తొత్తులుగా మారుతుండటంపై స్పందించండి

సాక్షి, అమరావతి: రాష్ట్రంలో జరుగుతున్న స్థానిక సంస్థల ఉప ఎన్నికల్లో అధికార తెలుగుదేశం పార్టీకి తొత్తులుగా మారి పోలీసులే చట్టవిరుద్దంగా వ్యవహరిస్తున్న తీరుపై తక్షణం స్పందించి, నిలు­వరిం­చాలని కోరుతూ వైఎస్సార్‌సీపీ ప్రతి­నిధి బృందం డీజీపీ కార్యాలయంలో వినతి­పత్రం సమర్పించింది. నాలుగు రోజులుగా డీజీపీని కలిసేందుకు ప్రయత్నిస్తున్నా, అపా­యిం­ట్‌మెంట్‌ ఇవ్వక­పో­వ­డంతో ఆదివారం వైఎస్సార్‌సీపీ నేతలు నేరుగా డీజీపీ కార్యా­ల­యానికి వెళ్లారు. అక్కడి సిబ్బంది ఎల్‌ చిరంజీవులు, తదితరులు అడ్డుకొనే ప్రయ­త్నం చేయగా.. వైఎస్సార్‌సీపీ నేతలు దేవినేని అవి­నాష్, లేళ్ళ అప్పిరెడ్డి, టీజేఆర్‌ సుధాకర్‌ బాబు వాగ్వాదానికి దిగారు. 

అనంతరం డీజీపీ అందుబాటులో లేకపోవ­డంతో కార్యా­లయ సిబ్బందికి వినతిపత్రం అందచేశారు. దేశంలో ఎక్కడా చూడ­ని విధంగా రాష్ట్రంలో పోలీసులు అధికార పార్టీకి లొంగిపోయి, చట్టా­లనే అపహాస్యం చేసేలా వ్యవ­హ­రిస్తున్న తీరుపై డీజీపీ ఇప్ప­టికైనా స్పందించా­లని కోరారు. ప్రజాస్వామ్య పరిరక్షణకు, నిష్పక్ష­పాత ఎన్నికల నిర్వహణకు చర్యలు తీసుకోవాలని ఎమ్మె­ల్సీలు లేళ్ల అప్పిరెడ్డి, రమేష్‌ యాదవ్, మాజీ మంత్రి మేరుగు నాగార్జున, మాజీ ఎమ్మెల్యేలు మల్లాది విష్ణు, కైలే అనిల్‌ కుమార్, టీజే­ఆర్‌ సుధా­కర్‌­బాబు, మేయర్‌ భాగ్యలక్షి, పార్టీ ఎన్టీఆర్‌ జిల్లా అధ్యక్షుడు దేవినేని అవి­నాష్, విద్యార్థి విభాగం అధ్యక్షుడు పాను­గంటి చైతన్య తదితరులు విజ్ఞప్తి చేశారు. అనంతరం మీడియాతో మాట్లాడారు. 

ప్రజాస్వామ్యానికే తలవంపులు 
‘పులివెందుల, ఒంటిమిట్ట జెడ్పీటీసీ ఉప ఎన్ని­కల్లో పోలీసుల తీరు ప్రజాస్వామ్యానికే తలవంపులు తెచ్చేలా ఉంది. అధికార టీడీపీకి అనుకూ­లంగా వారు వ్యవహరిస్తున్న తీరు చూస్తుంటే ఈ రాష్ట్రంలో ప్రజాస్వామ్యం ఉందా? అనే సందేహం కలుగుతోంది. ఈ ఎన్నికల్లో పోటీ కూటమి పార్టీలతో కాదు.. పోలీసులతోనే అన్న­ట్లుంది. పోలీసులే ఎన్నికల ప్రచారాన్ని అడ్డుకుంటారు.. దాడులపై ప్రేక్షక పాత్ర వహి­స్తారు. బాధితులైన మా పార్టీ శ్రేణులపైనే తప్పుడు కేసులు బనాయి­స్తారు. 

