ఏలూరు టౌన్‌: ఏలూరు నగర మేయర్‌ పీఠంపై వైఎస్సార్‌ సీపీ జెండా రెపరెపలాడింది. ఏలూరు కార్పొరేషన్‌ ఆవిర్భవించిన తర్వాత మూడోసారి జరిగిన ఎన్నికల్లో వైఎస్సార్‌ సీపీ విజయభేరి మోగించింది. నూతన పాలక వర్గం శుక్రవారం కొలువుదీరింది. నగర మేయర్‌గా నూర్జహాన్‌, డిప్యూటీ మేయర్లుగా జి.శ్రీనివాసరావు, ఎన్‌.సుధీర్‌బాబు ఎన్నికయ్యారు. ఏలూరు కార్పొరేషన్‌లోని 50వ డివిజన్‌ నుంచి గెలుపొందిన నూర్జహాన్‌ రెండోసారి మేయర్‌ అయ్యారు. గత అనుభవాలను దృష్టిలో పెట్టుకుని నగర అభివృద్ధికి పక్కా ప్రణాళికతో ముందుకు వెళ్లేందుకు సన్నద్ధం అవుతున్నారు. 2014లో ఆమె తొలిసారి మేయర్‌ పీఠాన్ని అధిరోహించారు.   రెండో డిప్యూటీ మేయర్‌/వైస్‌ చైర్‌పర్సన్‌ ఎన్నిక.. రెండో డిప్యూటీ మేయర్‌/వైస్‌ చైర్‌పర్సన్‌ ఎన్నికలో భాగంగా తిరుపతి రెండో డిప్యూటీ మేయర్‌గా భూమన అభినయరెడ్డి ఎన్నికయ్యారు. విశాఖ: జీవీఎంసీ రెండో డిప్యూటీ మేయర్‌గా కట్టమూరి సతీష్ ఎన్నికయ్యారు విజయనగరం: నెల్లిమర్ల నగర పంచాయతీ రెండో వైస్ ఛైర్మన్‌గా కారుకొండ కృష్ణ, సాలూరు మున్సిపల్ రెండో వైస్ ఛైర్మన్‌గా అప్పలనాయుడు, బొబ్బిలి మున్సిపల్ రెండో వైస్ ఛైర్మన్‌గా చెలికాని మురళి ఎన్నికయ్యారు. విజయ నగరం డిప్యూటీ మేయర్‌గా కొలగట్ల శ్రావణి ఎన్నికయ్యారు.  కడప నగరపాలక సంస్థ రెండో డిప్యూటీ మేయర్‌గా నిత్యానందరెడ్డి ఎన్నికయ్యారు.  అనంతపురం: గుంతకల్లు మున్సిపల్‌ రెండో వైస్ ఛైర్మన్‌గా నైరుతిరెడ్డి ఎన్నికయ్యారు. అనంతపురం కార్పొరేషన్ రెండో డిప్యూటీ మేయర్‌గా విజయ్‌భాస్కర్‌రెడ్డి ఎన్నికయ్యారు. 

సాక్షి, హైదరాబాద్‌ : ఎన్నికలు సమీపిస్తున్న వేళ టీడీపీ నుంచి వైఎస్సార్‌ కాంగ్రెస్‌ పార్టీలోకి వలసల వరద కొనసాగుతోంది. టీడీపీ నేతలు ఆ పార్టీకి షాక్‌ల మీద షాక్‌లు ఇస్తున్నారు. ఇప్పటికే ఆ పార్టీకి చెందిన కీలక నేతలు వైఎస్సార్‌సీపీ తీర్థం పుచ్చుకోగా... తాజాగా ఏలూరు టీడీపీ మేయర్‌ నూర్జహాన్‌, ఆమె భర్త ఎస్సెమ్మార్‌ పెదబాబు వైఎస్‌ జగన్‌ సమక్షంలో బుధవారం వైఎస్సార్‌సీపీలో చేరారు. టీడీపీలో అవమానాలు భరించలేకే ఆ పార్టీకి రాజీనామా చేశామని చెప్పారు. ఆళ్లనానిని ఎమ్మెల్యేగా గెలిపించి తీసుకొస్తామని భరోసానిచ్చారు. అధినేత ఆదేశిస్తే మేయర్‌ పదవికి రాజీనామా చేస్తానని నూర్జహాన్‌ స్పష్టం చేశారు. వైఎస్‌ జగన్‌ ముఖ్యమంత్రి అయితేనే ఏపీ ప్రజల ఆకాంక్షలు నెరవేరుతాయని వ్యాఖ్యానించారు. ఏలూరు ప్రజలకు మంచి జరగాలనే ఉద్దేశంతోనే వైఎస్‌ జగన్‌ ఆధ్వర్యంలో పనిచేయడానికి ముందుకొచ్చామని వెల్లడించారు. (వైఎస్సార్‌సీపీలో చేరిన మరో టీడీపీ ఎంపీ) తూర్పు గోదావరిలో టీడీపీకి మరో షాక్‌.. జిల్లాలోని జగ్గంపేట నియోజకవర్గంలో టీడీపీకి మరో షాక్‌ తగిలింది. ఇప్పటికే కాకినాడ ఎంపీ తోట నరసింహం, తోట వాణి, ప్రత్తిపాడు మాజీ ఎమ్మెల్యే పర్వత బాపనమ్మ వైఎస్సార్‌ కాంగ్రెస్‌ పార్టీలో చేరిన సంగతి తెలిసిందే. ఇక జగ్గంపేట టీడపీ ఎమ్మెల్యే జ్యోతుల నెహ్రూ ప్రధాన అనుచరులైన ప్రముఖ పారిశ్రామికవేత్త అత్తులూరి నాగబాబు, జనపరెడ్డి సుబ్బారావు నియోజకవర్గ కో-ఆర్డినేటర్‌ జ్యోతుల చంటిబాబు సమక్షంలో వైఎస్సార్‌ కాంగ్రెస్‌ పార్టీలో చేరారు. నాగబాబు, జనపరెడ్డి అనుచరులు 2000 మంది కూడా వైఎస్సార్‌సీపీలో చేరారు. (‘ఎవరి ఒత్తిడి లేదు, అందుకే వైఎస్సార్‌సీపీలో చేరా’)