శాంతి దూతకు జేజేలు

తుమకూరు: ఏప్రిల్‌ 3న గుడ్‌ ఫ్రైడే ఆచరణలో భాగంగా, నగరంలో క్రైస్తవ సహోదర సహోదరీలు పామ్‌ సండే ఊరేగింపును నిర్వహించారు. నగరంలోని చర్చ్‌ సర్కిల్‌లో ఉన్న వెస్లీ ప్రార్థనాలయం నుంచి, వెస్లీ చర్చ్‌, టోమ్లిసన్‌ చర్చ్‌, దేవనూర్‌ చర్చ్‌, కురిపల్య చర్చ్‌లతో సహా 8 చర్చిల నాయకులు, పాస్టర్లు, క్రైస్తవ సహోదరులు ఖర్జూర చెట్టు మట్టలు పట్టుకుని గీతాలు ఆలపిస్తూ ఊరేగింపు జరిపారు. టౌన్‌ హాల్‌, ఎం.జి. రోడ్‌ గుండా ప్రయాణించి తిరిగి వెస్లీ చర్చికి చేరుకున్నారు. రెవరెండ్‌ సుధీర్‌ మాట్లాడుతూ, 2 వేల సంవత్సరాల క్రితం ఏసుక్రీస్తు శాంతిదూతగా యెరూషలేము నగరంలోకి ప్రవేశించిన రోజును పురస్కరించుకుని, ఈ వేడుకను నిర్వహించడం ఆనవాయితీ అని వివరించారు. యేసు శాంతి రాజు. ఆయన శిలువ వేయబడినప్పటికీ, యావత్‌ మానవాళి రక్షణ కోసం తన రక్తాన్ని చిందించి, మోక్ష మార్గాన్ని చూపించారని తెలిపారు. ప్రపంచంలో నెలకొన్న యుద్ధ వాతావరణం తక్షణమే అంతమై, శాంతి వికసించాలని ప్రార్థించినట్లు తెలిపారు. వెస్లీ మహాదేవాలయానికి చెందిన ఫాదర్‌ మోర్గాన్‌ సందేశ్‌, రెవరెండ్‌ సుధీర్‌, రెవరెండ్‌ మనోజ్‌ కుమార్‌, రెవరెండ్‌ ఎలిజబెత్‌, కుసుమాంజలి, సావంత్‌, సంజీవ్‌ సుందర్‌కుమార్‌, అనిల్‌, వందలాది క్రైస్తవ సోదరులు పాల్గొన్నారు.

తుమకూరులో ఘనంగా పామ్‌ సండే వేడుకలు