బైండోవర్‌ పేరుతో ప్రతి­రోజూ స్టేషన్లో గంటల తరబడి నిర్బంధిస్తారు. దాడులకు పాల్ప­డుతున్న టీడీపీ శ్రేణులకే రక్షణ కల్పిస్తుంటారు. ఇదీ పరిస్థితి. డీజీపీ ఉన్నది చట్టాన్ని కాపాడటా­నికి, ప్రజాస్వా­మ్యాన్ని రక్షించడానికి. పోలీస్‌ విభాగం అధికార పార్టీ రాజ­కీయ ప్రయో­జనాల కోసం కార్యకర్తల్లా పనిచే­స్తుంటే ఆయన ఎందుకు స్పందించడం లేదు? ప్రతిపక్షంగా జరుగు­తున్న పరిణామాలను ఆయన దృష్టికి తీసుకెళ్లేందుకు నాలుగు రోజు­లుగా ప్రయత్నిస్తుంటే కనీసం అపాయింట్‌మెంట్‌ కూడా ఇవ్వకపోవడాన్ని ఎలా అర్థం చేసుకో­వాలి? 

ఎవరి ఒత్తిడితో కనీసం స్వేచ్ఛ­గా వినతి­పత్రం కూడా తీసుకోలేని నిస్పహాయ స్థితిలో ఉన్నారు? పులివెందులలో పోలీసులు ఖాకీ యూని­ఫారం తీసేసి, పచ్చచొ­క్కాలతో పని చేస్తు­న్నారు. ఒక చిన్న ఎన్నికను పెద్ద యుద్ధంగా మార్చే­స్తున్నారు. ఏకంగా ఒక ఎమ్మెల్సీపైనే హత్యాయత్నం చేశా­రంటే శాంతిభద్రతలు ఎలా ఉన్నాయో అర్థం అవుతోంది. 

ఇప్పటికైనా డీజీపీ కళ్లు తెరవాలి
పులివెందుల అంటే డాక్టర్‌ వైఎస్సార్‌ కుటుంబాన్ని గుండెల్లో పెట్టుకున్న ప్రాంతం. అలాంటి  ప్రాంతంలో ఉప ఎన్నికలో స్థానికంగా ఉన్న వైఎస్సార్‌సీపీకి చెందిన మాజీ మంత్రులు, ఎమ్మెల్సీలు, ఎమ్మె­ల్యే­లు, ఇతర నాయకులను, కార్యకర్తలను భయబ్రాంతులకు గురి చేసేందుకు తెగబడటం దారుణం. ఇందుకు పోలీసులు సహ­క­రించడం బాధాకరం. ఎమ్మెల్సీ రమేష్‌ యాదవ్, వేల్పుల రాముపై హత్యా­యత్నం ఘటనలో దోషులపై చర్యలు తీసుకో­వాలని డీఎస్పీ వద్దకు వెళితే పట్టించుకోలేదు. 

కర్నూల్‌ రేంజ్‌ డీఐజీ కోయ ప్రవీణ్‌ను కలిస్తే.. ‘పత్తి యాపారం కోసం ఆ గ్రామానికి వెళ్లారా.. మేం ఉండబట్టే తలలు పగిలాయి.. లేకపోతే తలలు తెగిపో­యేవే’ అంటూ హేళనగా మాట్లాడారు. బాధితులైన మా పార్టీ నాయకులు, కార్యకర్తలపై ఎస్సీ, ఎస్టీ అట్రాసిటీ సెక్షన్లతో కేసులు నమోదు చేయడం ఈ ప్రభుత్వ అరాచకానికి, పోలీస్‌ వ్యవస్థ దిగజారుడు­తనానికి పరాకాష్టగా కనిపిస్తోంది. మొత్తంగా పోలీసులను అడ్డుపెట్టుకుని ఏకపక్షంగా ఓట్లు వేయించుకునే కుట్ర జరుగుతోంది. ఇప్పటికైనా డీజీపీ కళ్లు తెరవాలి’ అని వైఎస్సార్‌సీపీ నేతలు పేర్కొన్నారు.