జై తెలంగాణ.. 12 ఏండ్ల పాలన

● ఊరూవాడ ఏకమై.. అడుగులన్నీ ఒక్కటై.. ● తెలంగాణ నినాదమే ప్రతిఒక్కరి ఊపిరై.. ● ఉద్యమించిన నిర్మల్‌ బిడ్డలు.. ● ప్రాణాలనూ అర్పించిన అమరవీరులు ● పుష్కరకాలంలో గణనీయంగా మార్పులు ● కడెం మండలంలో జేఏసీ నాయకులు కడెం నుంచి కొండగట్టు హనుమాన్‌ ఆలయం వరకు పాదయాత్ర చేశారు. ● ఖానాపూర్‌ మండలంలో ఉద్యమం ఉవ్వెత్తున సాగింది. అప్పటి ఎంపీ రాథోడ్‌రమేశ్‌కు వ్యతిరేకంగా నినదించింది. ఉద్యమకారులు అమంద శంకర్‌ పొర్లుదండాలు పెడితే.. విజయలక్ష్మి ఖానాపూర్‌ నుంచి ఆదిలాబాద్‌ వరకు పాదయాత్ర చేశారు. ● మామడ మండలం పొన్కల్‌లో ఏకంగా అప్పటి రాష్ట్ర మంత్రి కోమటిరెడ్డి వెంకట్‌రెడ్డినే అడ్డుకున్నారు. తెలంగాణ ఇచ్చేదాకా ఇటువైపు రావొద్దని నినదించారు. ● దిలావర్‌పూర్‌(ప్రస్తుత నర్సాపూర్‌తోపాటు) మండలం రాంపూర్‌లో యువకులు బస్సు అద్దాలను పగలగొట్టి ఆవేశాన్ని చాటారు. అప్పటి జేఏసీ చైర్మన్‌ కోదండరామ్‌ దిలావర్‌పూర్‌ మండలం కదిలె ఆలయానికి వచ్చి మొక్కుకున్నారు. ● కుంటాల మండలం ఓలకు చెందిన పోరుబిడ్డ కూస వనిత ముధోల్‌మండలం కిర్గుల్‌(బి)లో మంత్రి కోమటిరెడ్డి వెంకట్‌రెడ్డి సభలో తెలంగాణ పొలికేక పెట్టింది. ● కుభీర్‌ మండలంలో వికలాంగుడైన పుప్పాల పీరాజీ చెప్పులు లేకుండానే తిరిగారు. ● తానూర్‌ మండలంలోని భోసిలో సాధారణ హోటల్‌ నడుపుకునే బామన రాఘవులు తొలిసారిగా జిల్లాలో మూడురోజుల పాటు ఆమరణ నిరాహార దీక్ష చేశారు. ● చదువుల తల్లి కొలువైన బాసర ట్రిపుల్‌ఐటీలో తెలంగానం హోరెత్తింది. ● నిర్మల్‌లో ఆర్డీవో కార్యాలయం వద్ద ప్రతిరోజూ నిరసనలు, నిరాహార దీక్షలను చేపట్టారు. ● ఉద్యమం జరుగుతున్న తీరుపై రీసెర్చ్‌ కోసం అప్పట్లో ఓ జర్మన్‌ యువతి రావడం విశేషం.

2016 అక్టోబర్‌ 12 విజయదశమి రోజున నిర్మల్‌ ప్రాంతం 19మండలాలతో కొత్త జిల్లాగా ఏర్పడింది.

స్వరాష్ట్రంలో నిర్మల్‌ ఎమ్మెల్యేగా గెలుపొందిన అల్లోల ఇంద్రకరణ్‌రెడ్డి పదేళ్లపాటు రాష్ట్ర మంత్రిగా కొనసాగారు.

తెలంగాణ ఏర్పడిన తర్వాత జిల్లాకు దక్కిన అతిపెద్ద బహుమతి నిర్మల్‌లో మెడికల్‌ కాలేజీ ఏర్పాటు. 2022 ఆగస్టు 9న వైద్య కళాశాలను మంజూరు చేశారు.

వైద్యరంగంలో గతంలో ఊహించని విధంగా ఐసీయూ, డయాలసిస్‌, డయాగ్నోస్టిక్‌సెంటర్‌లు వచ్చాయి.

ౖఇప్పటికీ జిల్లా పారిశ్రామికంగా, విద్యపరంగా అభివృద్ధికి నోచుకోవడం లేదు. రైల్వేలైన్‌, ఇంజినీరింగ్‌ కాలేజీ, నవోదయ విద్యాలయం, పర్యాటకాభివృద్ధి ఇవన్నీ అందని ద్రాక్షలుగానే ఉన్నాయి.