జోరందుకున్న నామినేషన్ల పర్వం

జోరందుకున్న నామినేషన్ల పర్వం

వనపర్తి: గ్రామపంచాయతీ ఎన్నికల మొదటివిడత నామినేషన్ల స్వీకరణ రెండోరోజు శుక్రవారం జిల్లాలో జోరందుకుంది. ఐదు మండలాల పరిధిలోని 87 సర్పంచ్‌ స్థానాలకు 157, 780 వార్డులకు 250 నామినేషన్లు దాఖలైనట్లు జిల్లా అదనపు ఎన్నికల అధికారి తెలిపారు. శనివారం చివరిరరోజు నామినేషన్ల సంఖ్య భారీగా పెరగనున్నట్లు తెలుస్తోంది. ఆయా గ్రామాల్లో సర్పంచ్‌, వార్డు సభ్యుల పదవుల కోసం పోటీకి రాజకీయ పార్టీల నాయకులు గ్రామ, మండల, జిల్లాస్థాయిలో సమీకరణలు, రాజీపర్వాలు సుదీర్ఘంగా చేస్తున్నారు. అధికార కాంగ్రెస్‌పార్టీలో పోటీదారులు ఎక్కువగా ముందుకొస్తున్నారు. తొలి విడత ఎన్నికలు జరిగే వనపర్తి నియోజకవర్గం పరిధిలోని ఐదు మండలాల్లో ఎమ్మెల్యే మేఘారెడ్డి, రాష్ట్ర ప్రణాళికా సంఘం ఉపాధ్యక్షుడు జి. చిన్నారెడ్డి వర్గం నుంచి అభ్యర్థులు పోటీ పడుతున్నారు. ఇప్పటికే.. చాలాచోట్ల ఇరువర్గాల వారు కాంగ్రెస్‌ మద్దతు కోరుతూ.. నామినేషన్లు దాఖలు చేసినట్లు తెలుస్తోంది.