TV
గుంటూరు రూరల్: నగర శివారులోని లాంఫాం వ్యవసాయ పరిశోధన స్థానం నందు ఆచార్య ఎన్జీరంగా వ్యవసాయ విశ్వవిద్యాలయంలో గత రెండు రోజులుగా జరుగుతున్న కృష్ణ మండలం వ్యవసాయ పరిశోధన, విస్తరణ సలహా మండలి సమావేశం శనివారంతో ముగిసింది. కార్యక్రమంలో ఏడీఆర్ డాక్టర్ దుర్గాప్రసాద్ గత ఏడాది నిర్వహించిన కార్యక్రమాల వివరాలను తెలిపారు. గత ఏడాది సూచనల ఆదారంగా చేపట్టిన కార్యక్రమాల వివరాలను సాయిల్ సైన్స్ ప్రధాన శాస్త్రవేత్త డాక్టర్ వి. శైలజ తెలిపారు. భూసార పరిరక్షణ కోసం జీవన ఎరువుల వినియోగం, అందుబాటులో ఉన్న నూతన యంత్రపరికరాలు, రానున్న సీజన్లో ఎన్నినో ప్రభావం వర్షపాతం, పంటల సాగుపై ప్రభావం, ప్రత్యామ్నాయ పంటల ప్రణాళికలను రైతులు, శాస్త్రవేత్తలు చర్చించారు. వివిధ పంటల ప్రధాన శాస్త్రవేత్తలు ఆయా పంటల్లో నూతన రకాలు, టెక్నాలజీలను వివరించారు. 2026–27 సంవత్సరానికి నిర్వహించాల్సిన పరిశోధనలు, కార్యక్రమాల కార్యాచరణపై చర్చించారు. కార్యక్రమంలో పరిశోధన ఇంచార్జ్ సంచాలకుడు డాక్టర్ శ్రీనివాసరావు, విస్తరణ సంచాలకుడు డాక్టర్ జి శివన్నారాయణ, వివిధ జిల్లాల డీఏవోలు, శాస్త్రవేత్తలు, రైతులు పాల్గొన్నారు.
