అరవింద్ కేజ్రీవాల్ సారథ్యంలోని ఆమ్ ఆద్మీ పార్టీ కూడా అన్నింటిలాగే.. ఆ తానుముక్కేనని తేలిపోయింది. కాంగ్రెస్ పార్టీని చీల్చి.. అందులోని కొంతమంది ఎమ్మెల్యేలను కొనేసి, తద్వారా ఢిల్లీలో ప్రభుత్వాన్ని ఏర్పరచాలని గతంలో అరవింద్ కేజ్రీవాల్ భావించారట. దీనికి సంబంధించిన ఆధారాలను ఆ పార్టీ మాజీ ఎమ్మెల్యే రాజేష్ గార్గ్ బయటపెట్టారు. ఇటీవలి ఎన్నికలకు ముందు ఆమ్ ఆద్మీ పార్టీ పూర్తి మెజారిటీ సాధించకపోవడం.. అతి పెద్ద పార్టీగా అవతరించిన బీజేపీ ముందుకు రాకపోవడంతో కాంగ్రెస్ మద్దతుతో అప్పట్లో ఆప్ ప్రభుత్వాన్ని ఏర్పరిచిన విషయం తెలిసిందే.
 
 అయితే.. ఎటూ సంకీర్ణ ప్రభుత్వం కాబట్టి కష్టాలు ఉంటాయని, అందుకే కాంగ్రెస్ పార్టీలో కొందరిని కొనేయాలని అరవింద్ కేజ్రీవాల్ ప్రయత్నించినట్లు గార్గ్ బయటపెట్టిన ఆడియో టేపుల్లో ఉంది. కానీ ఈ పథకం ఫలించలేదు.. అంతలోనే సర్కారు రాజీనామా చేసింది. పదవిని కాపాడుకోడానికి అరవింద్ కేజ్రీవాల్ చేసిన ఇలాంటి ప్రయత్నాలకు సంబంధించి తన వద్ద చాలా ఆధారాలు ఉన్నాయని గార్గ్ అన్నారు. దమ్ముంటే ఢిల్లీ సీఎం తన సచ్ఛశీలతను నిరూపించుకోవాలని సవాలుచేశారు.
 
 కాగా.. ఈ పరిణామాల కారణంగా పార్టీని వీడుతున్నట్టు మహారాష్ట్ర పార్టీ సీనియర్ లీడర్ అంజలి దమాని ప్రకటించారు. నేను ఆయన్ని నమ్మాను.  ఆయన సిద్ధాంతాలకు మద్దతిచ్చాను తప్ప.. ఆయన రాజకీయ బేరసారాలకు కాదంటూ ఆమె ట్వీట్ చేశారు.


 న్యూఢిల్లీ: ఆమ్ ఆద్మీ పార్టీ (ఆప్)లో అంతర్గత విభేదాలు బయటపడుతున్నాయి. ఉత్తర ఢిల్లీలోని రోహిణి ప్రాంతంలో ఆదివారం సాయంత్రం జరిగిన ఓ సమావేశంలో చోటుచేసుకున్న ఘటన దీనిని ప్రతిబింబిస్తోంది. ప్రస్తుత విధానసభ ఎన్నికల్లో పార్టీ తరఫున రోహిణీ నియోజక వర్గంనుంచి రాజేష్‌గార్గ్‌ను తప్పించి ఆయన స్థానంలో చరంజీలాల్ గుప్తాకు అధిష్టానం టికెట్ కేటాయించింది. ఈ నేపథ్యంలో ఆదివారం జరిగిన సమావేశానికి హాజరైన ఆశుతోష్‌ను... గార్గ్ వర్గీయులు అడ్డుకున్నారు. తమ ప్రశ్నలకు జవాబివ్వాలంటూ గద్దించారు. దీంతో ఆయన తప్పించుకునేందుకు యత్నించాడు. కొందరు గూండాలు ఆయనను తిరిగి వేదికపైకి బలవంతంగా తీసుకొచ్చారు.
  
