పనితీరు బాగా లేని పాలకవర్గాలకు గుడ్‌బై

పనితీరు బాగా లేని పాలకవర్గాలకు గుడ్‌బై

మోర్తాడ్‌(బాల్కొండ) : సహకార సంఘాల పాలకవర్గాల పాలన తీరు బాగుంటేనే పదవీకాలాన్ని పొడిగించాలనే నిబంధనను విధించడంతో కొన్ని పాలకవర్గాలకు ఉద్వాసన పలుకుతూ ఉన్నతాధికారులు నిర్ణయం తీసుకున్నారు. సహకార సంఘాల పదవీ కాలం గత ఫిబ్రవరిలో ముగియగా, సకాలంలో ఎన్నికలను నిర్వహించని కారణంతో పదవీ కాలాన్ని ఆగస్టు 14 వరకూ పొడిగిస్తూ ప్రభుత్వం నిర్ణయం తీసుకుంది. అయితే పొడిగించిన పదవీకాలం గడువు కూడా ముగియడంతో మరోసారి పొడిగింపు ఉత్తర్వులను ప్రభుత్వం ఆగస్టు 14వ తేదీన జారీ చేసినప్పటికీ గతంలో మాదిరిగా అన్ని సంఘాల పాలకవర్గాలకు పొడిగింపు ఇవ్వకుండా ప్రభుత్వం కొత్త నిబంధన విధించింది. పాలకవర్గాల పాలన తీరు ఎలా ఉంది, సంఘాల ఆర్థిక పరిస్థితి, ఎక్కడైన పాలకవర్గాలు అక్రమాలకు పాల్పడ్డాయా, నిధుల దుర్వినియోగం తదితర అంశాలపై ప్రభుత్వం సహకార శాఖ నివేదికను కోరింది. జిల్లాలో 89 సహకార సంఘాలు ఉండగా అన్ని పాలకవర్గాల పనితీరును సహకార శాఖ విశ్లేషించింది. చివరకు 43 సంఘాల పాలకవర్గాలకు పొడిగింపు ఆదేశాలను గురువారం ఇచ్చింది. మరో 20 సంఘాల పాలకవర్గాల పనితీరును పరిశీలిస్తుండగా, వీటికి రెండు మూడు రోజుల్లో పొడిగింపు ఉత్తర్వులు జారీ చేసే అవకాశం ఉంది. 26 సంఘాల పాలకవర్గాల పనితీరు అసలే బాగోలేదని నిర్ధారణకు వచ్చిన అధికారులు సహకార శాఖ అధికారులకు పర్సన్‌ ఇన్‌చార్జీ బాధ్యతలను అప్పగించనున్నారు. ప్రభుత్వం ఇచ్చిన మార్గదర్శకాల ప్రకారం పాలకవర్గాల పనితీరుపై ఉన్నతాధికారులు తమ ఆడిటర్లు, వివిధ హోదాల్లో ఉన్న ఉద్యోగులతో వివరాలను సేకరించారు. సహకార శాఖ రిజిస్ట్రార్‌కు నివేదికను పంపించడంతో పాలకవర్గాల పొడిగింపునకు వారు నిర్ణయం తీసుకున్నారు. నిధులను సొంతానికి వాడుకోవడం, సకాలంలో ఎరువుల కంపెనీలకు బకాయిలు చెల్లించకపోవడం, రుణాల వసూళ్లలో వెనుకబడి ఉండటం ఇలా పలు కారణాలతో కొన్ని సంఘాల పాలకవర్గాల స్థానంలో అధికారులకు బాధ్యతలు అప్పగించనున్నారు.

ప్రభుత్వ మార్గదర్శకాల ప్రకారం పాలక వర్గాల పనితీరును పరిశీలించి సహకార శాఖ రిజిస్ట్రార్‌కు నివేదికను అందించాం. అక్కడి నుంచి వచ్చిన ఆదేశాలు, సూచనల మేరకు కొన్ని సంఘాల బాధ్యతను ఉద్యోగులకే అప్పగించనున్నాం. పదవీ కాలం పొడిగింపు వర్తించే పాలకవర్గాలకు ఉత్తర్వులను జారీ చేశాం.

– శ్రీనివాస్‌రావు,

జిల్లా సహకార అధికారి

సహకార సంఘాల పదవీకాలాన్ని

పొడిగిస్తూ ఉత్తర్వులు

తాజాగా 43 సంఘాల

పాలకవర్గాలకు వర్తింపు

పరిశీలనలో 20 పాలకవర్గాలు

26 పాలకవర్గాలకు నో చెప్పిన

అధికార యంత్రాంగం