విషయాలలో మార్పులకు అవకాశం ఇవ్వవద్దు. ఆదాయం తగ్గుతుంది. కుటుంబ అవసరాలు తీర్చడంలో ఇబ్బంది పడతారు. పెద్దల ఆరోగ్యం ఇబ్బందికరం. ప్రతిపనిలోనూ అధిక ధనవ్యయం జరుగుతుంది. మార్చి: అత్యవసరమైన వృత్తి విషయాలు సమయ పాలన లేకుండా చేసి ఇబ్బందిపడతారు. ఋణాలు చికాకు పెడతాయి. స్వల్పంగా ఆరోగ్య సమస్యలు ఉంటాయి. నూతన ప్రయత్నాలకు సానుకూలత లేదు. వృథా ఖర్చు పెరుగుతుంది. పని ఒత్తిడి పెరుగుతుంది. తరచుగా వాతావరణ ప్రభావానికి లోనవుతుంటారు.


  రాశులలో నాలుగోది కర్కాటకం. ఇది సరి రాశి, జలతత్వం, సౌమ్య స్వభావం, శూద్రజాతి, రజోగుణం, రంగు తెలుపు, హృదయాన్ని సూచిస్తుంది. చర రాశి, స్త్రీ రాశి, దిశ ఉత్తరం. ఇందులో పునర్వసు 4వ పాదం, పుష్యమి, ఆశ్లేష నక్షత్రాలు పూర్తిగా ఉంటాయి. దీని అధిపతి చంద్రుడు. నివాస స్థానం చోళదేశం. ఇది చైనా, రష్యా, స్కాట్లాండ్, అల్జీరియా, గుజరాత్, సింధు పరిసర ప్రాంతాలను సూచిస్తుంది. తేయాకు, వెండి, ఊలు, పండ్లు, పాదరసం వంటి ద్రవ్యాలపై ప్రభావం కలిగి ఉంటుంది.
  
  కర్కాటక రాశిలో జన్మించిన వారు సౌమ్యస్వభావులు. నిరంతరం మార్పు కోరుకుంటూ ఉంటారు. ఇతరులతో ఇట్టే ఇమిడిపోగలరు. భావోద్వేగాలను ఏమాత్రం దాచుకోలేరు. అతి సున్నిత స్వభావం కారణంగా మానసికంగా కుంగుబాటుకు గురవుతారు. సానుభూతి కోరుకుంటారు. చిన్న చిన్న విషయాలకే తేలికగా సహనం కోల్పోతారు. ఇతరుల నిర్లక్ష్యాన్ని ఏమాత్రం తట్టుకోలేరు. అయితే, వీరి కోపం తాటాకు మంటలాంటిదే. చంద్రుని కళల్లో హెచ్చుతగ్గుల మాదిరిగానే కర్కాటక రాశి వారి ప్రవర్తనలోనూ తరచు హెచ్చుతగ్గులు ఉంటాయి. వీరికి లలిత కళలపై అభిరుచి, అభినివేశం ఎక్కువ.
  
  ఒక్కోసారి పిరికిగా అనిపిస్తారు. కొన్ని సందర్భాల్లో అమిత ధైర్యసాహసాలను ప్రదర్శిస్తారు. పారదర్శకమైన స్వభావం వల్ల సమర్థంగా జనాలకు నాయకత్వం వహించగలుగుతారు. శ్రమించే స్వభావం వల్ల ఏ రంగంలో ఉన్నా, ప్రత్యేకతను చాటుకుంటారు. ఎలాంటి పరిస్థితుల్లోనైనా తేలికగా సర్దుకుపోగలరు. ఎవరైనా బెదిరింపులకు దిగితే మాత్రం మొండిగా ఎదుర్కొంటారు. నిజాయితీ, నిర్భీతి వీరి సహజ లక్షణాలు. ఎక్కువగా ఊహల్లో తేలిపోతుంటారు. నిర్విరామంగా ఏదో ఒక పనిలో నిమగ్నం కావడంలోనే సంతోషం వెదుక్కొంటారు. యుక్తవయసులో తరచు అనారోగ్యానికి గురవుతూ ఉంటారు. ముఖ్యంగా శ్వాసకోశ, జీర్ణకోశ, నాడీ సంబంధిత సమస్యలతో బాధపడతారు.
  
   గ్రహగతులు అనుకూలించకుంటే, తరచుగా మానసిక వ్యాకులతకు, అభద్రతా భావానికి లోనవుతారు. ఇతరులు తమకు చేసిన హానిని తేలికగా మరువలేక, ప్రతీకారేచ్ఛతో రగిలిపోతారు. తమను అర్థం చేసుకునే వారు ఎవరూ లేరనే అపోహతో నిత్యం దిగులుతో కుమిలిపోతారు. కార్యదక్షులు కావడం వల్ల వీరు మేనేజ్‌మెంట్ ఉద్యోగాల్లో, స్వతంత్ర వ్యాపారాల్లో బాగా రాణించగలరు. ఆరోగ్య, విద్యా, ఆతిథ్య, వ్యవసాయ, న్యాయవాద రంగాలు వీరికి బాగా నప్పుతాయి. చరిత్ర పరిశోధకులుగా, రచయితలుగా, పాత్రికేయులుగా, సంగీతవేత్తలుగా, కళాకారులుగా కూడా వీరు తమ ప్రత్యేకతను నిరూపించుకోగలరు.
  (వచ్చేవారం సింహరాశి గురించి...)