కన్నతండ్రి అనే విషయాన్ని మరిచి రాక్షసుడిలా ప్రవర్తించాడు. చిన్న కారణానికి 12 ఏళ్ల కొడుకుని కత్తితో పొడిచి దారుణంగా చంపాడు. ప్రైవేట్ స్కూలులో ప్రవేశ పరీక్షకు కొడుకు ప్రిపేర్ కాలేదని కోపంతో జపాన్కు చెందిన కెంగొ సటకె (48) ఈ ఘాతుకానికి ఒడిగట్టాడు.
 
 హోంవర్క్ చేయడం లేదని కొడుకు ర్యోటా సటకెపై సటకె ఆగ్రహం చెందాడు. కూరగాయలు కోసే కత్తి తీసుకుని కొడుకు ఛాతీపై పొడిచాడు. తీవ్రంగా గాయపడిన ఆ బాలుడ్ని వెంటనే ఆస్పత్రికి తీసుకెళ్లినా ఫలితం లేకపోయింది. వైద్యుల సమాచారం మేరకు పోలీసులు వచ్చి కెంగోను అరెస్ట్ చేశారు. పొరపాటును కత్తితో దాడి చేశానని కెంగో చెప్పాడు. ఆ సమయంలో తన భార్య పనిలో ఉందని, నిగ్రహం కోల్పోయి తప్పు చేశానని అన్నాడు. స్కూల్ అడ్మిషన్ పొందేందుకు కష్టపడి చదవడంలేదంటూ కెంగో చాలాసార్లు కొడుకును హింసించాడని స్థానిక మీడియా వెల్లడించింది.


 చండీగఢ్: హరియాణాలోని ఓ మదర్సాలో హోం వర్క్ చేయలేదని నాలుగో తరగతి విద్యార్థి పట్ల అమానుషంగా ప్రవర్తించారు. ఆ చిన్నారిని చైన్లతో కట్టేసి హింసించారు. ఈ విషయం పోలీసుల దృష్టికి రావడంతో ఆ బాలుణ్ని కాపాడారు.
 
 సంబంధిత టీచర్లపై చర్యలు తీసుకుని అరెస్ట్ చేయాలని కోరుతూ బాధిత విద్యార్థి తండ్రి పోలీసులకు ఫిర్యాదు చేశాడు. కాగా సోమవారం విద్యార్థి స్కూల్ వర్క్ పూర్తి చేయకుండా, మదర్సా నుంచి ఇంటికి పారిపోయాడని, దీంతో తాము క్రమశిక్షణ చర్యల కింద చైన్లతో కట్టేశామని టీచర్లు చెప్పారు. స్కూల్ సమయంలో ఆ విద్యార్థి ఇంటికి పారిపోకుండా ఉండేందుకు ఇలా చేశామని తెలిపారు. పోలీసులు విచారణ అనంతరం ఇద్దరు టీచర్లపై కేసు నమోదు చేశారు. ఈ ఘటనపై విచారణ చేసేందుకు శిశుసంక్షేమ కమిటీ ఓ బృందాన్ని ఏర్పాటు చేసింది.