సర్పంచ్‌ గిరి.. ‘నల్లకోటు’ గురి

పంచాయతీ ఎన్నికల్లో సోషల్‌ మీడియా హవా
నామినేషన్‌ అయితే వేద్దాం..

జగిత్యాలజోన్‌: ఉమ్మడి జిల్లాలో వివిధ కోర్టుల్లో దాదాపు 3,000 మంది న్యాయవాదులు ఉంటారు. ఎప్పుడు కోర్టుల్లో నల్లకోటు వేసుకుని, నాలుగు గోడల మధ్య ఉండే న్యాయవాదులు పంచాయతీ ఎన్నికల పుణ్యమా అని ప్రజల్లోకి వెళ్లేందుకు ఆరాటపడుతున్నారు. దాదాపు 90 శాతం న్యాయవాదులు గ్రామాల నుంచి వచ్చి ఆయా కోర్టుల్లో ప్రాక్టీస్‌ చేస్తున్నవారే. ప్రజలతో ఉన్న సంబంధాలతో పాటు రిజర్వేషన్లు కూడా అనుకూలించడంతో పోటీకి సై అంటున్నారు. వివిధ కోర్టుల నుంచి ఐదారుగురు న్యాయవాదులు పోటీ చేసేందుకు ఉత్సాహం చూపుతున్నారు. జగిత్యాల జిల్లాలో పోటీ చేసే న్యాయవాదుల సంఖ్య ఎక్కువగా ఉంది. గత పంచాయతీ ఎన్నికల్లో కొంతమంది న్యాయవాదులు సర్పంచ్‌లుగా గెలుపొందగా, ఇప్పుడు వారిని చూసి మరికొందరు పోటీ చేసేందుకు ప్రయత్నిస్తున్నారు. ఇప్పటికీ కొన్ని గ్రామాల్లో ఆయా సామాజిక వర్గాల్లో పెద్దగా చదువుకున్న వారు లేకపోవడం, ఏదైనా సమస్య వస్తే గట్టిగా మాట్లాడేవారు కరువవడంతో న్యాయవాదులుగా ఉన్నవారిని పోటీ చేయాలని కులసంఘాలే డిమాండ్‌ చేస్తూ గ్రామాలకు పిలుస్తున్నాయి.

జగిత్యాలజోన్‌: గ్రామ పంచాయతీ ఎన్నికల్లో సర్పంచ్‌లుగా పోటీ చేస్తున్న అభ్యర్థులు సోషల్‌ మీడియా ప్రచారాన్ని విస్త్రృతంగా వాడుకుంటున్నారు. వివిధ రకాల యాప్‌లు అందుబాటులోకి రావడంతో తమకు ఉన్న పరిజ్ఞానంతో ఫొటోలు, వీడియోలతో ఎన్నికల పాటలు చిత్రీకరించి, ఓటర్లకు దగ్గరయ్యేందుకు ప్రయత్నిస్తున్నారు. ఆ పాటలన్నీ కూడా యువతను ఉత్తేజపరిచేలా, మహిళలను గౌరవించే విధంగా, గ్రామాభివృద్ధికి పాటు పడేలా, పోటీ చేస్తున్న నాయకుడిని పొగిడేలా.. ఇప్పటికే ట్రెండ్‌లో ఉన్న రాజకీయ, సినిమా, జానపద పాటలను వాడుకుంటున్నారు. ఇందుకోసం, గ్రామంలో కులాల వారీగా, యువజన సంఘల వారీగా, మహిళల గ్రూపుల వారీగా వాట్సాప్‌ గ్రూపులు ఏర్పాటు చేసి పోస్ట్‌ చేస్తూ ప్రచారం చేసుకుంటున్నారు. తాము గెలిస్తే గ్రామాభివృద్ధికి చేయబోయే పనులను కూడా ఆ గ్రూపుల్లో పోస్టు చేస్తున్నారు. ఇది చాలదన్నట్టూ తమ బంధువులు, అనుయాయుల సెల్‌ఫోన్లలో స్టేటస్‌లుగాను, ఫేస్‌బుక్‌, ఇన్‌స్ర్ట్రాగామ్‌ల్లో సైతం పోస్టులు పెడుతున్నారు. కొందరు అభ్యర్థులు తమ ఫొటోలతో డిజైన్‌ చేయించి, గ్రూపుల్లో పెడుతూ ఓటర్లను ఆకర్షించే పనిలో పడ్డారు. వాయిస్‌ మేసేజ్‌లను కూడా జత చేస్తున్నారు.

