TV
కాంట్రాక్టర్‌కు గిరిజనుల షాక్‌
కడెం: పులిమనుగడ కోసం ఉన్న ఊళ్లను ఖాళీ చేసిన రాంపూర్‌, మైసంసేట్‌ వాసుల పునరావాస కష్టాలు తీరడం లేదు. నేటికి సాగు భూమి పట్టాలు, సాగునీటి వసతి, భూమి చదును పనులు చేయలేదు. దీంతో పంటలు సాగు చేయడం లేదు. మరోవైపు పునరావాస ప్యాకేజీలో భాగంగా అందాల్సిన పరిహారం కోసం అధికారుల చూట్టూ తిరుగుతూనే ఉన్నారు. తమను పట్టించుకునే నాథుడు లేడని ఆవేదన వ్యక్తం చేస్తున్నారు.
తీర్మానం ఇవ్వం..
రాంపూర్‌, మైసంపేట్‌ వాసులను కవ్వాల్‌ టైగర్‌జోన్‌ కోర్‌ ఏరియా నుంచి గతేడాది తరలించారు. వీరికి కడెం మండలం కొత్తమద్దిపడగ సమీపంలో పునరావాస కాలనీ ఏర్పాటు చేసి 94 కుటుంబాలకు ఇళ్లు నిర్మించి ఇచ్చారు. నిబంధనల ప్రకారం ఈ ఇళ్లు నిర్మించిన కాంట్రాక్టర్‌ రెండేళ్లపాటు నిర్వహణ చూడాలి, ఆ తర్వాతే కాంట్రాక్టర్‌కు పూర్తి బిల్లు విడుదల అవుతుంది. ఇళ్లు నాసిరకంగా నిర్మించారని మొదటి నుంచి ఫిర్యాదు చేస్తున్నా తమను పట్టించుకోకుండా మంగళవారం కాంట్రాక్టర్‌ తీర్మానం కోసం రావడంతో గిరిజనులు ఆగ్రహం వ్యక్తం చేశారు. అధికారులతో వాగ్వాదానికి దిగారు. సదరు కాంట్రాక్టర్‌కు రూ.కోటి బిల్లు పెండింగ్‌ ఉంది. పునరావాసకాలనీ కమిటీకి చెందిన 14 మంది సభ్యులు తీర్మానం ఇస్తే బిల్లు విడుదల అవుతుందని అధికారులు తెలిపారు.
