న్యూఢిల్లీ: ఐడియా సెల్యులర్ కంపెనీలో 3.47% వాటాను ప్రైవేట్ ఈక్విటీ సంస్థ ప్రావిడెన్స్ ఈక్విటీ పార్ట్‌నర్స్‌రూ.1,388 కోట్లకు విక్రయించింది. బహిరంగ మార్కెట్ లావాదేవీల ద్వారా మొత్తం 12.50 కోట్ల షేర్ల(3.47% వాటా)ను ప్రావిడెన్స్ ఈక్విటీ పార్ట్‌నర్స్ తన ఇన్వెస్ట్‌మెంట్ విభాగం పీ5 ఏషియా ఇన్వెస్ట్‌మెంట్(మారిషస్) ద్వారా విక్రయించింది. మార్చి క్వార్టర్ నాటికి ఐడియా సెల్యులర్‌లో ఈక్విటీ పార్ట్‌నర్స్ సంస్థకు 6.8% వాటా ఉంది.
 మరో వైపు మోర్గాన్ స్టాన్లీ ఏషియా(సింగపూర్) పీటీఈ సంస్థ ఐడియా సెల్యులర్‌కు చెందిన 6.66 కోట్ల ఈక్విటీ షేర్లను రూ.736 కోట్లకు కొనుగోలు చేసింది.  2014, సెప్టెంబర్‌లో ప్రావిడెన్స్ సంస్థ 2.4% వాటాను రూ.1,414 కోట్లకు విక్రయించింది. భారత్‌లో మూడవ అతి పెద్ద టెలికం ఆపరేటర్‌గా ఉన్న ఐడియా సెల్యులర్ వినియోగదారుల సంఖ్య 16 కోట్లుగా ఉంది. గత ఆర్థిక సంవత్సరం నాలుగో త్రైమాసిక కాలంలో కంపెనీ నికర లాభం 39 శాతం తగ్గింది.


 న్యూఢిల్లీ: ఐడియా సెల్యులర్ కంపెనీ ఈ ఆర్థిక సంవత్సరం రెండో త్రైమాసిక కాలంలో రూ.809 కోట్ల నికర లాభం ఆర్జించింది. గత ఆర్థిక సంవత్సరం క్యూ2 నికర లాభం(రూ.759 కోట్లు)తో పోల్చితే 7 శాతం వృద్ధి సాధించామని కంపెనీ తెలిపింది. నాన్ వాయిస్ కాల్స్ ఆదాయం పెరగడం వల్ల నికర లాభంలో వృద్ధి సాధించామని పేర్కొంది. గత క్యూ2లో రూ.7,570 కోట్లుగా ఉన్న మొత్తం ఆదాయం ఈ  క్యూ2లో రూ.8,689 కోట్లకు పెరిగిందని పేర్కొంది. అయితే సీక్వెన్షియల్ ప్రాతిపదికన చూస్తే గత క్యూ1లో సాధించిన నికర లాభం(రూ.931 కోట్లు)తో పోల్చితే ఈ క్యూ2లో నికర లాభం 13 శాతం క్షీణించింది.
  
 రూ.1,727 కోట్ల మూలధన పెట్టుబడులు...
 ఈ క్యూ2లో వాయిస్ రేట్ ఈ ఏడాది క్యూ1 వాయిస్ రేట్‌తో పోల్చితే 0.2 పైసలు తగ్గి 32.7 పైసలకు(నిమిషానికి) పడిపోయిందని ఐడియా పేర్కొంది. మొబైల్ డేటా సగటు రియలైజేషన్ ఒక్కో ఎంబీకి 1.2 పైసలు తగ్గి 23.4 పైసలకు (ఒక్కో ఎంబీకి) క్షీణించిందని వివరించింది.