  ఈ సందర్భంగా గార్గ్ మాట్లాడుతూ ‘దేనిని గురించి భయపడుతున్నాడు. వాస్తవాలను ఆలకించేందుకు అతనికి దమ్ము ఉండాలి’అని అన్నారు. అయితే ఈ ఘటనను అధిష్టానం ఖండించింది. ఈ విషయమై ఆశుతోష్ మాట్లాడుతూ ‘కొద్ది గందరగోళం చోటుచేసుకున్న మాట నిజమే. నిన్న నేను... నా మాజీ సహచరుడు రాజేష్ వద్దకు వెళ్లా. అధిష్టానం టికెట్ కేటాయించకపోవడంతో కోపంగా ఉన్నాడు. ఆ సమయంలో అతని అనుచరులు కూడా ఉన్నారు. దీంతో హంగామా చేసేందుకు యత్నించాడు. అయితే ఇందులో ఆగ్రహానికి లోనవడానికేమీ లేదు’ అని అన్నారు. రాజేష్...కొద్దిగా అసహనంగా కనిపించాడు. దీంతో అక్కడ ఉండాలనిపించలేదు. వచ్చేశా’ అని వివరించారు.
  


 అసభ్యంగా ప్రవర్తించారని ఆమ్ ఆద్మీ పార్టీ ఎమ్మెల్యే రాజేశ్ గార్గ్ పై బీజేపీ ఆరోపణలు చేసింది. ఓ ఎన్ జీవో ను నడుపుతున్న మాజీ ఢిల్లీ బీజేపీ అధ్యక్షుడు విజేందర్ గుప్తా సతీమణి శోభా గుప్తాతో ఓ కమ్యూనిటీ సెంటర్ వద్ద రాజేశ్ గార్గ్ అతని అనుచరులు అనుచితంగా అసభ్య పదజాలంతో నిందించారని బీజేపీ ఆరోపించింది. రాజేశ్ గార్డ్ వ్యవహార తీరుపై పోలీసులకు ఫిర్యాదు చేసినా.. పట్టించుకోలేదని ముఖ్యమంత్రి కేజ్రివాల్ ను కలిశారు. 
  
 రాజేశ్ గార్డ్ వ్యవహార తీరును అసెంబ్లీలో ప్రతిపక్ష నేత హర్ష వర్ధన్ ప్రస్తావించి.. కఠిన చర్యలు తీసుకోవాలని డిమాండ్ చేశారు. ఆమ్ ఆద్మీ పార్టీ ఎమ్మెల్యేలు, వారి అనుచరులు రౌడీయిజం ప్రదర్శిస్తున్నారని హర్ష వర్ధన్ ఆరోపించారు. అయితే తనపై వచ్చిన ఆరోపణల్ని రాజేశ్ గార్గ్ ఖండించారు. తనపై వచ్చిన ఆరోపణల్లో వాస్తవం లేదని తెలిపారు. రోహిణి లో ప్రస్తుతం నడుపుతున్న ఎన్ జీవో ప్రదేశాన్ని 2004లో ఆక్రమించారని.. అయితే సామాజిక కార్యక్రమాలకు కాకుడా పార్టీ పనులకు ఉపయోగించడంతో ఆమెను తాను ప్రశ్నించాను అని అన్నారు. 
  
 ఆ సమయంలో తనవెంట వెయి మంది కార్యకర్తలు కూడా ఉన్నారన్నారు. తనపై చేసిన ఆరోపణల్ని రుజువు చేస్తే తన ఎమ్మెల్యే పదవికి రాజీనామా చేస్తానని రాజేశ్ గార్డ్  సవాల్ విసిరారు. ఈ వ్యవహారంపై దర్యాప్తు జరిపిస్తానని ముఖ్యమంత్రి కేజ్రివాల్ అన్నారు.