TV
దుబాయ్‌ వేదికగా జరుగుతున్న ఇంటర్నేషనల్‌ టీ20 లీగ్‌లో వరుసగా రెండు రోజుల్లో రెండు సెంచరీలు నమోదయ్యాయి. నిన్న (జనవరి 20) అబుదాబీ నైట్‌రైడర్స్‌తో జరిగిన మ్యాచ్‌లో డెసర్ట్‌ వైపర్స్‌ ఓపెనర్‌ అలెక్స్‌ హేల్స్‌ (59 బంతుల్లో 110; 7 ఫోర్లు, 6 సిక్సర్లు) సెంచరీ బాదగా.. ఇవాళ (జనవరి 21) దుబాయ్‌ క్యాపిటల్స్‌పై షార్జా వారియర్స్‌ ఓపెనర్‌ టామ్‌ కోహ్లెర్‌ కాడ్‌మోర్‌ (47 బంతుల్లో 106 నాటౌట్‌; 10 ఫోర్లు, 6 సిక్సర్లు) విధ్వంసకర శతకంతో విరుచుకుపడ్డాడు.
కాడ్‌మోర్‌ సుడిగాలి శతకంతో ఊగిపోవడంతో క్యాపిటల్స్‌ నిర్ధేశించిన 178 పరుగుల లక్ష్యాన్ని వారియర్స్‌ కేవలం 14.4 ఓవర్లలో 3 వికెట్లు మాత్రమే కోల్పోయి ఊదేసింది. ఫలితంగా 7 వికెట్ల తేడాతో ఘన విజయం సాధించింది. కాడ్‌మోర్‌, జో డెన్లీ (17 బంతుల్లో 29 నాటౌట్‌; 3 ఫోర్లు, సిక్స్‌) వారియర్స్‌ను విజయతీరాలకు చేర్చారు. క్యాపిటల్స్‌ బౌలర్లలో అకీఫ్‌ రజా 2 వికెట్లు పడగొట్టగా.. చమిక కరుణరత్నేకు ఓ వికెట్‌ దక్కింది.
తొలుత బ్యాటింగ్‌ చేసిన క్యాపిటల్స్‌ జో రూట్‌ (54 బంతుల్లో 80 నాటౌట్‌; 8 ఫోర్లు, సిక్స్‌) మెరుపు అర్ధశతకంతో, లారెన్స్‌ (38 బంతుల్లో 34; 2 ఫోర్లు, సిక్స్‌), రోవమన్‌ పావెల్‌ (27 బంతుల్లో 44; 5 ఫోర్లు, సిక్స్‌) ఓ మోస్తరుగా రాణించడంతో నిర్ణీత ఓవర్లలో 4 వికెట్ల నష్టానికి 177 పరుగులు చేసింది. వారియర్స్‌ బౌలర్లలో క్రిస్‌ వోక్స్‌, నవీన్‌ ఉల్‌ హాక్‌ తలో 2 వికెట్లు పడగొట్టారు. ఇదిలా ఉంటే, ఇంటర్నేషనల్‌ టీ20 లీగ్‌లో టామ్‌ కోహ్లెర్‌ కాడ్‌మోర్‌ బాదిన శతకం రెండోది కాగా, అంతకుముందు మ్యాచ్‌లో అలెక్స్‌ హేల్స్‌ చేసినది లీగ్‌లో తొట్టతొలి సెంచరీ కావడం విశేషం.
