తెలంగాణ భవన్‌ వద్ద హైడ్రామా.. సుమన్‌ అరెస్ట్‌ తప్పదా?

సాక్షి, హైదరాబాద్‌: బీఆర్‌ఎస్‌ మాజీ ఎమ్మెల్యే బాల్క సుమన్‌ అరెస్ట్‌కు రంగం సిద్దమైనట్టు తెలుస్తోంది. సింగరేణిపై అనుచిత వ్యాఖ్యల నేపథ్యంలో బాల్క సుమన్‌పై పలు స్టేషన్‌లో కేసులు నమోదయ్యాయి. ఈ క్రమంలో బాల్క సుమన్‌ను అరెస్ట్‌ చేయనున్నట్టు సమాచారం. ఇందులో భాగంగానే తెలంగాణ భవన్‌ వద్ద పోలీసులు పహారా కాస్తున్నారు.

మాజీ ఎమ్మెల్యే బాల్క సుమన్‌ గత మూడు రోజులుగా తెలంగాణ భవన్‌లో ఉన్నట్టు సమాచారం. ఈ నేపథ్యంలో తెలంగాణభవన్‌ వద్దనే టాస్క్‌ఫోర్స్‌ పోలీసులు గత మూడు రోజులుగా మోహరించారు. బాల్క సుమన్ భవన్ నుండి బయటికి వస్తే అరెస్టు చేయాలన్న ఆలోచనలో పోలీసులు ఉన్నట్టు తెలుస్తోంది. ఈరోజు ఉదయం కూడా తెలంగాణ భవన్ వద్ద పోలీసులు ఉన్నారు. దీంతో, ఏ క్షణంలో అయినా బాల్క సుమన్‌ను అరెస్ట్ చేసే అవకాశం ఉంది. ఈ నేపథ్యంలో కాసేపటి క్రితమే సుమన్‌ తరపు లాయర్‌ అక్కడికి చేరుకున్నారు. అలాగే, నాంపల్లి, టాస్క్‌ఫోర్స్‌ పోలీసులు.. సుమన్‌కు నోటీసులు ఇచ్చేందుకు ప్రయత్నిస్తున్నారు.

మరోవైపు.. బాల్క సుమన్‌పై పలు సెక్షన్ల కింద కేసు నమోదు చేశారు పోలీసులు. ​326, 351, 352, 353, 355, 361-BNS మరియు PDPP చట్టాల కింద కేసులు నమోదు చేసినట్లు సమాచారం. ​పదేళ్ల వరకు శిక్ష పడే అవకాశం ఉన్న సెక్షన్లను కేసులో చేర్చిన పోలీసులు. దీంతో, పోలీసులతో బీఆర్ఎస్ లీగల్ సెల్ న్యాయవాదులు వాగ్వాదానికి దిగారు. సుమన్‌పై అక్రమ కేసులు పెట్టారంటూ లాయర్ల ఆగ్రహం వ్యక్తం చేశారు. ​నాంపల్లి కోర్టు లేదా హైకోర్టును ఆశ్రయించి ముందస్తు బెయిల్ తెచ్చుకుంటామంటున్నారు. ​అక్రమ అరెస్టులకు భయపడేది లేదని, న్యాయస్థానాల్లోనే తేల్చుకుంటామని న్యాయవాదుల హెచ్చరించారు. ఈ క్రమంలో ​భవన్ వద్ద పోలీసులకు, లాయర్లకు మధ్య చర్చలు, వాదోపవాదాలు కొనసాగుతున్నాయి. భవన్ వద్ద భారీగా మోహరించిన పోలీసులతో తీవ్ర ఉత్కంఠ నెలకొంది.