పుతిన్‌కు ఫస్ట్ ర్యాంక్, మోదీకి 9వ ర్యాంక్!

ప్రపంచంలో అత్యంత శక్తిమంతమైన వ్యక్తుల జాబితాలో ప్రధాని నరేంద్రమోదీ టాప్ 10 ర్యాంకులలో స్థానం సంపాదించారు. ఆయన తొమ్మిదో స్థానంలో నిలవగా, రష్యా అధ్యక్షుడు వ్లాదిమిర్ పుతిన్ వరుసగా నాలుగో సంవత్సరం కూడా మొదటి స్థానంలోనే ఉన్నారు. అమెరికా కొత్త అధ్యక్షుడిగా ఎన్నికైన డోనాల్డ్ ట్రంప్‌కు రెండోర్యాంకు వచ్చింది. ఫోర్బ్స్ పత్రిక మొత్తం 74 మందితో కూడిన ఈ జాబితాను విడుదల చేసింది. 130 కోట్ల మంది భారతీయులలో భారత ప్రధాని నరేంద్రమోదీకి బ్రహ్మాండమైన పాపులారిటీ ఉందని ఫోర్బ్స్ పత్రిక ప్రత్యేకంగా పేర్కొంది. వాతావరణ మార్పులు, భూతాపం లాంటి అంశాల్లో మోదీ చాలా క్రియాశీలకంగా వ్యవహరించారని, తర్వాత పరిణామాల్లో ఆయన ప్రపంచస్థాయి నేతగా ఎదిగారని తెలిపింది. అవినీతి, మనీలాండరింగ్‌లను తగ్గించడానికి గత నెలలో పెద్దనోట్లను రద్దుచేస్తూ అనూహ్య ప్రకటన చేయడాన్ని కూడా ఆ పత్రిక ప్రస్తావించింది.