ముంబై: భౌగోళిక–రాజకీయ అంశాల కారణంగా ఒడిదుడుకులు నెలకొని, కృత్రిమ మేథతో (ఏఐ) పరిస్థితుల్లో పెను మార్పులు వచ్చినప్పటికీ ప్రస్తుత ఆర్థిక సంవత్సరంలో (2025–26) దేశీ టెక్నాలజీ రంగం ఆదాయం 315 బిలియన్‌ డాలర్లకు చేరనుంది. గత ఆర్థిక సంవత్సరంతో పోలిస్తే 6.1 శాతం వృద్ధి చెందనుంది. దేశీ ఐటీ సంస్థల సమాఖ్య నాస్కామ్‌ వార్షిక నివేదికలో ఈ విషయాలు తెలిపింది. 2026 ఆర్థిక సంవత్సరంలో పరిశ్రమలో కొత్తగా 1.35 లక్షల ఉద్యోగాలు జత కావడం ద్వారా ప్రత్యక్ష ఉద్యోగుల సంఖ్య 58.15 లక్షల నుంచి పెరిగి 59.5 లక్షలకు చేరుతుందని పేర్కొంది. గత ఆర్థిక సంవత్సరంలో 1.33 లక్షల కొత్త కొలువులు జత కాగా, ఈసారి 2,000 మాత్రమే పెరగడమనేది ఇటీవలి కాలంలో అత్యంత తక్కువ స్థాయి వృద్ధిగా నమోదు కానుంది. ఆదాయం వృద్ధి చెందినంత స్థాయిలో కొలువులు పెరగకపోయినప్పటికీ, నికరంగా ఉద్యోగాలు పెరుగుతుండటమనేది సానుకూలాంశమని నాస్కామ్‌ ప్రెసిడెంట్‌ రాజేశ్‌ నంబియార్‌ తెలిపారు. టెక్నాలజీలో పరిస్థితులు మారే కొద్దీ రాబోయే రోజుల్లోనూ ఉద్యోగాలు పెరుగుతాయని అంచనా వేస్తుననట్లు వివరించారు. 59.5 లక్షల మంది ఉద్యోగుల్లో 20 లక్షల మంది ఏఐ శిక్షణ పొందగా, వీరిలో 3 లక్షల మంది అడ్వాన్స్‌డ్‌ ఏఐ నైపుణ్యాలను నేర్చుకున్నట్లు పేర్కొన్నారు. పరిశ్రమకు సవాళ్లు ఎదురవుతున్నప్పటికీ, వాస్తవంగా చూస్తే కొత్త విభాగాల్లో టెక్నాలజీపై ఖర్చు చేయడం పెరుగుతుండటం సానుకూలమైన విషయమన్నారు. నివేదిక ప్రకారం.. ⇒ ప్రధాన ఐటీ సరీ్వసుల ఆదాయం 143 బిలియన్‌ డాలర్ల నుంచి 149 బిలియన్‌ డాలర్లకు, బిజినెస్‌ ప్రాసెస్‌ మేనేజ్‌మెంట్‌ రెవెన్యూ 55 బిలియన్‌ డాలర్ల నుంచి 59 బిలియన్‌ డాలర్లకు, సాఫ్ట్‌వేర్‌ ఉత్పత్తుల ఆదాయం 21 బిలియన్‌ డాలర్ల నుంచి 23 బిలియన్‌ డాలర్లకు పెరగనుంది. ⇒ ఇంజినీరింగ్, రీసెర్చ్, డెవలప్‌మెంట్‌ ఆదాయాలు 59 బిలియన్‌ డాలర్ల నుంచి 63 బిలియన్‌ డాలర్లకు, హార్డ్‌వేర్‌ కంపెనీల ఆదాయాలు 19 బిలియన్‌ డాలర్ల నుంచి 21 బిలియన్‌ డాలర్లకు పెరగనున్నాయి. ⇒ గతంలో అమెరికా, ఉత్తర అమెరికా మార్కెట్లలో ఆదాయ వృద్ధి అత్యధికంగా ఉండగా, ప్రస్తుతం ఆసియా–పసిఫిక్, మధ్యప్రాచ్య ప్రాంతాల్లో వేగవంతమైన వృద్ధి నమోదవుతోంది. ప్రపంచ సగటుతో పోలిస్తే దేశీ మార్కెట్లో ఆదాయాలు అత్యధికంగా 7.9 శాతం మేర వృద్ధి చెందనుండటం ఆసక్తికరమైన అంశం. ⇒ విభాగాలవారీగా చూస్తే ఆరోగ్య సంరక్షణ, ట్రావెల్, రవాణా సెగ్మెంట్ల ఆదాయాలు అత్యంత వేగంగా వృద్ధి చెందుతున్నాయి. ⇒ చాలా మటుకు కంపెనీలు ఏఐ ఆదాయాలను వెల్లడించవు, కానీ ప్రస్తుత ఆర్థిక సంవత్సరంలో మొత్తం కృత్రిమ మేథపరమైన ఆదాయాలు 10–12 బిలియన్‌ డాలర్లుగా ఉంటాయని అంచనా.


