విద్య, వైద్యరంగంపై ప్రత్యేక శ్రద్ధ

● ఎమ్మెల్యే కేఆర్‌ నాగరాజు

వర్ధన్నపేట: విద్య, వైద్యరంగంపై సీఎం రేవంత్‌రెడ్డి ప్రత్యేక దృష్టి సారించారని ఎమ్మెల్యే కేఆర్‌ నాగరాజు అన్నారు. మంగళవారం వర్ధన్నపేట మండలం ఉప్పలపల్లి క్రాస్‌ రోడ్డు వద్ద వందపడకల ఆస్పత్రి నిర్మాణానికి కలెక్టర్‌ సత్యశారదతో కలిసి భూమి పూజ చేశారు. అనంతరం ఎమ్మెల్యే క్యాంపు కార్యాలయంలో వర్ధన్నపేట, పర్వతగిరి, ఐనవోలు, హసన్‌పర్తి మండలాల 1,111 స్వయం సహాయక సంఘాలకు రూ.2.06 కోట్ల వడ్డీ లేని రుణాలను పంపిణీ చేశారు. ఈ సందర్భంగా ఎమ్మెల్యే మాట్లాడుతూ గత ప్రభుత్వంలో శిలాఫలకాలు వేశారే తప్ప అభివృద్ధి పనులు చేపట్టలేదన్నారు. మహిళలు పారిశ్రామిక వేత్తలుగా ఎదిగేందుకు ప్రభుత్వం అవకాశం కల్పిస్తుందన్నారు. కలెక్టర్‌ సత్యశారద మాట్లాడుతూ మహిళలు తీసుకున్న రుణాలు సకాలంలో చెల్లించి ఆర్థికంగా అభివృద్ధి చెందాలన్నారు. టెస్కాబ్‌ చైర్మన్‌ మార్నేని రవీందర్‌రావు మాట్లాడుతూ ఆస్పత్రి నిర్మాణంతో ప్రజలకు మెరుగైన వైద్యసేవలు అందుతాయన్నారు. ఈ కార్యక్రమంలో డీఆర్‌డీఓ పీడీ రామిరెడ్డి, డీఎంహెచ్‌ఓ సాంబశివరావు, డీసీహెచ్‌ రామ్మూర్తి, సూపరింటెండెంట్‌ డాక్టర్‌ నర్సింహస్వామి, తహసీల్దార్‌ విజయసాగర్‌, మార్కెట్‌ కమిటీ చైర్మన్‌ నరుకుడు వెంకటయ్య, కమ్మగోని ప్రభాకర్‌గౌడ్‌, నాయకులు,కార్యకర్తలు పాల్గొన్నారు.అలాగే మండలంలోని ఇల్లంద ఊర చెరువు కట్ట బుంగ పడిన విషయంపై స్పందించిన ఎమ్మెల్యే నాగరాజు మంగళవారం చెరువు కట్ట బుంగ ప్రదేశాన్ని సందర్శించి పరిశీలించారు. వెంటనే సంబంధిత అధికారులతో మాట్లాడారు. పరిస్థితిని ఫోన్‌ ద్వారా కలెక్టర్‌కు వివరించారు. కట్ట మరమ్మతు పనులను తక్షణమే ప్రారంభించాలని అధికారులను ఆదేశించారు.