సాహితీ చైతన్య రజతోత్సవం..

విజయనగరం టౌన్‌: ప్రపంచవ్యాప్తంగా గుర్తింపు పొందిన మహనీయుడును స్మరిస్తూ గురజాడ సాంస్కృతిక సమాఖ్య పేరుతో జిల్లాలోని సాహితీవేత్తలు, అభిమానులు 2000 సంవత్సరంలో ఓ సంస్థ ఏర్పాటు చేశారు. కేవలం సభ్యుల సహకారంతోనే ప్రతి ఏటా ఉత్సవాలను నిర్వహిస్తూ గురజాడ సాహిత్యంపై కృషి చేస్తున్న వారిని గుర్తించి గురజాడ విశిష్ట పురస్కారాలను అందజేస్తోంది. నేటికి 25 ఏళ్లు పూర్తి కావడంతో ఈ ఏడాది సాహితీ చైతన్యోత్సవం పేరుతో రజతోత్సవ వేడుకలకు రంగం సిద్ధం చేసింది.

భావితరాలకు అవగాహన

మహాకవి చేసిన రచనలపై నేటితరానికి అవగాహన కల్పించే దిశగా సమాఖ్య కృషి చేస్తోంది. జిల్లాలోని మారుమూల ప్రాంతాల నుంచి వందలాది మంది విద్యార్థులకు అవగాహన కల్పించడంతో పాటు పోటీలు నిర్వహించి బహుమతులు అందిస్తున్నారు. జాతీయస్థాయిలో కవితల పోటీలు నిర్వహించి ఉత్తమ కవులకు గురజాడ ఉత్తమ కవితా పురస్కారంతో సత్కరిస్తున్నారు. ఇప్పటివరకు భారతదేశంలోని అన్ని రాష్ట్రాల నుంచి 190 మందికి పైగా కవులు పాల్గొన్నారు.

మరణాంతరం కూడా జీవిస్తారు..

మహా పురుషులందరూ మరణాంతరం కూడా జీవిస్తారు. ప్రతి ఒక్కరూ మహానుభావుల జయంతి రోజున కార్యక్రమాలను నిర్వహిస్తుంటారు. కానీ గురజాడ సాంస్కృతిక సమాఖ్య మాత్రం గురజాడ వర్ధంతి రోజున కార్యక్రమాలు నిర్వహిస్తూ..ఆయనకు మరణం లేదని చెబుతూ వస్తున్నాం. మహాకవి సాహితీవనంలో వేసిన బాటలో నడయాడడమే మనందరి బాధ్యత.

– కాపుగంటి ప్రకాష్‌, ప్రధాన కార్యదర్శి,

గురజాడ సాంస్కృతిక సమాఖ్య, విజయనగరం