 శ్రీహరికోట (సూళ్లూరుపేట): ఇస్రో సతీష్ ధావన్ స్పేస్ సెంటర్ (షార్) నుంచి గురువారం ప్రయోగించనున్న జీఎస్‌ఎవీ డీ6కు మంగళవారం మధ్యాహ్నం 11.52 నుంచి కౌంట్‌డౌన్ ప్రారంభం కానుంది. స్వదేశీ సాంకేతిక పరిజ్ఞానంతో తయారుచేసిన క్రయోజనిక్ దశతో రెండోసారి చేస్తున్న ప్రయోగం ఇది. కౌంట్‌డౌన్ ప్రారంభమైన 29 గంటల అనంతరం గురువారం సాయంత్రం 4.52 గంటలకు ప్రయోగం నిర్వహించేందుకు లాంచ్ ఆథరైజేషన్ బోర్డు (ల్యాబ్) నిర్ణయం తీసుకుంది.
 
 ల్యాబ్ వారు కౌంట్‌డౌన్ సమయంలో బుధవారం రెండోదశలో 39.1 టన్నుల ద్రవ ఇంధనాన్ని నింపే ప్రక్రియను పూర్తి చేస్తారు. ప్రయోగానికి ఆరు గంటల ముందు రాకెట్‌లో ఎలక్ట్రికల్, ఎలక్ట్రానిక్ వ్యవస్థలను అప్రమత్తం చేస్తారు. 49.1 మీటర్లు పొడవున్న జీఎస్‌ఎల్‌వీ రాకెట్ భూమి నుంచి నింగికేగే సమయంలో 416 టన్నుల బరువు ఉంటుంది.  నాలుగు స్ట్రాపాన్ బూస్టర్లలో 170.4 టన్నుల ద్రవ ఇంధనంతో పాటు కోర్ అలోన్‌దశలో 138.1 ఘన ఇంధనంతో మొదటిదశను 151 సెకన్లలో పూర్తిచేస్తారు.
 
 39.5 టన్నుల ద్రవ ఇంధనం సాయంతో రెండోదశను  పూర్తిచేస్తారు. కీలకదశ అయిన క్రయోజనిక్  దశలో 12.8 టన్నుల క్రయో ఇంధనం సాయంతో పూర్తి చేస్తారు. జీఎస్‌ఎల్‌వీ డీ6 ద్వారా 2,117 కిలోలు బరువున్న జీశాట్-6 ఉపగ్రహాన్ని మోసుకెళ్లి 1,024 సెకన్లకు 170 కిలోమీటర్ల పెరూజీ (భూమికి అతి దగ్గరగా), 35,975 కిలోమీటర్లు అపోజీ (భూమికి దూరంగా) 19.95 డిగ్రీల భూ సమాంతర కక్ష్యలో ఉపగ్రహాన్ని ప్రవేశపెడతారు. అక్కడ నుంచి ఉపగ్రహాన్ని హసన్‌లోని కంట్రోల్ సెంటర్  అధీనంలోకి తీసుకుంటుంది.