టీ20, టెస్ట్‌లకు రిటైర్మెంట్‌.. రోహిత్‌, కోహ్లి తదుపరి ఆడబోయే మ్యాచ్‌లు ఇవే..!

టీ20లకు, టెస్ట్‌లకు రిటైర్మెంట్‌ ప్రకటిం​చిన టీమిండియా దిగ్గజ బ్యాటర్లు, కెప్టెన్లు రోహిత్‌ శర్మ, విరాట్‌ కోహ్లి ఇకపై వన్డేల్లో మాత్రమే కనిపిస్తారు. ఈ ఇద్దరు 2027 ప్రపంచకప్‌ వరకు ఆడి 50 ఓవర్ల ఫార్మాట్‌ నుంచి కూడా తప్పుకుంటారని తెలుస్తుంది. అయితే ఈ మధ్యలో రోహిత్‌, కోహ్లి భారత్‌ తరఫున ఎన్ని వన్డేలు ఆడతారని క్రికెట్‌ అభిమానులు ఆరా తీయడం మొదలుపెట్టారు.

ఫ్యూచర్‌ టూర్‌ ప్రోగ్రాం ప్రకారం భారత్‌ 2027 వన్డే వరల్డ్‌కప్‌ వరకు 9 సిరీస్‌ల్లో 8 మంది ప్రత్యర్థులపై 27 మ్యాచ్‌లు ఆడే అవకాశం ఉంది. ప్రస్తుతం ఐపీఎల్‌-2025తో బిజీగా ఉన్న భారత ఆటగాళ్లు క్యాష్‌ రిచ్‌ లీగ్‌ ముగిసిన వెంటనే ఐదు మ్యాచ్‌ల టెస్ట్‌ సిరీస్‌ కోసం ఇంగ్లండ్‌ పర్యటనకు బయల్దేరతారు. 

అక్కడ ఆగస్ట్‌ వరకు 4 వరకు గడపనున్న భారత్‌.. అదే నెల 17వ తేదీ నుండి బంగ్లాదేశ్‌లో పర్యటించనుంది. ఇక్కడి నుండి టీమిండియా వన్డే క్రికెట్‌ షెడ్యూల్‌ మొదలుకానుంది.

• బంగ్లాదేశ్‌ పర్యటనలో టీమిండియా మూడు వన్డేలు ఆడనుంది. రోహిత్‌, కోహ్లి ఈ సిరీస్‌లో చెలరేగే అవకాశం ఉంది. బంగ్లాదేశ్‌లో స్పిన్‌ ఫ్రెండ్లీ పిచ్‌లు ఉండటంతో రోకోను ఆపడం బంగ్లా బౌలర్లకు పెద్ద సవాలే అవుతుంది.

• అనంతరం భారత్‌ అక్టోబర్‌, నవంబర్‌ మాసాల్లో ఆస్ట్రేలియాలో పర్యటించనుంది. ఈ పర్యటనలో టీమిండియా మూడు వన్డేలు (5 టీ20లు కూడా ఆడుతుంది) ఆడనుంది.

• ఈ ఏడాది చివర్లో టీమిండియా స్వదేశంలో సౌతాఫ్రికాతో ఆల్‌ ఫార్మాట్‌ సిరీస్‌లు ఆడనుంది. ఈ పర్యటనలో సౌతాఫ్రికా టీమిండియాతో రెండు టెస్ట్‌లు, 5 టీ20లు సహా మూడు వన్డేలు ఆడనుంది.

• వచ్చే ఏడాది (2026) జనవరిలో భారత్‌ స్వదేశంలో న్యూజిలాండ్‌తో మూడు వన్డేల్లో తలపడనుంది. ఈ సిరీస్‌లో కూడా విరాట్‌, రోహిత్‌ తమదైన మార్కును చూపించే అవకాశం ఉంది.

• అనంతరం​ చాలా గ్యాప్‌ తర్వాత జూన్‌లో భారత్‌ స్వదేశంలో ఆఫ్ఘనిస్తాన్‌తో తలపడనుంది. ఈ పర్యటనలో ఆఫ్ఘన్లు టీమిండియాతో మూడు వన్డేలు ఆడనున్నారు. స్వదేశంలో ఆడబోయే సిరీస్‌ కావడంతో ఈ సిరీస్‌లో కూడా రోకో చెలరేగే అవకాశం ఉంది.

• జూలైలో భారత్‌ ఇంగ్లండ్‌లో పర్యటించి మూడు వన్డేలు ఆడనుంది. ఈ పర్యటనలో రోహిత్‌, కోహ్లి సవాళ్లు ఎదుర్కొనే అవకాశం ఉంది.

• సెప్టెంబర్‌, అక్టోబర్‌ నెలల్లో భారత్‌ స్వదేశంలో వెస్టిండీస్‌తో మూడు వన్డేలు ఆడనుంది.

• అక్టోబర్‌, నవంబర్‌ మాసాల్లో టీమిండియా స్వదేశంలో న్యూజిలాండ్‌తో మూడు వన్డేలు ఆడనుంది.

• డిసెంబర్‌లో భారత్‌ స్వదేశంలో శ్రీలంకతో మూడు మ్యాచ్‌ల వన్డే సిరీస్‌ ఆడుతుంది.

దీని తర్వాత భారత్‌ 2027లో సౌతాఫ్రికా, జింబాబ్వే, నమీబియా సంయుక్తంగా ఆతిథ్యమిచ్చే వన్డే వరల్డ్‌కప్‌లో పాల్గొంటుంది. ఈ మెగా టోర్నీ రోహిత్‌-కోహ్లిల జమానాకు చివరిదయ్యే అవకాశం ఉంది. ఈ మధ్యలో ఏవైనా వ్యక్తిగత ఇబ్బందులు ఎదురైతే తప్ప రోహిత్‌, కోహ్లి దాదాపుగా అన్ని మ్యాచ్‌లు ఆడే అవకాశం ఉంది. దిగ్గజాలు వన్డే వరల్డ్‌కప్‌తో తమ క్రికెట్‌ ప్రస్తానాన్ని ముగిస్తారేమో చూడాలి.