పకడ్బందీగా నామినేషన్ల ప్రక్రియ

పకడ్బందీగా నామినేషన్ల ప్రక్రియ

ఖానాపూర్‌/లక్ష్మణచాంద: గ్రామ పంచాయతీ ఎన్నికలకు సంబంధించి నామినేషన్ల ప్రక్రియ పకడ్బందీగా చేపట్టాలని జిల్లా ఎన్నికల పరిశీలకులు ఆయేషా మస్రత్‌ ఖానం అధికారులను ఆదేశించారు. అధికారులు సమయపాలన పాటించాలని కలెక్టర్‌ అభిలాష అభినవ్‌ సూచించారు. ఖానాపూర్‌, లక్ష్మణచాంద మండలాల్లోని సత్తనపల్లి, మస్కాపూర్‌, సుర్జాపూర్‌, వడ్యాల్‌ గ్రామపంచాయతీ కార్యాలయాల్లో ఏర్పాటు చేసిన నామినేషన్ల స్వీకరణ కేంద్రాన్ని గురువారం తనిఖీ చేశారు. ఉదయం 10:30 నుంచి సాయంత్రం 5 గంటల వరకు నామినేషన్లు స్వీకరించాలన్నారు. నిర్దేశించిన రిజిస్టర్లను తప్పనిసరిగా నిర్వహించాలన్నారు. నామినేషన్లు దాఖలు చేయడానికి వచ్చే అభ్యర్థులకు ఏవైనా సందేహాలు ఉంటే నివృత్తి చేయాలని సూచించారు. రిటర్నింగ్‌ అధికారులు నామినేషన్ల స్వీకరణ ప్రక్రియ పకడ్బందీగా నిర్వహించాలని తెలిపారు. హెల్ప్‌ డెస్క్‌లో సిబ్బంది అందుబాటులో ఉంటూ, అభ్యర్థులకు సమాచారం ఇవ్వడంలో సహాయపడాలన్నారు. మొదటి విడత నామినేషన్ల స్వీకరణ ఈ నెల 29వ తేదీ వరకు ఉంటుందని పేర్కొన్నారు. వారివెంట అదనపు కలెక్టర్‌ కిశోర్‌కుమార్‌, డీపీవో శ్రీనివాస్‌, తహసీల్దార్‌ సరిత, ఎంపీడీవో రాధ ఉన్నారు.

అధికారుల ఆకస్మిక తనిఖీలు..

ఖానాపూర్‌ మండలంలోని గోసంపల్లె, పాత ఎల్లాపూర్‌ నామినేషన్‌ కేంద్రాన్ని అదనపు కలెక్టర్‌ ఫైజాన్‌ అహ్మద్‌ తనిఖీ చేశారు. జెడ్పీ సీఈవో గోవింద్‌ సత్తన్‌పల్లి నామినేషన్‌ కేంద్రాన్ని తనిఖీ చేశారు. మస్కాపూర్‌లో నామినేషన్ల ప్రక్రియను మండల ప్రత్యేక అధికారి జీవరత్నం తనిఖీ చేశారు. వారి వెంట తహసీల్దార్‌ సుజాత, ఎంపీడీవో రమాకాంత్‌, ఎంపీఓ రత్నాకర్‌ ఉన్నారు.

నామినేషన్‌ కేంద్రాల పరిశీలన

కడెం: మండల కేంద్రంతోపాటు, కొండుకూర్‌ ఎన్నికల నామినేషన్‌ కేంద్రాలను అదనపు కలెక్టర్‌ ఫైజాన్‌ అహ్మద్‌ గురువారం పరిశీలించారు. రికార్డులు తనిఖీ చేశారు. సిబ్బందికి సూచనలు చేశారు. మొదటి రోజు సర్పంచ్‌ స్థానాలకు 22, వార్డు సభ్యుడి స్థానాలకు 8 నామినేషన్లు వచ్చినట్లు అధికారులు పేర్కొన్నారు. ఆయన వెంట తహసీల్దార్‌ ప్రభాకర్‌, ఎంపీడీవో సునీత, ఎంపీవో శ్రీనివాస్‌, ఏపీవో జయదేవ్‌ ఉన్నారు.