రక్తదానం చేసి ప్రాణదాతలు కండి

గజ్వేల్‌రూరల్‌: అత్యవసర సమయాల్లో రక్తదానం చేసి ప్రాణదాతలు కావాలని గజ్వేల్‌ ప్రభుత్వాస్పత్రి సూపరింటెండెంట్‌ డాక్టర్‌ అన్నపూర్ణ పిలుపునిచ్చారు. ఈ సందర్భంగా శుక్రవారం ఆమె మాట్లాడుతూ 18ఏళ్ల పైబడి ఆరోగ్యవంతులైన యువతీ, యువకులు రక్తదానం చేయవచ్చని తెలిపారు. రక్తదానం చేయడం వల్ల శరీరంలో కొత్త రక్తం ఉత్పత్తి జరిగి వ్యాధి నిరోధక శక్తి పెరుగుతుందన్నారు. 3నెలలకోసారి రక్తదానం చేయవచ్చన్నారు. ఈనెల 7న ప్రపంచ ఆరోగ్య దినోత్సవాన్ని పురస్కరించుకొని ఆసుపత్రిలో రక్తదాన శిబిరం ఏర్పాటు చేసినట్లు తెలిపారు. రక్తదానం చేయాలనుకునే వారు మరిన్ని వివరాలకు 99084 72511, 95505 34471 నంబర్లలో సంప్రదించాలని సూచించారు. వర్గల్‌(గజ్వేల్‌): గద్దర్‌ ఫౌండేషన్‌ ఆధ్వర్యంలో ఈ నెల 6న హైదరాబాద్‌లో జరిగే ప్రశ్నించే గొంతులు సాధించిన విజయాలపై రాష్ట్ర స్థాయి సభను జయప్రదం చేయాలని దళిత బహుజన ఫ్రంట్‌ జాతీయ కార్యదర్శి పి.శంకర్‌ పిలుపునిచ్చారు. శుక్రవారం వర్గల్‌ మండలం నాచారం అంబేద్కర్‌ విగ్రహం వద్ద గద్దర్‌ ఫౌండేషన్‌ పోస్టర్‌ను విడుదల చేశారు. హైదరాబాద్‌ సుందరయ్య విజ్ఞాన కేంద్రంలో సాయంత్రం జరిగే ఈ సభకు ప్రతి ఒక్కరూ హాజరుకావాలని కోరారు. కార్యక్రమంలో వివిధ సంఘాల నాయకులు పాల్గొన్నారు. ప్రశాంత్‌నగర్‌(సిద్దిపేట): తెలంగాణ సాయుధ రైతాంగ పోరాటంలో దొడ్డి కొమురయ్య విరోచిత పోరాటం ఎనలేనిదని కురుమ ఉద్యోగుల సంఘం జిల్లా అధ్యక్షుడు పొతుగంటి రవికాంత్‌ అన్నారు. శుక్రవారం జిల్లా కేంద్రంలోని కురుమ సంఘం భవనంలో దొడ్డికొమురయ్య జయంతి ఉత్సవాలను ఘనంగా నిర్వహించారు. దొడ్డికొమురయ్య చిత్రపటానికి పూలమాలలు వేసి నివాళులర్పించారు. ఈ సందర్భంగా రవికాంత్‌ మాట్లాడుతూ దొడ్డి కొమురయ్య విరోచిత పోరాటం, వీర మరణం తీరును కొనియాడారు. కార్యక్రమంలో కురుమ ఉద్యోగులు, సంఘం నాయకులు, చిన్నకోడూరు ఎస్‌ఐ చంద్రమోహన్‌ తదితరులు పాల్గొన్నారు.