చివరి రోజు భారీగా నామినేషన్లు

● సాయంత్రం 5 గంటల తర్వాత కూడా క్యూలైన్‌లో అభ్యర్థులు

● కొన్ని క్లస్టర్లలో అర్ధరాత్రి వరకు కొనసాగిన ప్రక్రియ

జెడ్పీసెంటర్‌(మహబూబ్‌నగర్‌): గ్రామ పంచాయతీ ఎన్నికల్లో తొలివిడతకు సంబంధించిన నామినేషన్ల ప్రక్రియ శనివారం ముగిసింది. చివరిరోజు భారీస్థాయిలో నామినేషన్లు దాఖలయ్యాయి. జిల్లాలో ఐదు మండలాల్లో 139 గ్రామపంచాయతీలు, 1,188 వార్డులకు సంబంధించి నామినేషన్లు స్వీకరించారు. ఈ నెల 27న నామినేషన్ల ప్రక్రియ ప్రారంభం కాగా.. తొలి రెండు రోజులు నెమ్మదిగా సాగగా.. చివరి రోజు వేల సంఖ్యలో దాఖలు చేశారు. సాయంత్రం 5 గంటల వరకే నామినేషన్ల స్వీకరణ ఉండగా.. అంతలోపు కార్యాలయానికి వచ్చిన అభ్యర్థులకు టోకెన్లు జారీ చేసి... అర్ధరాత్రి వరకు వారితో నామినేషన్లు స్వీకరించారు. నవాబుపేట మండలంలో రాత్రి 9.40 గంటలకు ప్రకియ ముగియగా... చివరి రోజు సర్పంచ్‌కు 228, వార్డులకు 804 నామినేషన్లు దాఖలయ్యాయి. మండలంలో మొత్తం 42 సర్పంచ్‌ స్థానాలకు 292, 354 వార్డులకు 865 నామినేషన్లు దాఖలయ్యాయి. మహబూబ్‌నగర్‌ రూరల్‌ మండలంలో అర్ధరాత్రి 12 గంటల వరకు ప్రక్రియ కొనసాగింది. 24 గ్రామపంచాయతీలకు 184, 222 వార్డులకు 618 నామినేషన్లు దాఖలయ్యాయి. చివరి రోజు చివరి రోజు సర్పంచ్‌కు 119, వార్డులకు 527 నామినేషన్లు వచ్చాయి. రాజాపూర్‌, గండేడ్‌, మహమ్మదాబాద్‌ మండలాల్లో అర్ధరాత్రి దాటినా తర్వాత కూడా నామినేషన్ల ప్రక్రియ కొనసాగింది. కాగా...నవాబుపేట మండలంలో కాకర్‌జాల్‌, దొడ్డిపల్లి, గండేడ్‌ మండలం అంచన్‌పల్లి గ్రామపంచాయతీ, వార్డు స్థానాలకు ఒక్కొక్కటి చొప్పునే నామినేషన్లు దాఖలు కావడంతో ఆయా జీపీలు ఏకగ్రీవం కానున్నాయి. అయితే అత్యధికంగా రుద్రారంలో 13, నవాబుపేట, కొండాపూర్‌, కూచూర్‌, కాకర్లపహడ్‌లలో 11 చొప్పున సర్పంచ్‌స్థానాలకు నామినేషన్లు దాఖలు కావడం విశేషం

చివరి రోజు భారీగా నామినేషన్లు