ఇంకా వెంటిలేటర్ మీదే అంబరీష్

కర్ణాటక గృహనిర్మాణ శాఖ మంత్రి, ప్రముఖ నటుడు అంబరీష్ పరిస్థితి బాగానే ఉందని, అయితే ఆయన మరో రెండు రోజుల పాటు వెంటిలేటర్ మీదే ఉండాలని ఆయనకు వైద్యం చేస్తున్న ఓ వైద్యుడు తెలిపారు. 61 ఏళ్ల అంబరీష్ను ఈనెల 21న ఆస్పత్రిలో చేర్చారు. ఆయనకు ఊపిరి అందని స్థితిలో తీసుకొచ్చారు.

ప్రస్తుతం ఆయనకు యాంటీబయాటిక్స్, నెబులైజర్లు, ఫీడింగ్ ఇస్తున్నామని, నొప్పి తెలియకుండా పూర్తిగా మత్తులోనే ఉంచుతున్నట్లు విక్రమ్ ఆస్పత్రికి చెందిన డాక్టర్ కేఎస్ సతీష్ తెలిపారు. రాబోయే రెండు రోజుల్లో ఆయనకు ఊపిరి సాధారణంగానే అందుతుందని ఆశిస్తున్నామని, అప్పుడు వెంటిలేటర్ సపోర్ట్ తీసేస్తామని అన్నారు. ఆయన పరిస్థితి క్రమంగా మెరుగుపడుతోందని, వెంటిలేటర్ తీసేయాలో వద్దో రేపు ఉదయం నిర్ణయం తీసుకుంటామని చెప్పారు.