యూఐడీఎఫ్‌ పనుల్లో గందరగోళం

● జిల్లాలోని జగిత్యాల, కోరుట్ల, మెట్‌పల్లి మున్సిపాలిటీల్లో నీటి సరఫరా, వర్షం నీటి కాల్వలు, డ్రైనేజీలు, మురుగు నీటి నిర్వాహణ వంటి వసతుల ఏర్పాటు కోసం కేంద్ర ప్రభుత్వం యూఐడీఎఫ్‌ కింద రూ.98.19కోట్లు మంజూరు చేసింది. ● ప్రభుత్వం ఈ నిధులను నేరుగా ఇవ్వకుండా నేషనల్‌ హౌజింగ్‌ బ్యాంకు ద్వారా రుణ సహాయం చేస్తోంది. ● రుణాన్ని ఆయా మున్సిపాలిటీలు ఏడేళ్లలోపు రెండేళ్ల మారటోరియం కాలంతో సహా ఐదు వార్షిక వాయిదాలతో తిరిగి చెల్లించాల్సి ఉంటుంది. ● ప్రస్తుతం మూడు మున్సిపాలిటీల ఆర్థిక పరిస్థితి అంతంత మాత్రంగానే ఉంది. అయినా వసతుల కల్పనకు రుణాన్ని తీసుకోవడానికి అంగీకారం తెలిపాయి. ● మూడు పట్టణాల్లో ఈ నిధులతో చేపట్టే పనులకు గత జనవరి నెలలో అధికారులు టెండర్లు పిలిచారు. ఇప్పటివరకు నేషనల్‌ బ్యాంకు నుంచి మున్సిపాలిటీలకు రుణం మంజూరు కాలేదు. ● టెండర్ల సమయంలో కొన్ని పనులకు కాంట్రాక్టర్లు షెడ్యూళ్లు దాఖలు చేయలేదు. వీటికి పలుమార్లు టెండర్లు పిలిచినప్పటికీ ఎవరూ ముందుకు రావడం లేదు. ● మరోవైపు మంజూరులో తీవ్ర జాప్యం జరుగుతుండడంతో పనులు దక్కించుకున్న కాంట్రాక్టర్లు వాటిని మొదలు పెట్టడానికి తర్జనభర్జన పడుతున్నారు. ● మెట్‌పల్లిలో మొత్తం 11 పనులు ఉంటే ఇప్పటివరకు ఒక్కచోట డ్రైనేజీ మాత్రమే పూర్తికావడం గమనార్హం. ● జగిత్యాల, కోరుట్లలో టెండర్లు పూర్తయినా పనులు ఇంకా మొదలుపెట్టనట్లు తెలిసింది. ● టెండర్ల ప్రక్రియ పూర్తయినప్పటికీ పనులు చేయకుండా జాప్యం ప్రదర్శిస్తున్న కాంట్రాక్టర్లకు మెట్‌పల్లిలో అధికారులు నోటీసులు జారీ చేశారు. ● పనులు వెంటనే ప్రారంభించాలని, లేకుంటే నిబంధనల ప్రకారం చర్యలు తీసుకుంటామని అందులో పేర్కొన్నారు. ● అధికారుల తీరును కాంట్రాక్టర్లు తప్పుబడుతున్నారు. పనులు చేసిన తర్వాత రుణం మంజూరు కాకుంటే తమ పరిస్థితి ఏంటని వారు ప్రశ్నిస్తున్నారు. ● ఇప్పటికే గతంలో చేసిన పలు పనుల బిల్లులు ఏళ్లుగా పెండింగ్‌లో ఉన్నాయని, దీనిని దృష్టిలో పెట్టుకునే తాము యూఐడీఎఫ్‌ పనుల విషయంలో తొందరపడడం లేదని చెబుతున్నారు.

బ్యాంకు రుణం మంజూరు కాకముందే టెండర్లు పనులు మొదలు పెట్టేందుకు కాంట్రాక్టర్ల తర్జనభర్జన జాప్యంపై అధికారుల నోటీసులు