ప్రతి గింజా కొనుగోలు చేస్తాం

దుబ్బాకటౌన్‌: రైతులు పండించిన ధాన్యాన్ని చివరి గింజ వరకూ కొనుగోలు చేస్తామని కలెక్టర్‌ కె.హైమావతి స్పష్టం చేశారు. శుక్రవారం దౌల్తాబాద్‌ మండల కేంద్రంలో సీడబ్ల్యూసీ గోదాంను పరిశీలించారు. ఈ సందర్భంగా ఆమె మాట్లాడుతూ జిల్లాలో ధాన్యం కొనుగోలు ప్రక్రియ సజావుగా కొనసాగుతోందని, వేగవంతం చేసేందుకు జిల్లా యంత్రాంగం పనిచేస్తోందన్నారు. మిల్లులలో స్థలాభావం కారణంగా దిగుమతుల్లో కొంత ఆలస్యం జరుగుతోందన్నారు. ఈ సమస్య పరిష్కారానికి స్థానికంగా అందుబాటులో ఉన్న గోదాములను గుర్తించి వినియోగంలోకి తీసుకువస్తున్నామని పేర్కొన్నారు. సీడబ్ల్యూసీ గోదాంలో నిల్వ ఉన్న వేరు శనగను పక్కనే ఉన్న మక్కల గోదాంకు తరలించాలని మార్కెటింగ్‌ డీఎం నాగరాజుకు ఫోన్‌ ద్వారా ఆదేశించారు. ఈ కార్యక్రమంలో తహసీల్దార్‌ చంద్రశేఖర రావు, ఏపీఎం మహిపాల్‌, మార్కెట్‌ కమిటీ చైర్మన్‌ కనకయ్య, వైస్‌ చైర్మన్‌ స్వామి, ఆర్‌ఐ నాగరాజు, జీపీఓ సుమన్‌ పాల్గొన్నారు.