అభివృద్ధిపై బహిరంగ చర్చకు సిద్ధమా?

● ఎమ్మెల్యే లోకం నాగమాధవికి వైఎస్సార్‌ సీపీ నాయకుల సవాల్‌

పూసపాటిరేగ: వైఎస్సార్‌ సీపీ ఐదేళ్ల పాలనలో జరిగిన అభివృద్ధికి, ఇప్పుడు అధికారంలోని చంద్రబాబు ప్రభుత్వం 18 నెలల కాలంలో జరిగిన అభివృద్ధిపై బహిరంగ చర్చకు సిద్ధమా అని వైఎస్సార్‌ సీపీ మండల అధ్యక్షుడు పతివాడ అప్పలనాయుడు, మండల వైస్‌ ఎంపీపీ అల్లాడ రమేష్‌లు సవాల్‌ విసిరారు. ఇదే విషయమై మండల కేంద్రంలోని వైఎస్సార్‌ సీపీ కార్యాలయంలో శనివారం విలేకరుల సమావేశం నిర్వహించి, మాట్లాడారు. ఎరుకొండ, అల్లాడపాలెం గ్రామాల్లో ఎమ్మెల్యే పర్యటించినప్పుడు ఆయా గ్రామాల్లో వైఎస్సార్‌ సీపీ హయాంలో చేసిన అభివృద్ధి ఎమ్మెల్యేకు కనిపించకపోవడం దురదృష్టకరమన్నారు. ఏ గ్రామం వెళ్లినా వైఎస్సార్‌ సీపీ అధికారంలో ఉన్నప్పుడు చేసిన అభివృద్ధే కనిపిస్తోందన్నారు. అల్లాడపాలెంలో రూ.కోటి నిధులతో సీసీ రోడ్లు, కాలువలు, బోర్లు వేశారని, అవేవీ కానరాలేదా అని మండిపడ్డారు. అదే గ్రామంలో ధాన్యం కొనుగోళ్లు కేంద్రం ప్రారంభోత్సవంలో కనీసం ప్రోటోకాల్‌ పాటించకుండా జనసేన జెండాలతో నింపేసి అదొక పార్టీ కార్యక్రమంలా చేసేశారని ఎద్దేవా చేశారు.

యువతకు ఉద్యోగాలెప్పుడిస్తారు?

ఎమ్మెల్యే నాగమాధవి గ్రామాల్లో పర్యటిస్తున్నప్పుడు అక్కడి సర్పంచ్‌లు, ఎంపీటీసీ సభ్యులను లేనిపోని మాటలతో దూషిస్తుండడాన్ని తీవ్రంగా ఖండిస్తున్నామన్నారు. అధికారం ఉంది కదా అని లేనిపోని మాటలు మాట్లాడితే తగిన మూల్యం చెల్లించుకోక తప్పదన్నారు. రెల్లివలసలో కార్పొరేట్‌ స్థాయిలో శ్మశానవాటికను అభివృద్ధి చేస్తే దానిపై ఎమ్మెల్యే ఫిర్యాదు చేయడం అర్థరహితమన్నారు. తాను గెలిచి అధికారం కూడా వస్తే వంద రోజుల్లో వంద కంపెనీలు తీసుకువచ్చి నిరుద్యోగ యువతకు ఉద్యోగాలు ఇస్తామన్న మాట ఎప్పుడు నెరవేరుస్తారని ఎమ్మెల్యేను ప్రశ్నించారు. అధికారులు కూడా వృత్తి ధర్మం పాటించకుండా రాజకీయ నాయకులకు తొత్తులుగా మారడం సిగ్గుచేటన్నారు. ప్రోటోకాల్‌ ఉల్లంఘనకు పాల్పడుతున్న అధికారులపై ఫిర్యాదులు చేస్తామన్నారు. మండలంలోని 28 పంచాయతీల్లో ఏ పంచాయతీ అభివృద్ధిపైనా అయినా ఎమ్మెల్యేతో చర్చకు సిద్ధమని స్పష్టం చేశారు. సమావేశంలో వైస్‌ ఎంపీపీ ఎన్‌.సత్యనారాయణరాజు, ఎంపీపీ ప్రతినిధి మహంతి శ్రీనివాసరావు, జెడ్పీటీసీ ప్రతినిధి మహంతి జనార్థనరావు తదితరులు పాల్గొన్నారు.