బాలీవుడ్‌ ఎంట్రీ?

తమిళ హీరో శివ కార్తికేయన్‌ బాలీవుడ్‌ ఎంట్రీ దాదాపు ఖరారు అయిందనే టాక్‌ తెరపైకొచ్చింది. ‘దేవదాస్, రామ్‌లీల, పద్మావత్‌’ వంటి సూపర్‌హిట్‌ సినిమాలను తెరకెక్కించిన బాలీవుడ్‌ ప్రముఖ దర్శకుడు సంజయ్‌ లీలా భన్సాలీ ఆఫీస్‌కు వెళ్లొచ్చారు శివ కార్తికేయన్‌. దీంతో భన్సాలీతో ఈ హీరో ఓ సినిమా చేయనున్నారనే టాక్‌ బాలీవుడ్‌లో ఊపందుకుంది.

మరి... భన్సాలీ దర్శకత్వంలోని సినిమాలో శివ కార్తికేయన్‌ హీరోగా నటిస్తారా? లేక శివ కార్తికేయన్‌ హిందీలో నటించే తొలి సినిమాకు భన్సాలీ నిర్మాతగా ఉంటారా?  అనే విషయాలపై ఓ స్పష్టత రావాల్సి ఉంది. ఇక ప్రస్తుతం రణ్‌బీర్‌ కపూర్, ఆలియా భట్, విక్కీ కౌశల్‌ ప్రధాన పాత్రల్లో నటిస్తున్న హిందీ చిత్రం ‘లవ్‌ అండ్‌ వార్‌’తో బిజీగా ఉన్నారు సంజయ్‌ లీలా భన్సాలీ. ఈ సినిమా రిలీజ్‌ తర్వాత శివ కార్తికేయన్‌తో భన్సాలీ సినిమా గురించి ఓ స్పష్టత వచ్చే అవకాశం ఉంది.