మోగనుంది పెళ్లి బాజా

మోగనుంది పెళ్లి బాజా పెనుగంచిప్రోలు: కల్యాణ వీణ మోగే వేళ దగ్గరకొస్తోంది. మూడు నెలల విరామం తర్వాత సుముహూర్తాలు రావడంతో శుభకార్యాల సందడి మొదలుకానుంది. గతేడాది నవంబర్‌ 26 నుంచి ఫిబ్రవరి 13 వరకు మూఢం కావటంతో వివాహాది శుభకార్యాలకు ముహూర్తాలు లేవు. మాఘ మాసం శుభప్రదమైనా మూఢం కారణంగా ఈ నెల 18 వరకు ముహూర్తాలు లేవు. ఎట్టకేలకు ఈ నెల 19 నుంచి ఫాల్గుణమాసం మొదలు కావడంతో ఉమ్మడి జిల్లాలో పలువురు శుభకార్యాలకు సిద్ధమవుతున్నారు. శుభకార్యాల సీజన్‌ కావడంతో ఊరువాడా సందడి మొదలు కానుంది. పచ్చని పందిళ్లు, ముత్యాల తలంబ్రాలు, పెద్దల దీవెనలతో జంటలు ఒక్కటికానున్నాయి. వివాహాలతో పాటు గృహ ప్రవేశాలు, ఉపనయనాలు, నిశ్చితార్థాలులు జరగనున్నాయి. ఇప్పటికే రెండు, మూడు నెలల ముందు నుంచి సంబంధాలు కుదుర్చుకున్న జంటల తల్లిదండ్రులు కల్యాణ మండపాలు మాట్లాడటం, బంగారం, పట్టుబట్టలు ఇతర సామగ్రి కొనుగోలును ముమ్మరంగా చేస్తున్నారు. పల్లెలు పట్టణాలు తేడా లేకుండా అన్నిచోట్లా బాజాభజంత్రీలు మార్మోగనున్నాయి. శుభఘడియలు రానుండటంతో చాలా వర్గాల వారికి ఉపాధి దొరకనుంది. 20 నుంచి 25 వర్గాలకు ఉపాధి లభించనుంది. ప్రధానంగా పురోహితులు, షామియానా సెట్టింగ్‌లు, వాయుద్య కళాకారులు, ఫొటో, వీడియో గ్రాఫర్స్‌, ఆర్కెస్ట్రా, క్యాటరింగ్‌, బ్యూటీ పార్లర్‌, ట్రావెల్‌ ఏజెన్సీలకు డిమాండ్‌ ఏర్పడింది. చాలామంది ఇప్పటికే బుక్‌ చేసుకోవటంతో వాటికి డిమాండ్‌ పెరిగింది. ఈ ఏడాది ఫిబ్రవరితో పాటు మార్చి, ఏప్రిల్‌, మే, జూన్‌, ఆగష్టు, నవంబర్‌, డిసెంబర్‌ నెలల్లో ఎక్కువగా పెళ్లిళ్లు జరగనున్నాయని పండితులు చెబుతున్నారు.

ముగియనున్న మూడు నెలల మూఢం వివాహాలు, గృహప్రవేశాల సందడి ఉమ్మడి జిల్లాలో వివిధ రంగాల వారికి ఉపాధి