రాయికల్‌(జగిత్యాల): సర్పంచ్‌ ఎన్నికల్లో రిజర్వేషన్లు ఖరారు కావడంతో కొంత మంది ఎలాగైనా బరిలో ఉండాలని ఉద్దేశంతో ముందు నుంచే ఓటర్లను ప్రసన్నం చేసుకునేందుకు ప్రయత్నాలు ముమ్మరం చేశారు. కాగా, మరికొంత మంది తూతూమంత్రంగా నామినేషన్లు వేసి నామినేషన్ల ఉపసంహరణ సమయంలో ఆలోచిద్దామని వారి నుంచి ఎంతో కొంత తీసుకోవచ్చనే ఆలోచనతో నజరానాకు ఆశపడి నామినేషన్లకు సిద్ధమవుతున్నారు. గ్రామాల్లో బరిలో నిలిచే సర్పంచ్‌ అభ్యర్థులు ఎలాగైనా పోటీ ఉండొద్దనే ఉద్దేశంతో నామినేషన్లు వేసిన వారిని ఉపసంహరించుకునేలా నజరానాలు ప్రకటిస్తున్నారు. కొంత మంది డమ్మీగా నామినేషన్‌ వేసిన అభ్యర్థులను పట్టించుకోకపోవడంతో ఏకంగా డమ్మీ అభ్యర్థులే సర్పంచ్‌ అభ్యర్థులకు దగ్గరగా ఉండే వారితో స్నేహం చేస్తూ ఎంతో కొంత నజరానా ఇస్తే తాము కూడా తప్పుకుంటామంటూ సంప్రదింపులు చేసుకుంటున్నారు. ఏదేమైనా గ్రామాల్లో అసలు అభ్యర్థులకంటే సర్పంచ్‌గా నామినేషన్లు వేసిన కొసరు అభ్యర్థులతోనే పెద్ద తలనొప్పిగా మారింది.

యువ ఓటర్లకు గాలం

జగిత్యాలరూరల్‌: స్థానిక సంస్థల ఎన్నికల్లో విజయం సాధించడంలో ఒకటి, రెండు ఓట్లు సైతం కీలకంగా మారుతాయి. గ్రామాల్లో సర్పంచ్‌, వార్డు సభ్యుల ఎన్నికల్లో ఓటింగ్‌ శాతం కూడా అధికంగా పెరుగుతుంది. దీంతో పోటీచేసే అభ్యర్థులంతా ఇటీవల ఓటు హక్కు వచ్చి హైదరాబాద్‌, బెంగుళూరు తదితర ప్రాంతాల్లో చదువుకుంటున్న, ఉద్యోగాలు చేస్తున్న యువ ఓటర్లను ఫోన్లలో సంప్రదిస్తున్నారు. వారి ఖర్చుల నిమిత్తం ఫోన్‌పే ద్వారా డబ్బులు పంపిస్తూ యువ ఓటర్లను ఆకట్టుకుంటున్నారు. ఎన్నికల రోజు స్వగ్రామానికి వచ్చి ఓటు వేసేందుకు పోటీదారులు కార్లు, బస్సులు కూడా ఏర్పాటు చేసి ఓటర్లను ఆకట్టుకుంటున్నారు.

పనుల వేళ.. ఎన్నికల గోల

మానకొండూర్‌: పంచాయతీ ఎన్నికలంటేనే గ్రామాల్లో సందడి నెలకొంటుంది. ఎంతో ఆసక్తిగా ఎదురుచూస్తున్న పంచాయతీ ఎన్నికలు వ్యవసాయ పనులు జోరుగా ఉన్న సమయంలోనే రావడంతో పోటీ చేసే ఆశావహులు ప రుగులు తీస్తున్నారు. ఇటు వ్యవసాయ పనులు, అటు ఎన్నికలతో తలమునకలవుతున్నారు. గ్రామీణ ప్రాంతాలవారికి 90 శాతం జీవనాధారం వ్యవసాయ పనులపైనే. కూలీ పనులు చేసుకునే వారికి ఈ సమయమే ఎంతో కీలకం. మరోవైపు ధాన్యం కొనుగోళ్లు కొనసాగుతున్నాయి. రబీ సాగు మొదలైంది. రైతులు వరినార్లు పోస్తున్నారు. ఓ వైపు సాగు పనులు జోరందుకోగా, పంచాయతీ ఎన్నికల ప్రక్రియ మొదలవడంతో ఆశావహులు ఆగమాగం అవుతున్నారు. బ్యాంకు అకౌంట్‌, ధ్రువీకరణ పత్రాల కోసం కార్యాలయాలకు పరుగులు తీస్తున్నారు. ఫ్లెక్సీ, బ్యానర్లు, కరపత్రాలు, ఓటరు జాబితాలను సిద్ధం చేస్తున్నారు. కాగా, ఎన్నికల కారణంగా సాగుపనులు ఆలస్యమయ్యే అవకాశం లేకపోలేదని రైతులు భావిస్తున్నారు.

సర్పంచ్‌ గిరి.. ‘నల్లకోటు’ గురి