శరన్నవరాత్రి శోభ

ఆదివారం శ్రీ 4 శ్రీ అక్టోబర్‌ శ్రీ 2026
శ్రీమందిరానికి

భువనేశ్వర్‌: పూరీ జగన్నాథ స్వామి ఆలయంలో శరన్నవరాత్రులు సందర్భంగా నిర్వహించే విశిష్టమైన దుర్గా మాధవ ఉపాసనకు మూలాష్టమి సందర్భంగా శనివారం శ్రీకారం చుట్టారు. పదహారు రోజులపాటు జరిగే ఈ ఆరాధనను షోడశ పూజలు లేదా షోళ పూజలుగా వ్యవహరిస్తారు. ఈ ఉత్సవంలో భాగంగా తొలి ఎనిమిది రోజులు దుర్గా మాధవులు విమలా దేవి ఆలయంలో పూజలందుకోగా, చివరి ఎనిమిది రోజులపాటు నారాయణి ఆలయానికి వేంచేస్తారు. ఈ సంప్రదాయాన్ని శాక్త గుండిచా యాత్ర లేదా గుప్త గుండిచా యాత్రగా వ్యవహరిస్తారు. ఈ యాత్ర అక్టోబర్‌ 11న ప్రారంభం కానుంది.

సహస్ర కుంభాభిషేకం

షోడశ పూజల ప్రారంభ సందర్భంగా శ్రీమందిరంలో విమలా దేవికి సహస్ర కుంభాభిషేకం నిర్వహించడంతోపాటు రత్న భాండాగారం నుంచి తీసుకువచ్చిన దుర్గాదేవి స్వర్ణ విగ్రహానికి ఉత్థాపనాది క్రతువులను సంప్రదాయబద్ధంగా నిర్వహిస్తారు. సహస్ర కుంభాభిషేకం ఈ ఉత్సవంలో అత్యంత విశిష్టమైన ఘట్టంగా నిలుస్తుంది. శరన్నవరాత్రుల సందర్భంగా శ్రీక్షేత్రం సంప్రదాయంలో మాధవుడు శ్రీజగన్నాథ స్వామి తత్త్వానికి ప్రతీకగా, దుర్గాదేవి ఆదిపరాశక్తి స్వరూపంగా పూజలందుకుంటారు. షోడశ పూజల్లో తొమ్మిదో రోజైన అక్టోబర్‌ 11 నుంచి చివరి ఎనిమిది రోజులపాటు దుర్గా మాధవులను ప్రత్యేక విమానంలో నారాయణి ఆలయానికి తీసుకెళ్తారు. అక్కడ పూజలు నిర్వహించిన అనంతరం తిరిగి శ్రీమందిరానికి తీసుకొస్తారు. జగన్నాథ స్వామి వార్షిక రథయాత్రలో గుండిచా ఆలయానికి జరిగే యాత్రకు ఉన్న ప్రాధాన్యాన్ని పోలిన ఆధ్యాత్మిక విశిష్టత ఈ సంప్రదాయానికి ఉందని భక్తులు భావిస్తారు. అయితే ఇది దుర్గా మాధవుల ఉత్సవ విగ్రహాలకు సంబంధించిన ప్రత్యేక ఆలయ సంప్రదాయం.

విమలా దేవి ఆరాధన

శరన్నవరాత్రులు పురస్కరించుకొని శ్రీమందిరంలోని విమలా దేవికి విశేష పూజలు నిర్వహిస్తారు. మహా సప్తమి, మహాష్టమి, మహా నవమి పర్వ దినాల్లో ప్రత్యేక పూజలు, భోగ సమర్పణలు, హారతులు ఆలయ సంప్రదాయాల ప్రకారం జరుగుతాయి. ఈ సేవలను అర్చకులు, సంబంధిత సేవకులు సంప్రదాయబద్ధంగా నిర్వహిస్తారు. దుర్గా మాధవ ఉపాసనలో అంతర్లీనంగా ఉన్న ప్రధాన భావన విష్ణు – శక్తి తత్త్వాల సమన్వయం. మాధవుడు విష్ణు స్వరూపానికి, దుర్గాదేవి ఆదిపరాశక్తికి ప్రతీకలుగా భావించబడతారు. వీరిద్దరినీ కలిపి ఆరాధించడం ద్వారా శాక్త, వైష్ణవ సంప్రదాయాల మధ్య ఉన్న ఆధ్యాత్మిక అనుబంధం ప్రతిబింబిస్తుంది. విమలా దేవి ఆరాధన, దుర్గా మాధవుల ప్రత్యేక పూజలు, శాక్త గుండిచా యాత్ర వంటి ఆచారాలతో కూడిన షోడశ పూజలు పూరీ శ్రీజగన్నాథ సంస్కృతిలో విశిష్ట స్థానం కలిగి ఉన్నాయి. శతాబ్దాలుగా కొనసాగుతున్న ఈ సంప్రదాయం శ్రీక్షేత్రం ఆధ్యాత్మిక వైభవానికి, ఒడిశా ఆలయ సంస్కృతిలోని వైవిధ్యానికి ప్రతీకగా నిలుస్తోంది.

ప్రారంభమైన దుర్గా మాధవ

ఉపాసన

మూలాష్టమితో షోడశ పూజలకు శ్రీకారం

ఈనెల 11 నుంచి శాక్త

గుండిచా యాత్ర